ពិធីបុណ្យវិសាខបូជា នៅថ្ងៃទី៦ ឧសភាឆ្នាំ២០២០ នេះ មិនសូវមានពុទ្ធិបរិស័ទទៅវត្តជួបជុំគ្នា ធ្វើបុណ្យច្រើនដូចរាល់ឆ្នាំទេ ព្រោះខ្លាចឆ្លងជំងឺកូវីដ-១៩ (Covid-19)។ អាជ្ញាធរធម្មការ និងព្រះសង្ឃ ឲ្យដឹងថា តាមវត្តនៅតែធ្វើពិធីសូត្រមន្តដដែល តែមិនធ្វើពិធីក្បួនដង្ហែព្រះពុទ្ធរូប ឬជួបជុំពុទ្ធបរិស័ទច្រើនទេ។
អ្នកនាំពាក្យក្រសួងធម្មការ និងសាសនា លោក សេង សុមុនី ប្រាប់អាស៊ីសេរីថា តាមវត្តទាំងអស់ មិនត្រូវបានអនុញ្ញាតឲ្យជួបជុំពុទ្ធបរិស័ទច្រើនទេ ហើយចំនួនព្រះសង្ឃសូត្រមន្ត ក្នុងពិធីបុណ្យវិសាខបូជា ក៏កាត់បន្ថយឲ្យនៅចំនួនតិច តាមដែលអាចធ្វើទៅបានដែរ។
លោក ប្រាប់ថា ក្បួនដង្ហែព្រះពុទ្ធរូប តំណាងឲ្យព្រឹត្តិការណ៍ទាំង៣ នៃអត្ថន័យបុណ្យវិសាខបូជា គឺព្រះពុទ្ធប្រសូត ត្រាស់ដឹង ចូលព្រះបរិនិព្វាន ក៏មិនមានការដង្ហែដែរនៅឆ្នាំនេះ។ លោកអះអាងថា គ្រប់វត្តអារាម បានអនុវត្តវិធានការទាំងនេះបានល្អ សូម្បីនៅទីតាំងប្រារព្ធធំ នៅភ្នំព្រះរាជទ្រព្យ ឬភ្នំឧត្ដុង្គ ក៏ពុទ្ធបរិស័ទមិនបានជួបជុំគ្នាប្រារព្ធ ឬរាប់បាត្រទ្រង់ទ្រាយធំនៅឆ្នាំនេះដែរ ព្រោះវិបត្តិជំងឺកូវីដ-១៩៖ «ដង្ហែដូចរាល់ឆ្នាំនោះ គឺគ្មានទេ។ យើងមានរាប់សក្ការបូជា នៅតាមវត្ត តាមផ្ទះ ពុទ្ធបរិស័ទអ៊ីចឹងទៅ។ ប៉ុន្តែមិនមានពិធីដង្ហែ មិនមានពិធីប្រកាសវិសាខបូជាអ្វីទេ។ សូម្បីតែរាជរដ្ឋាភិបាលមានទីតាំងរួមនៅទីតាំងភ្នំព្រះរាជទ្រព្យអ្វីហ្នឹង ក៏លោកអត់មានប្រកាសអ្វីដែរ អត់មានពិធីរាប់បាត្រអ្វីទេ។»
បុណ្យវិសាខបូជា ជាបុណ្យធំបំផុតសម្រាប់អ្នកកាន់ពុទ្ធសាសនា ព្រោះជាការគោរព និងរំឭកដល់ព្រឹត្តិការណ៍ធំៗ បី នៃសម័យពុទ្ធកាល ដែលព្រះសម្មាសម្ពុទ្ធសមណគោតម ទ្រង់បានប្រសូត បានត្រាស់ដឹង និងបានចូលបរិនិព្វានចំថ្ងៃ ១៥កើត ពេញបូណ៌មី ខែពិសាខដូចគ្នា ខុសតែឆ្នាំប៉ុណ្ណោះ។
រាល់ឆ្នាំពិធីបុណ្យនេះ ត្រូវបានរៀបចំយ៉ាងអធិកអធម ដោយពុទ្ធបរិស័ទជាច្រើនទៅជួបជុំគ្នា នៅលើកំពូលភ្នំអដ្ឋរស្ស នៅក្នុងស្រុកពញាឮ ខេត្តកណ្ដាល ជាទីតម្កល់ព្រះសារីរិកធាតុរបស់ព្រះសម្មាសម្ពុទ្ធ។
ចំណែកនៅកន្លែងផ្សេងទៀត មានការដង្ហែព្រះពុទ្ធរូបប្រទក្សិណជុំវិញវត្តអារាម ដង្ហែជាក្បួនលើឡាន ដង្ហែតាមភូមិស្រុក សែនទាន ធូប ផ្កា រាប់បាត្រព្រះសង្ឃ និងបណ្ដែតប្រទីប នៅពេលយប់ជាដើម។
ព្រះចៅអធិការវត្តព្រះពុទ្ធឃោសាចារ្យ នៅស្រុកអូររាំងឪ ខេត្តត្បូងឃ្មុំ ព្រះតេជគុណ ព្រហ្ម សូរវង្ស មានព្រះថេរដីកាថា ឆ្នាំនេះ មិនសូវមានពុទ្ធបរិស័ទមកវត្តធ្វើបុណ្យទេ ព្រោះវត្តមិនបានផ្សព្វផ្សាយ ឱ្យពលរដ្ឋមកធ្វើបុណ្យ ហើយក្បួនដង្ហែមួយចំនួន ក៏កាត់បន្ថយដែរ។
ទោះយ៉ាងណា ព្រះអង្គបន្តថា ព្រះសង្ឃ និងពុទ្ធបរិស័ទចាស់ៗ ចំណុះជើងវត្ត នៅតែជួបជុំគ្នា សូត្រមន្តនៅពេលល្ងាច ដើម្បីរំលឹកបុណ្យវិសាខបូជាដដែល គ្រាន់តែមិនមានមនុស្សច្រើនទេ ហើយខាងវត្ត បានតម្រូវឲ្យពុទ្ធបរិស័ទ អនុវត្តអនាម័យ និងវិធានការការពារសុខភាពតាមក្រសួងសុខាភិបាលណែនាំ៖ «នៅក្នុងវត្តអាត្មានេះ គឺអាត្មា មានដាក់កន្លែងលាងដៃ។ លាងដៃ ជាមួយសាប៊ូ។ ពុទ្ធបរិស័ទខ្លះក៏យល់ដឹង លាងទៅ ហើយខ្លះក៏មិនយល់ដឹង។ ឯការរក្សាគម្លាតពីគ្នា គឺបានល្អ គាត់មិនចូលជិតគ្នាទេ»។
ព្រះអង្គបន្ថែមថា បើទោះមិនទៅវត្តក៏ដោយ ក៏ពុទ្ធបរិស័ទអាចប្រារព្ធពិធីបុណ្យវិសាខបូជា នៅតាមផ្ទះបានដែរ ដោយសម្អាតចិត្ត ឱនកាយវិការ ថ្វាយបង្គំព្រះពុទ្ធរូប រៀបចំគ្រឿងសក្ការបូជា និងសូត្រធម៌នមស្ការជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
