ក្រសួង​សុខាភិបាល​រក​ឃើញ​អ្នក​ដំណើរ​ជនជាតិ​អង់គ្លេស​ពីរ​នាក់​បន្ថែម​ទៀត​ផ្ទុក​ជំងឺ​កូវីដ-១៩

ដោយ អាស៊ីសេរី
2020-03-12
អ៊ីម៉ែល
មតិ
Share
បោះពុម្ព
នាវា វីគីង គ្រូស ជ្យូណី (Viking Cruise Journey) ដែល​ដឹក​អ្នក​ទេសចរ​ពី​ប្រទេស​វៀតណាម មក​សំចត នៅ​ខេត្ត​កំពង់ចាម ហើយ​ក្រសួងសុខាភិបាល​ធ្វើតេស្ត​រក​ឃើញ​មាន​អ្នក​ផ្ទុក​មេរោគ​វីរុស​បង្ក​ជំងឺ​កូវីដ-១៩ ចំនួន ៣នាក់ គិត​ត្រឹម​ថ្ងៃ​ទី១២ ខែ​មីនា ឆ្នាំ២០២០។
នាវា វីគីង គ្រូស ជ្យូណី (Viking Cruise Journey) ដែល​ដឹក​អ្នក​ទេសចរ​ពី​ប្រទេស​វៀតណាម មក​សំចត នៅ​ខេត្ត​កំពង់ចាម ហើយ​ក្រសួងសុខាភិបាល​ធ្វើតេស្ត​រក​ឃើញ​មាន​អ្នក​ផ្ទុក​មេរោគ​វីរុស​បង្ក​ជំងឺ​កូវីដ-១៩ ចំនួន ៣នាក់ គិត​ត្រឹម​ថ្ងៃ​ទី១២ ខែ​មីនា ឆ្នាំ២០២០។
រូប៖ ពី​ហ្វេសប៊ុក​ក្រសួង​សុខាភិបាល

ក្រសួងសុខាភិបាល រក​ឃើញ​អ្នក​ឆ្លង​ជំងឺ​កូវីដ-១៩ ពីរ​ករណី​បន្ថែម​ទៀត ​ក្នុង​ចំណោម​អ្នក​ដំណើរ ៦០នាក់ ដែល​ធ្វើ​ដំណើរ​តាម​នាវា​ទេសចរណ៍​មួយ​គ្រឿង​ឈ្មោះ វ៉ាយឃីង គូ្រស ជ្យូណី (Viking Cruise Journey) ដែល​ចាក​ចេញ​ពី​ប្រទេស​វៀតណាម ហើយ​បាន​ចូល​ចត​នៅ​ទី​រួម​ខេត្ត​កំពង់ចាម។ អ្នក​ជំងឺ​ទាំង​ពីរ​នាក់​នោះ​ជា​ជន​ជាតិ​អង់គ្លេស និង​ជា​ប្តី​ប្រពន្ធ​នឹង​គ្នា។

សេចក្ដី​ប្រកាស​ព័ត៌មាន​របស់​ក្រសួង​សុខាភិបាល​ នៅ​ថ្ងៃ​ទី១២ ខែ​មីនា ឲ្យ​ដឹង​ថា អ្នក​ជំងឺ​ជា​ប្តី មាន​អាយុ ៧៣ឆ្នាំ និង​ប្រពន្ធ​មាន​អាយុ ៦៩ឆ្នាំ ។ ការ​រក​ឃើញ​ជំងឺ​ផ្លូវ​ដង្ហើម​កូវីដ-១៩ បន្ថែម​ទៀត​នេះ បន្ទាប់​ពី​ក្រុម​គ្រូពេទ្យ បាន​យក​សំណាក​វត្ថុ​វិភាគ​របស់​អ្នក​ដំណើរ​លើ​នាវា វ៉ាយឃីង គូ្រស ជ្យូណី ចំនួន ៥៩នាក់ ទៅ​ពិនិត្យ​នៅ​វិទ្យាស្ថាន​ប៉ាស្ទ័រ ហើយ ជា​លទ្ធផល​គេ​រក​ឃើញ​មាន​វិជ្ជមាន​មេរោគ​កូរ៉ូណា​ថ្មី​ពី​នាក់​ប្ដី​ប្រពន្ធ​នេះ​បន្ថែម​ទៀត​។ បច្ចុប្បន្ន​អ្នក​ជំងឺ​ទាំង​ពីរ​នាក់​ប្តី​ប្រពន្ធ ត្រូវ​បាន​ដាក់​ឲ្យ​ស្ថិត​ក្នុង​បន្ទប់​ដាច់​ដោយ​ឡែក​ក្នុង​មន្ទីរ​ពេទ្យ​បង្អែក​ខេត្ត​កំពង់ចាម ដើម្បី​តាម​ដាន​សុខភាព​បន្ត ​ទៀត។

ប្រធានមន្ទីរ​ពេទ្យ​បង្អែក​ខេត្ត​កំពង់ចាម លោក​វេជ្ជបណ្ឌិត គឹម សួរភិរុណ ​ប្រាប់​អាស៊ី​សេរី​យ៉ាង​ខ្លី​ថា​ អ្នក​ជំងឺ​ទាំង​ពីរ​នាក់ ​នៅ​មាន​សុខភាព​ធម្មតា ​ហើយ​លោក​ មិន​ទាន់​ទទួល​បាន​ព័ត៌មាន​ ឬ​ការ​ស្នើ​សុំ​ឲ្យ​ បញ្ជូន​អ្នកជំងឺ​ទាំងពីរ​ទៅ​មន្ទីរ​ពេទ្យ​ក្នុង​ក្រុង​ភ្នំពេញ​នៅ​ឡើយ​ទេ៖ «ស្ថានភាព​ធម្មតា ហើយ​អត់​មាន​រោគ​សញ្ញា​អី​ប្លែក​ទេ ហើយ​ពួក​គាត់​កំពុង​តែ​សម្រាក​នៅ​ក្នុង​បន្ទប់​ដាច់​ដោយ​ឡែក នៅ​ក្នុង​មន្ទីរ​ពេទ្យ​ខេត្ត​កំពង់ចាម ហើយ​មាន​សម្ភារៈ​ការពារ​រួច​ហើយ»

គិត​មក​ដល់​ពេល​នេះ​ អ្នក​ឆ្លង​ជំងឺ​កូវីដ-១៩ ​លើ​នាវា វ៉ាយឃីង គូ្រស ជ្យូណី (Viking​ Cruise​ Journey) សរុបចំនួន ៣នាក់ហើយ សុទ្ធតែ​ជា​ជនជាតិ​អង់គ្លេស។ ស្ត្រី​ជនជាតិ​អង់គ្លេស ដែល​រក​ឃើញ​វិជ្ជមាន កូវីដ-១៩ ដំបូង​គេ កាល​ពី​ថ្ងៃ​ទី១០ ខែ​មីនា គឺ​អាយុ​៦៥​ឆ្នាំ ហើយកាលពីល្ងាចថ្ងៃទី១១ ខែ​មីនា ក្រសួង​សុខាភិបាល​បាន​បញ្ជូន​ស្ត្រី​ម្នាក់​នោះ  ចេញពី​មន្ទីរពេទ្យ​បង្អែក​ខេត្ត​កំពង់ចាម ទៅ​ព្យាបាល​នៅ​មន្ទីរពេទ្យ​ឯកជន​មួយ​ក្នុង​ក្រុង​ភ្នំពេញ។ ចំណែក​ពលរដ្ឋ​ខ្មែរ​ពីរ​នាក់​ដែល​ម្នាក់​ជា​ស្រ្តី​អ្នក​បក​ប្រែ និង​ម្នាក់​ជា​អ្នក​រត់​រ៉ឺម៉ក​ម៉ូតូ​កង់​បី ធ្លាប់​ដឹក​ស្ត្រី​អង់គ្លេស​រូប​នោះ លទ្ធផល​ធ្វើ​តេស្ត​របស់​ពួក​គេ​បង្ហាញ​ថា អវិជ្ជមាន ហើយ​គ្រូ​ពេទ្យ​អនុញ្ញាត​ឲ្យ​ទៅ​សម្រាក​នៅ​ផ្ទះ ប៉ុន្តែ​ត្រូវ​អនុវត្ត​វិធានការ​តាម​ដាន​សុខភាព​ផ្ទាល់​ខ្លួន​ជា​​បន្ត​ទៀត​ផង​ដែរ។

(កណ្ដាល​ឆ្វេង) លោក​វេជ្ជបណ្ឌិត ម៉ម ប៊ុនហេង រដ្ឋមន្ត្រី​ក្រសួង​សុខាភិបាល និង (កណ្ដាល​ស្ដាំ) អ្នកស្រី​វេជ្ជបណ្ឌិត ឱ វណ្ណឌីន អ្នក​នាំ​ពាក្យ​ក្រសួង​សុខាភិបាល ក្នុង​សន្និសីទ​សារព័ត៌មាន​អំពី​ជំងឺ​កូវីដ១៩ នៅ​ថ្ងៃ​ទី១០ ខែ​មីនា ឆ្នាំ២០២០។
(កណ្ដាល​ឆ្វេង) លោក​វេជ្ជបណ្ឌិត ម៉ម ប៊ុនហេង រដ្ឋមន្ត្រី​ក្រសួង​សុខាភិបាល និង (កណ្ដាល​ស្ដាំ) អ្នកស្រី​វេជ្ជបណ្ឌិត ឱ វណ្ណឌីន អ្នក​នាំ​ពាក្យ​ក្រសួង​សុខាភិបាល ក្នុង​សន្និសីទ​សារព័ត៌មាន​អំពី​ជំងឺ​កូវីដ១៩ នៅ​ថ្ងៃ​ទី១០ ខែ​មីនា ឆ្នាំ២០២០។ Photo Provided

អាស៊ី​សេរី មិន​អាច​សុំ​ការ​បញ្ជាក់​បន្ថែម​ពី​អ្នក​នាំ​ពាក្យ​ក្រសួង​សុខាភិបាល ​លោក ​លី ​សូវ៉ាន់ ​និង​អ្នកស្រី ឱ វណ្ណឌីន បាន​ទេ ដោយ​ទូរស័ព្ទ​ចូល​ពុំ​មាន​អ្នក​ទទួល។

នាវា​ទេសចរណ៍ ​ វ៉ាយឃីង ​គូ្រស​ជ្យូ​ណី​ (Viking​ Cruise​ Journey​)​ ​ផ្ទុក​ភ្ញៀវ​ទេសចរណ៍ ​និង​បុគ្គលិក​នាវា​ចំនួន ​៦០​នាក់ ដោយ​ធ្វើដំណើរ​ចេញ​មកពី​ទីក្រុង​ហូជីមិញ កាលពី​ថ្ងៃ​ទី​៥ ខែ​មីនា ហើយ​​មក​​ដល់​រាជធានី​ភ្នំពេញ​នៅ​ថ្ងៃ​ទី​៧ ខែ​មីនា និង​បាន​ហួស​ទៅ​ចូល​ចត​នៅ​ទី​រួម​ខេត្ត​កំពង់ចាម​។

មន្ត្រី​ផ្នែក​អង្កេត​នៃ​សមាគម​អាដហុក​ប្រចាំ​ខេត្ត​កំពង់ចាម និង​ត្បូង​ឃ្មុំ លោក ឡេង សេងហាន មាន​ប្រសាសន៍​ថា ​ក្រោយ​ពី​អាជ្ញាធរ​ជំនាញ​រក​ឃើញ​ករណី​ឆ្លង​ជំងឺ​កូវីដ-១៩​លើ​អ្នក​ទេសចរណ៍​បរទេស​ក្នុង​ខេត្ត​កំពង់ចាម​ជា​បន្តបន្ទាប់ គឺ​បាន​ធ្វើ​ឲ្យ​ប្រជាពលរដ្ឋ​ក្នុង​ខេត្ត​មួយ​នេះ​មាន​ការ​ព្រួយបារម្ភ​ខ្លាំង​អំពី​សុខភាព​ដូច​ពលរដ្ឋ​ក្នុង​ខេត្ត​ផ្សេងៗ ដែរ។ លោក ​សង្កេត​ឃើញ​ថា ​គ្រួសារ​នីមួយៗ បាន​នាំ​គ្នា​ទិញ​ស្បៀង​អាហារ​ស្តុក​ទុក ​ដើម្បី​ចៀសវាង​ការ​ទៅ​ផ្សារ​ញឹកញាប់ និង​កាត់​បន្ថយ​ហានិភ័យ​ ប៉ុន្តែ​ពួក​គេ ​រអ៊ូរទាំ​ថា​ ទំនិញ​គ្រប់​យ៉ាង​ឡើង​ថ្លៃ ​ហើយ​អាជ្ញាធរ ពុំ​បាន​យក​ចិត្ត​ទុក​ដាក់​ទប់​ស្កាត់​នោះ​ទេ។ ទន្ទឹម​គ្នា​នេះ លោក​ជំរុញ​ឲ្យ​អាជ្ញាធរ​ពាក់ព័ន្ធ​សហការ​គ្នា​ផ្សព្វផ្សាយ​ឲ្យ​បាន​ទូលំ​ទូលាយ​បន្ថែម​ទៀត ​ដល់​ពលរដ្ឋ​អំពី​គ្រោះថ្នាក់​នៃ​ជំងឺ​កូវីដ-១៩ ​និង​របៀប​ការពារ​សុខភាព ដោយ​មិន​អាច​ធ្វេសប្រហែស​បាន​ឡើយ៖ «ឥឡូវ​នេះ​ក្នុង​ក្រុង​ក្នុង​ខេត្ត​អី គឺ​គាត់​បាន​ជ្រួតជ្រាប​អស់​ហើយ តែ​នៅ​តាម​មូលដ្ឋាន​តំបន់​ដាច់​ស្រយាល គឺ​យើង​បារម្ភ​ខ្លាច​គាត់​អត់​ធ្វើ​អនាម័យ​ខ្លួន​ឯង ឲ្យ​បាន​ល្អ​ប្រសើរ​ទៅ​តាម​អ្វី​ដែល​ក្រសួង​សុខាភិបាល​បាន​ណែនាំ ។ មួយ​ទៀត​កុមារ​តូចៗ នៅ​តាម​សាលា​រៀន ក៏​ជា​ការ​ព្រួយ​បារម្ភ​ដែរ ព្រោះ​ជូន​កាល​បាន​ណែនាំ​តាម​សាលា​ដល់​អ្នក​គ្រូ លោក​គ្រូ​ហើយ ប៉ុន្តែ​ក្មេងៗ មិន​សូវ​ចាប់​អារម្មណ៍។ សូម​ក្រសួង​អប់រំ និង​ឪពុក​ម្តាយ ជួយ​បង្ហាត់​ក្មេង​ឲ្យ​ចេះ​អនាម័យ​លាង​ដៃ​ពេល​ទៅ​សាលា ក្រោយ​ចេញ​ពី​សាលា និង​ពេល​ចេញ​ពី​បង្គន់»

មក​ដល់​ពេល​នេះ កម្ពុជា​បាន​រក​ឃើញ​អ្នក​ឆ្លង​ជំងឺ​កូវីដ-១៩​ចំនួន ​៥​ករណី​ហើយ​ ក្នុង​នោះ​មាន ១ករណី​កើត​លើ​បុរស​ជនជាតិ​ខ្មែរ អាយុ​ ៣៨​ឆ្នាំ កំពុង​ដាក់​ព្យាបាល​ក្នុង​មន្ទីរ​បង្អែក​ខេត្ត​សៀមរាប។

កាល​ពី​ថ្ងៃ​ទី១១ ​ខែ​មីនា ​អង្គការ​សុខភាព​ពិភព​លោក​ បាន​ប្រកាស​ចាត់​ទុក​ជំងឺ​កូវីដ-១៩ ថា ជា​ជំងឺ​រាតត្បាត​សកល ​។

គិត​ត្រឹម​ថ្ងៃ​ទី១២ ខែ​មីនា មាន​អ្នក​ឆ្លង​ជំងឺ​កូវីដ-១៩ នៅ​លើ​ពិភពលោក​សរុប​ឡើង​ដល់​ជាង ១២ម៉ឺន ៦ពាន់​នាក់ (១២៦.៣៩២​នាក់) រីឯ​អ្នក​ស្លាប់ ក៏​ឡើង​ដល់​ជាង ៤ពាន់ ៦រយ​នាក់ (.៦៣៩​នាក់)

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល