គ្រឹះស្ថានសិក្សានៅភ្នំពេញ និងខេត្តកណ្ដាល បានបើកដំណើរការវិញ ក្រោយពេលរដ្ឋាភិបាលប្រកាសបញ្ចប់ព្រឹត្តិការណ៍ ៣ វិច្ឆិកា។ មន្ត្រីក្រសួងអប់រំថា ដំណើរការបើកសាលាឡើងវិញនេះ ប្រព្រឹត្តិទៅដោយរលូន។
លោកនាយករដ្ឋមន្ត្រី ហ៊ុន សែន អះអាងនៅថ្ងៃទី១៤ វិច្ឆិកាថា លោក និងក្រុមគ្រួសារ ធ្វើតេស្តលើកទី៣ ប៉ុន្តែក្រុមគ្រូពេទ្យរកមិនឃើញ លោកមានជំងឺកូវីដ-១៩ (Covid-19) នោះទេ។
មន្ត្រីការបរទេស និងពាណិជ្ជកម្មនៃប្រទេសហុងគ្រី ថា ខាងមន្ត្រីរដ្ឋាភិបាលកម្ពុជា គឺជាអ្នកផ្ដួចផ្ដើមស្នើសុំមិនឲ្យពាក់ម៉ាស់ ក្នុងជំនួបផ្លូវការកាលពីថ្ងៃទី៣ ខែ វិច្ឆិកា។ ការធ្វេសប្រហែសនេះបណ្ដាលឲ្យខ្មែរបួននាក់បានឆ្លងជំងឺកូវីដ-១៩ និងមនុស្សជិតពីរពាន់នាក់ (១ ៦៧៥) ត្រូវក្រសួងសុខាភិបាលដាក់ឲ្យធ្វើចត្តាឡឺស័ករយៈពេល ១៤ ថ្ងៃ។
កងរាជអាវុធហត្ថខេត្តស្ទឹងត្រែង និងខេត្តក្រចេះ ចាប់ខ្លួនអ្នកសារព័ត៌មានក្នុងស្រុកម្នាក់ ពាក់ព័ន្ធនឹងករណីលួចដឹកឈើក្រញូង ចេញពីស្រុកសៀមប៉ាង ខេត្តស្ទឹងត្រែង ឆ្ពោះទៅខេត្តក្រចេះ។
