សហគមន៍​ខេត្ត​ព្រះវិហារ​ជាង ៣០០​គ្រួសារ​ស្នើ​រក​ដោះស្រាយ​ជម្លោះ​ដីធ្លី បន្ទាប់​ពី​ក្រុមហ៊ុន​ចិន​ផ្អាក​ដំណើរការ

ដោយ អាស៊ីសេរី
2020-02-07
អ៊ីម៉ែល
មតិ
Share
បោះពុម្ព
ក្រុមហ៊ុន ហេង ហ្វូ (Hengfu Group Sugar Industry) នៅខេត្តព្រះវិហារ។ រូបថត កាលពីអំឡុងខែសីហា ឆ្នាំ ២០១៩។
ក្រុមហ៊ុន ហេង ហ្វូ (Hengfu Group Sugar Industry) នៅខេត្តព្រះវិហារ។ រូបថត កាលពីអំឡុងខែសីហា ឆ្នាំ ២០១៩។
Photo Provided

សហគមន៍​ជនជាតិ​ដើម​ភាគតិច​កួយ​ជាង ៣០០​គ្រួសារ (៣៦៧) រស់នៅ​ខេត្ត​ព្រះវិហារ​ស្នើ​ឱ្យ​រដ្ឋាភិបាល និង​ស្ថាប័ន​ពាក់ព័ន្ធ​ថ្នាក់​ខេត្ត ដោះស្រាយ​ជម្លោះដីធ្លី​រ៉ាំរ៉ៃ រវាង​ជនជាតិ​ដើម​ភាគតិច និង​ក្រុមហ៊ុន​ស្ករអំពៅ​ចិន រ៉ូយ ហ្វេង (Rui Feng) បន្ទាប់​ពី​ក្រុមហ៊ុន​ដ៏​ធំ​នេះ ផ្អាក​ដំណើរការ​អាជីវកម្ម​របស់​ខ្លួន​ទាំងស្រុង។ សហគមន៍​ថា ជម្លោះ​ដីធ្លី​នេះ​បាន​អូស​បន្លាយ​ពេល​ជិត ១០​ឆ្នាំ​មក​ហើយ ធ្វើ​ឱ្យ​អ្នកភូមិ​រាប់​រយ​គ្រួសារ រង​ទុក្ខ​វេទនា បាត់បង់​ដី​កសិកម្ម ព្រៃ​ជំនឿ ទឹក ​បឹង​ធម្មជាតិ និង​ដើមឈើ​ផលិត​ជ័រទឹក​ជាដើម។

ជនជាតិ​ដើម​ភាគតិច​កួយ​ជាង ៣០០​គ្រួសារ (៣៦៧) រស់នៅ​ភូមិ​ប្រមេរ ឃុំ​ប្រមេរ ស្រុក​ត្បែងមានជ័យ​អំពាវនាវ​ជា​ថ្មី​ទៀត ឱ្យ​រដ្ឋាភិបាល និង​អាជ្ញាធរ​ពាក់ព័ន្ធ​ថ្នាក់​ខេត្ត ដោះស្រាយ​ជម្លោះដីធ្លី​រ៉ាំរ៉ៃ​ជាមួយ​ក្រុមហ៊ុន​ស្ករអំពៅ​ចិន រ៉ូយ ហ្វេង ដើម្បី​ឱ្យ​ពួកគេ​មាន​លទ្ធភាព​ទទួល​បាន​ដី​កសិកម្ម​ពី​ក្រុមហ៊ុន​មកវិញ បង្កបង្កើនផល​ចិញ្ចឹម​ជីវិត។ ការ​អំពាវនាវ​នេះ ធ្វើឡើង បន្ទាប់​ពី​ក្រុមហ៊ុន​ស្ករអំពៅ​ចិន​ឈ្មោះ រ៉ូយ ហ្វេង (Rui Feng) ដែល​ជា​បុត្រ​សម្ព័ន្ធ​ក្រុមហ៊ុន ៤​ផ្សេងទៀត ក្នុង​ខេត្ត​ព្រះវិហារ បាន​បិទ​ដំណើរការ​អាជីវកម្ម​របស់​ខ្លួន នៅ​រយៈពេល​ប៉ុន្មាន​ខែ​ចុង​ក្រោយ​នេះ។

ជនជាតិ​ដើម​ភាគតិច​កួយ​ម្នាក់ ក្នុងចំណោម​ពលរដ្ឋ​ជាច្រើន​ទៀត លោកស្រី ស៊ីង សាំ ឱ្យ​ដឹង​នៅ​ថ្ងៃ​ទី៦ កុម្ភៈ​ថា ក្រុមហ៊ុន​ស្ករអំពៅ​ចិន បាន​រំលោភ​យក​ដីស្រែ​របស់​គ្រួសារ​លោកស្រី​អស់ ៧​ហិកតារ តាំង​ពី​ឆ្នាំ ២០១២ មក​ទល់​ពេល​នេះ​មិន​ទាន់​ត្រូវ​បាន​អាជ្ញាធរ​ដោះស្រាយ​នៅឡើយ​ទេ ហើយ​សហគមន៍​ភូមិ​ប្រមេរ បាន​ស្រែក​តវ៉ា និង​ផ្តិត​មេដៃ​ប្តឹង​ដាក់​ញត្តិ សុំ​កិច្ច​អន្តរាគមន៍​ទៅ​អាជ្ញាធរ​ថ្នាក់​ជាតិ​គ្រប់​ស្ថាប័ន តែ​គ្មាន​លទ្ធផល​។ លោកស្រី​បន្ថែម​ថា ក្រុមហ៊ុន​ចិន រ៉ូយ ហ្វេង បាន​ផ្អាក​ដំណើរការ​ប្រហែល ជាង ២​ខែ​មក​ហើយ មិន​ឃើញ​កម្មករ​ក្រុមហ៊ុន​ឈូស​ឆាយ ដាំ​អំពៅ និង​ស្រូវ​ទៀត​ទេ ហើយ​លោកស្រី ចង់​ឱ្យ​អាជ្ញាធរ​ប្រគល់​ដី ដែល​ក្រុមហ៊ុន​រំលោភ​យក ជូន​សហគមន៍​អាស្រ័យ​ផល​វិញ​៖ «គ្មាន​ដោះស្រាយ​ទេ តាំងពី​ឆ្នាំ​២០១២ រហូតដល់​ឆ្នាំ ២០២០​ហ្នឹង​មិន​ទាន់​មាន​ដំណោះស្រាយ​ទេ​។ អាជ្ញាធរ​មិន​យកចិត្តទុកដាក់​ទេ​។ ខ្ញុំ​សំណូមពរ​ឱ្យ​រដ្ឋាភិបាល និង​អង្គការ​ពាក់ព័ន្ធ​នានា ជួយ​ឱ្យ​រដ្ឋាភិបាល​ជួយ​ដោះស្រាយ​កាត់​ដី​ពី​ក្រុមហ៊ុន​ឱ្យ​ពលរដ្ឋ​វិញ ឱ្យ​បាន​យើងខ្ញុំ​ធ្វើស្រែ ព្រោះ​សព្វថ្ងៃ​ពួក​ខ្ញុំ​គ្មាន​រំពឹង​អី​ទេ មានតែ​ដី​ធ្វើស្រែ មានតែ​ចម្ការ​ហ្នឹង បើ​អត់​ដី​ធ្វើស្រែ ចម្ការ​ហើយ គ្មាន​ចេះ​រក​អី​ទេ»

ទីប្រឹក្សា​សហគមន៍​ជនជាតិ​ដើម​ភាគតិច​កួយ ភូមិ​ប្រមេរ អ្នកស្រី ទេព ទឹម ធ្លាប់​បាន​លើកឡើង​ថា ជនជាតិ​ដើម​ភាគតិច​កួយ ក្នុង​ឃុំ​ប្រមេរ ជាង ៧០០​គ្រួសារ ស្មើ​និង​ជាង ២​ពាន់ ៤​រយ​នាក់ (២៤២៤) បាន​បាត់បង់​សិទ្ធិ​ប្រើប្រាស់​ដីធ្លី​ជា​សមូហភាព ការ​គ្រប់គ្រង​ដី និង​ធនធាន​ធម្មជាតិ ជាច្រើន​ឆ្នាំ​មក​ហើយ ដោយសារ​ការ​រំលោភ​បំពាន​ធ្ងន់ធ្ងរ ពី​សំណាក់​ក្រុមហ៊ុន​ស្ករអំពៅ​ចិន​។ អ្នកស្រី​បន្ថែម​ថា ដី​ព្រៃ​ឈើ ដីភ្នំ ខឿន​ប្រាសាទ​បុរាណ ទឹក​បឹង និង​អូរ​ធម្មជាតិ​ជា​កន្លែង​ពួកគេ​អាស្រ័យ​ផល​ច្រើន​ជំនាន់​មក​ហើយ បាន​ក្លាយ​ជា​ចម្ការ​អំពៅ​របស់​ក្រុមហ៊ុន​ចិន​។ ហេតុនេះ​ពួកគេ​ទាមទារ​ឱ្យ​រដ្ឋាភិបាល​ដកហូត​ដី​ទាំងនោះ ដើម្បី​ចុះបញ្ជី​សមូហភាព​ជូន​សហគមន៍​ប្រើប្រាស់​៖ «រដ្ឋាភិបាល​មិន​ទាន់​បាន​ដោះស្រាយ វិវាទ​ដីធ្លី​ក្នុង​ដី​សម្បទាន​សេដ្ឋកិច្ច​ដំណាំ​អំពៅ ផលិត​ស្ករស នាំចេញ​ទេ​។ ពលរដ្ឋ​ប្រឈម ជាមួយ​ក្រុមហ៊ុន​ចិន​ទូទាំង​ឃុំ​ទាំងអស់​គ្នា​តែម្ដង ប៉ះពាល់​ព្រៃ​ជំនឿ ឈូស​ឆាយ​ខឿន ប្រាសាទ លុប​ត្រពាំង​បឹងបួរ ធ្វើ​ឱ្យ​បាត់បង់​ភូមិ​បុរាណ និង​ធនធានធម្មជាតិ​ជាច្រើន​»

អាស៊ីសេរី​បាន​ព្យាយាម​ទាក់ទង អភិបាលខេត្ត​ព្រះវិហារ លោក ប្រាក់ សុវណ្ណ នាយ​រដ្ឋបាល​សាលាខេត្ត លោក យ៉ុង គឹមហឿង និង​ប្រធាន​មន្ទីរ​កសិកម្ម លោក ពឹង ទ្រីដា ដើម្បី​សុំ​ការ​បំភ្លឺ​រឿង​នេះ តែ​ទូរស័ព្ទ​ហៅ​ចូល​ច្រើនដង​គ្មាន​អ្នក​ទទួល នៅ​ថ្ងៃ​ទី៦ កុម្ភៈ។ ចំណែក​ភាគី​ក្រុមហ៊ុន​ក៏​មិន​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

មេឃុំ​ប្រមេរ លោក ធាង ហេង ប្រាប់​អាស៊ីសេរី​ថា ក្រុមហ៊ុន​ស្ករអំពៅ​ចិន បាន​ផ្អាក​ដំណើរការ​មួយ​រយៈ​ហើយ មិន​ឃើញ​កម្មករ​ធ្វើការ​ក្នុង​ការដ្ឋាន​ទេ។ លោក​ថា ដើម​អំពៅ​ភាគច្រើន​ក្នុង​ផ្ទៃដី​របស់​ក្រុមហ៊ុន ត្រូវ​បាន​ភ្លើង​ឆេះ​អស់​ស្ទើរ​ទាំងស្រុង ហើយ​អាជ្ញាធរ​ឃុំ​បាន​រាយការណ៍​បញ្ហា​នេះ​ជូន​ថ្នាក់លើ​រួចហើយ​។ ចំណែក​ជម្លោះដីធ្លី​រវាង​សហគមន៍ និង​ក្រុមហ៊ុន ជា​ភារកិច្ច​ដោះស្រាយ​របស់​អាជ្ញាធរ​ថ្នាក់​ខេត្ត និង​ថ្នាក់​ជាតិ​៖ «ខ្ញុំ​គ្រាន់តែ​រាយការណ៍​ទេ យើង​មិនមែន​ជា​អ្នកគ្រប់គ្រង​កន្លែង​គេ​។ វា​ដូច​ដាច់​គ្នា យើង​រាយការណ៍​ទៅលើ​ហើយ​ទៅលើ​ថា វា​ឆេះ​ចម្ការ មិនដឹង​ថា ក្រុមហ៊ុន​ដុត ឬមួយ​ពលរដ្ឋ​ដុត​អាជ្ញាធរ​មិន​ដឹង​ដែរ»

និមិត្ត​សញ្ញាក្រុមហ៊ុន ហេង ហ្វូ (Hengfu Group Sugar Industry) នៅខេត្តព្រះវិហារ។ រូបថត កាលពីអំឡុងខែសីហា ឆ្នាំ ២០១៩។
និមិត្ត​សញ្ញាក្រុមហ៊ុន ហេង ហ្វូ (Hengfu Group Sugar Industry) នៅខេត្តព្រះវិហារ។ រូបថត កាលពីអំឡុងខែសីហា ឆ្នាំ ២០១៩។ Photo Provided

ក្រុមហ៊ុន​សម្បទាន​សេដ្ឋកិច្ច ហេង ហ្វូ (Hengfu Group Sugar Industry) ទទួល​សិទ្ធិ​វិនិយោគ​ពី​រដ្ឋាភិបាល​លើ​ផ្ទៃដី​ទំហំ​ជាង ៤២.០០០​ហិកតារ តាំងពី​ឆ្នាំ​២០១១ វិនិយោគ​ដាំ​អំពៅ និង​កៅស៊ូ​។ ក្រុមហ៊ុន​នេះ ជា​ក្រុមហ៊ុន​មេ និង​មាន​បុត្រ​សម្ព័ន្ធ​ក្រុមហ៊ុន​ចំនួន ៥​ទៀត ដូចជា ក្រុមហ៊ុន ឡាន ហ្វេង (Lan Feng) ក្រុមហ៊ុន រួយ ហ្វេង (Rui Feng) ក្រុមហ៊ុន ហេង ណុង (Heng Non) ក្រុមហ៊ុន ហេង រួយ (Heng Rui) និង​ក្រុមហ៊ុន ហេង យូ (Heng Yue)

មន្ត្រី​តស៊ូ​មតិ​នៃ​អង្គការ​ពន្លក​ខ្មែរ លោក ប៉ឹក សោភ័ណ ថ្លែង​ថា ក្រុមហ៊ុន​ស្ករអំពៅ​ចិន រ៉ួយ ហ្វេង (Rui Feng) បាន​ផ្អាក​ប្រតិបត្តិការ​របស់​ខ្លួន និង​មាន​ការដ្ឋាន​ខ្លះ លក់​សម្ភារៈ​អស់​មួយ​ចំនួន​ហើយ​។ រីឯ​កម្មករ ក៏​មិន​ឃើញ​មាន​វត្តមាន​ក្នុង​ការដ្ឋាន​របស់​ក្រុមហ៊ុន​ដែរ​។ លោក​ស្នើ​ឱ្យ​រដ្ឋាភិបាល និង​អាជ្ញាធរ​ខេត្ត​គួរ​ពិនិត្យឡើងវិញ ករណី​ជម្លោះដីធ្លី​រ៉ាំរ៉ៃ​រវាង​ពលរដ្ឋ និង​ក្រុមហ៊ុន ដើម្បី​រក​យុត្តិធម៌​តាម​ផ្លូវ​ច្បាប់​ជូន​សហគមន៍ ដែល​ទាមទារ​ច្រើន​ឆ្នាំ​មក​ហើយ​នោះ​៖ «អាជ្ញាធរ ឬក៏​រដ្ឋាភិបាល លោក​គួរ​ពិនិត្យ​ឡើង​វិញ មើល​ពី​ជម្លោះដីធ្លី​រវាង​ពលរដ្ឋ ជាមួយ​ក្រុមហ៊ុន​ហ្នឹង អាច​ដោះស្រាយ​បាន​ដោយ​វិធី​ណា ដើម្បី​បំពេញ​សេចក្ដី​ត្រូវការ​របស់​ពលរដ្ឋ​សហគមន៍​ជាពិសេស​ជនជាតិ​ដើម​ភាគតិច​ដែល​គាត់​ទាមទារ​ជាច្រើន​ឆ្នាំ​ហើយ​មក​ហើយ​នោះ​។ អ៊ីចឹង​គួរតែ​ពិនិត្យមើល ដើម្បី​ផ្ដល់​ដី​ហ្នឹង​ឱ្យ​គាត់​វិញ»

មន្ត្រី​សង្គម​ស៊ីវិល និង​សហគមន៍​សង្កេត​ឃើញ​ថា ចាប់​តាំង​ពី​មាន​វត្តមាន​ក្រុមហ៊ុន​ស្ករអំពៅ​ចិន​ទទួល​សិទ្ធិ​វិនិយោគ​លើ​ផ្ទៃដី​ជាង ៤​ម៉ឺន​ហិកតារ តាំងពី​ឆ្នាំ ២០១១​មក ជម្លោះ​ដី​ធ្លី បាន​ផ្ទុះឡើង រវាង​ក្រុមហ៊ុន និង​ពលរដ្ឋ​ជនជាតិ​ដើម​ភាគតិច​កួយ​រាប់ពាន់​គ្រួសារ រស់នៅ​ក្នុង​ស្រុក​ចំនួន​៣ គឺ​ស្រុក​ជ័យសែន ស្រុក​ឆែប និង​ស្រុក​ត្បែងមានជ័យ។ សហគមន៍​ថា ភូមិកំណើត​របស់​ពួកគេ​ភាគច្រើន ដែល​ធ្លាប់​គ្រប់​ដណ្ដប់​ដោយ​ព្រៃស្រោង​ផ្ដល់​ម្លប់​បៃតង​ស្រស់​ស្អាត បាន​ប្រែ​ក្លាយ​ជា​ចម្ការ​អំពៅ​របស់​ក្រុមហ៊ុន​ចិន​ហ៊ុមព័ទ្ធ សូម្បីតែ​វាលស្មៅ​សម្រាប់​ឃ្វាលគោ​ក្របី ក៏​បាត់បង់​ស្ទើរ​ទាំងស្រុង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល