ភ្លើង​ឆេះ​ព្រៃ​នៅ​តំបន់​បឹងទន្លេសាប​ខេត្ត​បាត់ដំបង​ងាប់​​សត្វ​ស្វា​អស់​ជាច្រើន​ក្បាល

ដោយ ឡេង ម៉ាលី
2020-04-29
អ៊ីម៉ែល
មតិ
Share
បោះពុម្ព
ទិដ្ឋភាព​ភ្លើង​ឆេះ​ព្រៃ​លិច​ទឹក​នៅ​តំបន់​ទន្លេសាប ក្នុង​ឃុំ​ព្រែកហ្លួង ស្រុក​ឯកភ្នំ ខេត្ត​បាត់ដំបង ថ្ងៃ​ទី២៨ ខែ​មេសា ឆ្នាំ២០២០។
ទិដ្ឋភាព​ភ្លើង​ឆេះ​ព្រៃ​លិច​ទឹក​នៅ​តំបន់​ទន្លេសាប ក្នុង​ឃុំ​ព្រែកហ្លួង ស្រុក​ឯកភ្នំ ខេត្ត​បាត់ដំបង ថ្ងៃ​ទី២៨ ខែ​មេសា ឆ្នាំ២០២០។
រូប៖ សហគមន៍​នេសាទ​ស្ដី​ក្រោម​រហាលសួង

ភ្លើង​ឆេះ​ព្រៃ​លិចទឹក​​​​​នៅ​តំបន់​បឹង​ទន្លេ​សាប​ ក្នុង​ស្រុក​ឯកភ្នំ​ ខេត្ត​បាត់ដំបង​ រយៈ​ពេល​២ថ្ងៃ​ជាប់​គ្នា ហើយ​បាន​បំផ្លាញ​ព្រៃ​សហគមន៍​នេសាទ​​​មួយ​កន្លែង​​ និង​ងាប់​សត្វ​ស្វា​អស់​ជា​ច្រើន​ក្បាល​។​ មន្ត្រី​សហគមន៍​នេសាទ​​​នៅ​តំបន់​នោះ​​ អះអាង​ថា ​​ភ្លើង​ឆេះ​ព្រៃ​នេះ​ដោយសារ​​​​មាន​មនុស្ស​​លួច​​ដុះ​ព្រៃ​ទន្ទ្រាន​យក​ដី​ ហើយ​​អាជ្ញាធរ​ពុំ​ទាន់​ចាប់​ជនល្មើស​មក​ផ្ដន្ទាទោស​​នៅ​ឡើយ​។

ប្រធាន​សហគមន៍​នេសាទ​ស្ដី​ក្រោម​រហាល​សួង លោក ភី ហឿត​ ថ្លែង​នៅ​រសៀល​ថ្ងៃ​ទី​២៩​មេសា​ថា ​ជនល្មើស​លួច​ដុត​ព្រៃ​​នៅ​ក្បែរ​​បឹង​អភិរក្ស​ក្នុង​សហគមន៍​​របស់​​ពួក​លោក បណ្ដាល​​ឱ្យ​ឆេះ​អស់​ព្រៃ​​​​ប្រមាណ​៣០​ហិកតារ​ ដែល​ជា​ព្រៃ​លិចទឹក​ដ៏​សំខាន់​ចុង​ក្រោយ​​​​របស់​​​ស្រក​ឯកភ្នំ ពីព្រោះ​ព្រៃ​នេះ​ជា​ជម្រក​​ត្រី​ពង​កូន ​ជម្រក​សត្វ​​ស្វា ពស់​ អណ្ដើក​ និង​សត្វ​ស្លាប​ជា​ច្រើន​ប្រភេទ៖ «ខ្ញុំ​សោកស្ដាយ​និយាយ​មិន​ចេញ​ទេ មិន​ថា​ធ្វើ​យ៉ាងម៉េច​ពន្លត់​ភ្លើង​បាន​ ហើយ​យើង​ក៏​អស់​សង្ឃឹម​ដែរ​ ព្រោះ​យើង​ខំ​ការពារ​ថែរក្សា​​មេ​ពូជ​ត្រី​នៅ​កន្លែង​ហ្នឹង​ ដោយ​សង្ឃឹម​មាន​ព្រែ​មាន​ត្រី​បន្ត​ពូជ​​ពង់​ឱ្យ​កូន​ចៅ​ជំនាន់​ក្រោយ​វា​បាន​ហូប បាន​ស្គាល់​បាន​ដឹង​។ អ្នក​នេសាទ​បាន​ត្រី​​ពេល​រដូវវស្សា​វា​ពង​កូន​ចេញ​ទៅ ដល់​ឥឡូវ​យើង​អស់សង្ឃឹម​ទាំង​ស្រុង​បណ្ដោយ​។យើង​មិន​ដឹង​ថា​គិត​យ៉ាង​ម៉េច​ទេ​ ការ​សោកស្ដាយ​វា​ធំធេង​ពេក​និយាយ​មិន​រួច​នាំ​គ្នា​អង្គុយ​ឈប់​​មើល​ភ្លើង​ឆេះ​ស្រងូតស្រងាត់​​​»

លោក​បន្ត​ថា ​ភ្លើង​ឆេះ​ព្រៃ​​ខ្លាំង​ចាប់​ពី​ថ្ងៃ​ទី​២៨ រហូត​មក​ទល់​ពេល​នេះ​មិន​ទាន់​រលត់​អស់​នៅ​ឡើយ​ទេ។ ​លោក​បន្ថែម​ទៀត​ថា ​ភ្លើង​ឆេះ​ព្រៃ​នេះ​​ ដោយ​សារ​មនុស្ស​ដុត​ព្រៃ​ទន្ទ្រាន​យក​ដី​ធ្វើ​ជា​កម្មសិទ្ធិ​នៅ​ក្បែរ​​សហគមន៍​នេសាទ​របស់​ពួក​លោក​ ហើយ​ពួក​លោក​បាន​ជូន​ដំណឹង​ដល់​អាជ្ញាធរ​​មូលដ្ឋាន ដើម្បី​ឱ្យ​ជួយ​ទប់​ស្កាត់​ដែរ​ ក៏​ប៉ុន្តែ​ពុំ​មាន​ដំណោះស្រាយ​ឡើយ។

ឆ្លើយ​តប​នឹង​បញ្ហា​នេះ​ ប្រធាន​រដ្ឋបាល​ជលផល​ខេត្ត​បាត់ដំបង​ លោក ជួង សុភា ប្រាប់​អាស៊ី​សេរី​ថា ​​

លោក​បាន​បញ្ជូន​មន្ត្រី​របស់​លោក​ចុះ​ទៅ​ស្រង់​ស្ថិតិ​និង​​ស្រាវជ្រាវ​រក​​ជនល្មើស​រួច​​ហើយ។ លោក​បន្ត​ថា ប្រសិន​បើ​ចាប់​អ្នក​លួច​ដុត​ព្រៃ​លោក​បាន លោក​នឹង​ចាត់​វិធាន​ការ​តាម​ផ្លូវ​ច្បាប់៖ «បាទ! ទី​មួយ​យើង​រក​ជនល្មើស​ ទី​២​យើង​ត្រូវ​ស្រាវជ្រាវ​​រក​ផ្ទៃ​ដី​ដែល​បាត់​ហ្នឹង​ ដើម្បី​ឱ្យ​ដឹង​តួលេខ​ពិតប្រាកដ​ ហើយ​បើ​សិន​ជា​មាន​អ្នក​រុក​រាន​ណា​មួយ​ទៅ​ភ្ជួរ​ដី យើង​នឹង​ដាក់​វិធាន​ការ​ឃ្លាំ​មើល​​​ចាំ​ចាប់​ហើយ​។ជា​ពិសេស​គឺ​យើង​ចង់​ចាប់​ជាង​គេ​គឺ​​ចាប់​យក​គ្រឿង​ចក្រ​ហ្នឹង​ឱ្យ​បាន​ទោះ​បី​មនុស្ស​រត់​ក៏​ដោយ បើ​យើង​ចាប់​បាន​គ្រឿង​ច្រក​យើង​​ងាយ​ស្រួល​បង្ក​ជា​​សំណុំ​រឿង​ដាក់​ទៅ​តុលាការ​បាន​»

លោក​បន្ថែម​ថា ​នៅ​ឆ្នាំ​​២០២០ នេះ ភ្លើង​ឆេះ​ព្រៃ​លិច​ទឹក​អស់​ប្រហែល ១ពាន់ (.០០០)ហិកតារ​ ក្នុង​ចំណោម​ដី​ព្រៃ​លិច​ទឹក​ប្រមាណ​ ២០ម៉ឺន​ (២០០.០០០)ហិកតារ​​ក្នុង​​ខេត្ត​បាត់ដំបង។

ចាប់​ពី​ឆ្នាំ​២០១៥​ មក​ទល់​ពេល​នេះ​ភ្លើង​ឆេះ​ព្រៃ​ក្នុង​តំបន់​បឹង​ទន្លេសាប​ខេត្ត​បាត់ដំបង​​​អស់​​ព្រៃ​ប្រមាណ ៩ពាន់ (,០០០)ហិកតារ។ ប៉ុន្តែ​លោក ភី ហឿត អះអាង​ថា ​សព្វ​ថ្ងៃ​នៅ​តំបន់​បឹងទន្លេសាប​​​​ក្នុង​ខេត្ត​នេះ​​​ពុំ​មាន​​​ព្រៃ​ក្រាស​នោះ​ទេ ដោយ​​មាន​តែ​​​វាលស្មៅ និង​ដើម​ឈើ​​​ដុះ​​រដិបរដុប​រាយប៉ាយ​​ បណ្ដាល​ឱ្យ​​​សត្វ​ស្វា​គ្មាន​ទីជម្រក​ក្នុង​រដូវ​ប្រាំង ហើយ​​​ស្វា​ច្រើន​ក្បាល​បាន​មក​​រស់​នៅ​ក្នុង​ព្រៃ​សហគមន៍​របស់​លោក​ទៀត​ផង។លោក​​ថា កន្លង​មក​អាជ្ញាធរ​ពាក់ព័ន្ធ​បាន​ចុះ​ទៅ​ដល់​ទីកន្លែង​កើត​ហេតុ​ដែរ​ ក៏​ប៉ុន្តែ​ពុំ​មាន​​ចំណាត់​ការ​នោះ​ទេ ទើប​បណ្ដាល​ឱ្យ​ជនល្មើស​​​មិន​ខ្លាច​ច្បាប់​ ហើយ​នាំ​គ្នា​លួច​ដុត​ព្រៃ​យក​ដី​ជា​បន្ត​បន្ទាប់៕

ទិដ្ឋភាព​ភ្លើង​ឆេះ​ព្រៃ​លិច​ទឹក​នៅ​តំបន់​ទន្លេសាប ក្នុង​ឃុំ​ព្រែកហ្លួង ស្រុក​ឯកភ្នំ ខេត្ត​បាត់ដំបង ថ្ងៃ​ទី២៨ ខែ​មេសា ឆ្នាំ២០២០។ រូប៖ សហគមន៍​នេសាទ​ស្ដី​ក្រោម​រហាលសួង
ទិដ្ឋភាព​ភ្លើង​ឆេះ​ព្រៃ​លិច​ទឹក​នៅ​តំបន់​ទន្លេសាប ក្នុង​ឃុំ​ព្រែកហ្លួង ស្រុក​ឯកភ្នំ ខេត្ត​បាត់ដំបង ថ្ងៃ​ទី២៨ ខែ​មេសា ឆ្នាំ២០២០។ រូប៖ សហគមន៍​នេសាទ​ស្ដី​ក្រោម​រហាលសួង

ស្វា​នៅ​តំបន់​ព្រៃ​លិច​ទឹក​បឹង​ទន្លេសាប ក្នុង​ឃុំ​ព្រែកហ្លួង ស្រុក​ឯកភ្នំ ខេត្ត​បាត់ដំបង ថ្ងៃ​ទី២៨ ខែ​មេសា ឆ្នាំ២០២០ ដែល​ប្រឈម​នឹង​ភ្លើង​ឆេះ​ព្រៃ។ រូប៖ សហគមន៍​នេសាទ​ស្ដី​ក្រោម​រហាល​សួង
ស្វា​នៅ​តំបន់​ព្រៃ​លិច​ទឹក​បឹង​ទន្លេសាប ក្នុង​ឃុំ​ព្រែកហ្លួង ស្រុក​ឯកភ្នំ ខេត្ត​បាត់ដំបង ថ្ងៃ​ទី២៨ ខែ​មេសា ឆ្នាំ២០២០ ដែល​ប្រឈម​នឹង​ភ្លើង​ឆេះ​ព្រៃ។ រូប៖ សហគមន៍​នេសាទ​ស្ដី​ក្រោម​រហាល​សួង


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល