អ្នកវិភាគ​ថា របប​ភ្នំពេញ​កំពុង​ស្វែងរក​ភាព​កក់ក្ដៅ​ពី​ចិន​ដើម្បី​ទប់​សម្ពាធ​ពី​លោក​ខាងលិច

ដោយ ថន ថារ៉ូ
2019-09-25
អ៊ីម៉ែល
មតិ
Share
បោះពុម្ព
អ្នក​វិភាគ​ឯករាជ្យ បណ្ឌិត ឡៅ ម៉ុងហៃ ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​២៩ ខែ​សីហា ឆ្នាំ​២០១៧។
អ្នក​វិភាគ​ឯករាជ្យ បណ្ឌិត ឡៅ ម៉ុងហៃ ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​២៩ ខែ​សីហា ឆ្នាំ​២០១៧។
Photo: RFA

អ្នកវិភាគ​នយោបាយ និង​សង្គម លើកឡើង​ថា របប​ក្រុង​ភ្នំពេញ​កំពុង​ស្វែងរក​ភាព​កក់ក្តៅ​ពី​ប្រទេស​ចិន ដើម្បី​ទប់ទល់​នឹង​សម្ពាធ​នានា​ពី​សហគមន៍​អន្តរជាតិ និង​ជាពិសេស​ចំ​ពេល​ថ្នាក់​ដឹកនាំ​គណបក្ស​សង្គ្រោះជាតិ ប្រកាស​រួម​កម្លាំង​គ្នា​វិល​ចូល​ស្រុក​វិញ។ ការ​លើក​ឡើង​នេះ បន្ទាប់ពី​រដ្ឋមន្ត្រី​ក្រសួង​ការពារ​ជាតិ​របស់​ចិន​បាន​ប្រាប់​ក្រុម​ប្រតិភូ​កម្ពុជា​ដែល​កំពុង​បំពេញ​ទស្សនកិច្ច​នៅ​ប៉េកាំង​ថា ចិន​គាំទ្រ​ពេញទំហឹង​ចំពោះ​អ្វី​ដែល​របប​ក្រុងភ្នំពេញ​កំពុង​ធ្វើ។

អ្នកវិភាគ​នយោបាយ​ដែល​របប​ក្រុងភ្នំពេញ​តាម​ចាប់​ដាក់​ពន្ធនាគារ លោក គឹម សុខ បញ្ចេញ​ទស្សនៈ​ថា របប​ក្រុងភ្នំពេញ កំពុង​ស្វះ​ស្វែងរក​ភាព​កក់ក្តៅ​ពី​ប្រទេស​ចិន​ក្នុង​ពេល​ស្ថានភាព​នយោបាយ​កម្ពុជា​កំពុង​តានតឹង ហើយ​ប្រទេស​មហាអំណាច​ចិន​វិញ កំពុង​ឆក់​ឱកាស​សម្ដែង​ការ​គាំទ្រ​របប​ក្រុងភ្នំពេញ​គ្រប់​យ៉ាង ដើម្បី​ទទួល​បាន​ផលប្រយោជន៍​ពង្រឹង និង​ពង្រីក​យុទ្ធសាស្ត្រ​ក្នុង​តំបន់។

លោក គឹម សុខ បន្ត​ថា របប​ក្រុងភ្នំពេញ មិនសូវ​ទុកចិត្ត​លើ​កងកម្លាំង​ប្រដាប់​របស់​ជាតិ​នោះ​ទេ នៅ​ពេល​ប្រធាន​ស្តីទី​គណបក្ស​សង្គ្រោះ​ជាតិ លោក សម រង្ស៊ី អំពាវនាវ​ម្ដង​ហើយ​ម្ដងទៀត​ឲ្យ​កង កម្លាំង​ប្រដាប់អាវុធ​ទាំងអស់​ផ្តាច់​ខ្លួន​ពី​របប​លោក ហ៊ុន សែន ហើយ​ចូលរួម​ជា​ធ្លុង​មួយ​ជាមួយ​ប្រជាពលរដ្ឋ ដើម្បី​ទាមទារ​សេរីភាព​យុត្តិធម៌ និង​លទ្ធិប្រជាធិបតេយ្យ៖ «សហរដ្ឋអាមេរិក បាន​ដាក់​ឯកអគ្គរដ្ឋទូត​របស់​ខ្លួន​ថ្មី​នៅ​ទីក្រុង​ភ្នំពេញ ដែល​វា​ជា​ការ​បង្ហាញ​ពី​ការ​យកចិត្តទុកដាក់​របស់​សហរដ្ឋអាមេរិក​ក្នុង​ស្ថានភាព កម្ពុជា​កំពុង​ជាប់​គាំង​នយោបាយ​ដូច្នេះ​ហើយ​តាម​ចរន្ត​នៃ​សហគមន៍​អន្តរជាតិ​លោក​សេរី គឺ​កម្ពុជា​នឹង​មាន​ការប្រែប្រួល​ខ្លះ​រឿង​ស្ថានការណ៍​នយោបាយ​ចាប់ពី​នេះ​ទៅ​រយៈពេល ៥​ខែ​ទៀត។ ក្នុង​ស្ថានភាព​ប្រែប្រួល​នេះ​អ្វី​ដែល​ចិន​ចង់​បង្ហាញ​ប្រាប់​ក្រុម​លោក ហ៊ុន សែន ថា បើ​ទោះ​បី​ជា​ក្រុម​លោក ហ៊ុន សែន សម្រេច​រក​ច្រកចេញ​ក្នុង​ផ្នែក​នយោបាយ​ក្នុង​កម្រិត​ណា​ក៏​ដោយ ចិន​នៅតែ​ធ្វើជា មិត្ត​គ្រប់​យុទ្ធសាស្ត្រ​ហើយ​ចង់​ចិត្ត​ក្រុម​លោក ហ៊ុន សែន ឲ្យ​សហការ​ជាមួយ​ចិន​គ្រប់​ទម្រង់​ទាំងអស់ ​ដើម្បី​ដំណើរ​ផលប្រយោជន៍​របស់​ចិន​ផង និង​ផលប្រយោជន៍​ការពារ​អំណាច​របស់​លោក ហ៊ុន សែន​ផង»

ប្រព័ន្ធ​ឃោសនា​របប​ក្រុងភ្នំពេញ​ផ្សាយ​ថា រដ្ឋមន្ត្រី​ក្រសួងការពារជាតិ​ចិន លោក វ៉ៃ ហ្វេងហ៊ី (Wei Feng He) ប្រកាស​ថា ភាគី​ចិន នៅតែ​បន្ត​គាំទ្រ​យ៉ាង​ពេញទំហឹង​នូវ​រាល់​អ្វី​ដែល​របប​លោក ហ៊ុន សែន កំពុងតែ​អនុវត្ត ពិសេស​ពាក់ព័ន្ធ​ជាមួយ​ការ​ការពារ​អ្វី​ដែល​ជា​ផលប្រយោជន៍​ស្របច្បាប់​របស់​កម្ពុជា​ខ្លួនឯង​។ ប្រមុខ​ការពារ​ជាតិ​ចិន​បញ្ជាក់​បែបនេះ​ទៅកាន់ អគ្គនាយក​នៃ​អគ្គនាយកដ្ឋាន នយោបាយ និង​កិច្ចការ​បរទេស​ក្រសួងការពារជាតិ នាយ​ឧត្ដមសេនីយ៍ ណឹម សុវត្ថិ ដែល​កំពុង​បំពេញ​ទស្សនកិច្ច​នៅ​ប្រទេស​ចិន​រយៈពេល​៥​ថ្ងៃ ចាប់ពី​ថ្ងៃ​ទី​២២ ដល់​ថ្ងៃ​ទី២៧ ខែ​កញ្ញា ដើម្បី​ពង្រឹង និង​ពង្រីក​កិច្ច​សហប្រតិបត្តិ​ការ​កម្ពុជា​-​ចិន ពិសេស​លើ​ផ្នែក​យោធា​។ ក្នុង​ឱកាស​នោះ ភាគី​កម្ពុជា​-​ចិន បាន​ឯកភាព​គ្នា ផ្លាស់ប្ដូរ​គណៈប្រតិភូ យោធា​ជាន់ខ្ពស់ រួម​ទាំង​ការ​បណ្ដុះបណ្ដាល​ធនធាន មនុស្ស និង​ការ​ធ្វើ​សមយុទ្ធ ឬ​លំហាត់​យោធា រួមគ្នា​ជាដើម។

អ្នកវិភាគ​នយោបាយ​ចាស់​វស្សា លោក បណ្ឌិត ឡៅ ម៉ុងហៃ បាន​និយាយ​យ៉ាង​ខ្លី​ថា ថ្នាក់ដឹកនាំ​ចិន​តែងតែ​ប្រកាស​គាំទ្រ​រដ្ឋាភិបាល​ខ្មែរ​ជានិច្ច ហើយ​ការប្រកាស​ជាថ្មី​ទៀត​នេះ គឺ​កាន់តែ​ធ្វើ​ឲ្យ រដ្ឋាភិបាល​ខ្មែរ​មានការ​កក់ក្ដៅ ក្នុង​ពេល​កំពុង​រង​សម្ពាធ​នានា​ពី​ក្រុម​ប្រទេស​ប្រជាធិបតេយ្យ។

កាលពី​ចុងខែ​កក្កដា​កន្លង​ទៅ លោក ហ៊ុន សែន បាន​ទម្លាយ​ថា លោក​បាន​ចំណាយ​ថវិកា​ទិញ​សព្វាវុធ​ថ្មី​ជិត ៤០​លាន​ដុល្លារ​អាមេរិក​ពី​ប្រទេស​ចិន ដើម្បី​ពង្រឹង​សមត្ថភាព​កងទ័ព និង​ការពារ​ជាតិ។

ទោះយ៉ាងណា លោក សម រង្ស៊ី ធ្លាប់​លើកឡើង​ថា ការ​ចំណាយ​ប្រាក់​ដល់​ទៅ​ជិត ៤០​លាន​ដុល្លារ​ដើម្បី​ទិញ​អាវុធ​ពី​ចិន នឹង​នាំមក​នូវ​គ្រោះថ្នាក់​ពីរ​យ៉ាង​សម្រាប់​កម្ពុជា​។ គ្រោះថ្នាក់​ទី​១ លោក សម រង្ស៊ី ថា គឺជា​ការ​ប្រើ​កម្លាំងយោធា និង​គ្រឿងសាស្ត្រាវុធ​ពី​ចិន ដើម្បី​បង្ក្រាប​ប្រជាពលរដ្ឋ ដែល​ប្រឆាំង​របប​លោក ហ៊ុន សែន​។ រីឯ គ្រោះថ្នាក់​ទី​ពីរ លោក សម រង្ស៊ី ផ្ដល់​អំណះអំណាង​ថា ជា​ការ​ធ្វើ​ឱ្យ​ស្ថានការណ៍​នយោបាយ និង​យោធា​កាន់តែ​តានតឹង​ឡើង​ក្នុង​តំបន់​អាស៊ីអាគ្នេយ៍ ដោយសារតែ​លោក ហ៊ុន សែន គាំទ្រ​នយោបាយ​វាតទី​និយម​របស់​ចិន។

អ្នកវិភាគ​លើកឡើង​ថា របប​ក្រុងភ្នំពេញ គួរតែ​រក្សា​ឯករាជ្យភាព​របស់​ខ្លួន និង​មាន​ទំនាក់ទំនង​យោធា​ដោយ​ស្មើភាព​ជាមួយ​ប្រទេស​ដទៃ​ទៀត ព្រមទាំង​ខិតខំ​ដោះស្រាយ​វិបត្តិ​នយោបាយ​ក្នុង ប្រទេស ដើម្បី​កុំ​ឲ្យ​ធ្លាក់​ខ្លួន​ចូល​ដៃ​បម្រើ​នយោបាយ​ឈ្លានពាន​របស់​ចិន និង​បញ្ចៀស​កុំ​ឲ្យ​មាន​ព្រឹត្តិការណ៍​បង្ហូរ​ឈាម​រវាង​ជាតិ​សាសន៍​ខ្មែរ​គ្នា​ឯង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Beijing govm't raising red alarm with frugal economic and lost in trillions $$ under Xi's regime

China communist govm't crisis getting red alerts with facing many national issues at home and abroad.and millions of Chinese workers had been laid off in recent months and so on.It's facing economic recession after last decade by under Xi's govm't regime,many big corporate businesses filed a bankruptcy court,China's currency business index getting blitzed to avoid its Yun to compete business on abroad by reducing its trade valued to lower rated.Millions of Chinese workers are facing mortgage loaned,apartment,car,micro-business+others.And Xi himself faces trade war with u.s,China frugal economics,crisis at home,crisis with Hong Kong,Taiwan,south China sea territorial dispute,and crisis secret built NAVAL base in Cambodia and much more.

Sep 25, 2019 02:21 PM

គេហទំព័រ​ទាំងមូល