លោក សម រង្ស៊ី អះអាង​ថា បាន​ទិញ​សំបុត្រ​យន្តហោះ​ថ្មី​រួចហើយ​ដើម្បី​ទៅ​កម្ពុជា​ឆាប់ៗ​ នេះ

ដោយ មួង ណារ៉េត
2019-11-08
អ៊ីម៉ែល
មតិ
Share
បោះពុម្ព
អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី ថ្លែង​សារ​នៅ​ថ្ងៃ​ទី​២៧ ខែ​សីហា ឆ្នាំ​២០១៧។ Photo courtesy of Sam Rainsy's Facebook Page
អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី ថ្លែង​សារ​នៅ​ថ្ងៃ​ទី​២៧ ខែ​សីហា ឆ្នាំ​២០១៧។ Photo courtesy of Sam Rainsy's Facebook Page
Photo courtesy of Sam Rainsy's Facebook Page

លោក សម រង្ស៊ី ប្រធាន​ស្ដីទី​គណបក្ស​សង្គ្រោះជាតិ អះអាង​ប្រាប់​អាស៊ីសេរី កាលពី​យប់​ថ្ងៃ​ទី៧ ខែ វិច្ឆិកា ថា លោក​បាន​ទិញ​សំបុត្រ​យន្តហោះ​ថ្មី​រួចហើយ ក្នុង​គម្រោង​វិលត្រឡប់​ទៅ​ប្រទេស​កម្ពុជា​វិញ​ឆាប់ៗ​នេះ ឱ្យ​ស្រប​ទៅ​នឹង​គម្រោង​ដែល​លោក​បាន​ប្រកាស​​ថា នឹង​វិល​ទៅ ប្រទេស​កម្ពុជា​នៅ​ថ្ងៃ​ទី ៩ ខែ វិច្ឆិកា​នោះ។

សំបុត្រ​យន្តហោះ ដែល​លោក សម រង្ស៊ី អះអាង​ថា បាន​ទិញ​ថ្មី​នោះ គឺ​លោក​ថា ទិញ​រហូតដល់​ទៅ​ពីរ​សន្លឹក ដើម្បី​ខ្លាច​ខកខាន​មិនបាន​ធ្វើ​ដំណើរ​ទៅ​កម្ពុជា ដូច​ការ​គ្រោងទុក៖ «សំបុត្រ​ដែល​ខ្ញុំ​ទិញ ខ្ញុំ​ទិញ​រហូតដល់​ពីរ បើ​ថា​វា​លួច​កែ​សំបុត្រ​ខ្ញុំ​មួយ ខ្ញុំ​មាន​សំបុត្រ​មួយទៀត ដែល​ខ្ញុំ​លាក់ មិន​ឱ្យ​ដឹង​លេខ​ប៉ុន្មាន​ទេ»

ការណ៍​ដែល​សុំ​លាក់​មិន​ឱ្យ​ដឹង​លេខ​សំបុត្រ​ម្តង​​នេះ គឺ​មកពី​លោក សម រង្ស៊ី ថា​លោក​មិន​ចង់​បង្ហាញ​នាំ​ឱ្យ​ខូច​ការណ៍ ដូច​កាល​សំបុត្រ​លើក​មុន ដែល​លោក​ទិញ​ពី​ក្រុមហ៊ុន​អាកាសចរណ៍​ថៃ ដែល​ធ្វើ​ឱ្យ​គេ​អាច​ចូល​លួច​កែ​បាន។

លោក សម រង្ស៊ី ត្រូវ​ខក​ជើង​យន្តហោះ កាល​ពី​ថ្ងៃទី៧ ខែ វិច្ឆិកា​ម្សិលមិញ ដោយសារតែ​ក្រុមហ៊ុន​អាកាសចរណ៍​ស៊ីវិល​ថៃ (Thai Airways) មិន​អនុញ្ញាត​ឱ្យ​លោក​ឡើង​ជិះ​យន្តហោះ ឆ្ពោះ​ទៅ​ទីក្រុង​បាងកក​ប្រទេស​ថៃ។ សារព័ត៌មាន AP ថា​មូលហេតុ​ដែល​ក្រុមហ៊ុន​អាកាសចរណ៍​ថៃ មិន​ព្រម​ដឹក​លោក សម រង្ស៊ី ពី​ទីក្រុង​ប៉ារីស ទៅកាន់​ទីក្រុង​បាងកក​នោះ គឺ​ដោយសារតែ​ការ​កក់​សំបុត្រ​យន្តហោះ ធ្វើ​មិន​បាន​ត្រឹមត្រូវ​។ ទោះជា​យ៉ាង​ក្តី ប្រភព​ដដែល ដកស្រង់​សម្ដី​បុគ្គលិក​ក្រុមហ៊ុន​នេះ ថា​សំបុត្រ​ថ្មី​ដែល​មាន​ឈ្មោះ​លោក សម រង្ស៊ី ត្រូវ​បាន​កក់​រួចហើយ សម្រាប់​ការ​ធ្វើ​ដំណើរ​តាម​ជើង​យន្តហោះ ដែល​ចេញ​ដំណើរ​នៅ​ថ្ងៃ​សោរ៍ ទី៩ ខែ​វិច្ឆិកា។

ក្រុមហ៊ុន​អាកាសចរណ៍​ស៊ីវិល​ថៃ (Thai Airways) កាលពី​ថ្ងៃ​ទី៧ ខែ វិច្ឆិកា មិន​ទាន់​ឆ្លើយតប​នឹង​សំណួរ​អាស៊ីសេរី​នៅឡើយ​ទេ ជុំវិញ​ករណី​របស់​លោក សម រង្ស៊ី​។ ប៉ុន្តែ លោក សម រង្ស៊ី អះអាង​ថា ការ​មិន​អនុញ្ញាត​ឱ្យ​លោក​ជិះ​យន្ត​របស់​ក្រុមហ៊ុន​ថៃ​នេះ គឺ​ដោយសារ​តែ​មាន​អន្តរាគមន៍​ពី​ថ្នាក់​កំពូល​របស់​ថៃ៖ «ក្រុមហ៊ុន​អាកាសចរណ៍​នោះ​ស្ទើរតែ​អង្វរ​ខ្ញុំ​វិញ ថា សូម​យល់​ពួកគាត់​ផង ពួកគាត់​អត់​ចង់​រារាំង​លោក​ទេ តែ​មាន​បញ្ជា​ពី​ខាងលើ​។ គេ​ថា​អ៊ីចឹង!»

នាយករដ្ឋមន្ត្រី​ថៃ​លោក ប្រាយុទ្ធ ចាន់អូចា កាលពី​ថ្ងៃទី៦ ខែ វិច្ឆិកា បាន​ប្រកាស​មិន​អនុញ្ញាត​ឱ្យ​លោក សម រង្ស៊ី ចូល​ប្រទេស​ថៃ​នោះ​ឡើយ ដោយ​លោក​សម្អាង​ថា ធ្វើ​ដូច្នេះ​ដើម្បី​គោរព​គោលការណ៍​មិន​ជ្រៀតជ្រែក​កិច្ចការ​ប្រទេស​ដទៃ​របស់​ប្រទេស​សមាជិក​អាស៊ាន។

លោក សម រង្ស៊ី ធ្លាប់​បង្ហាញ​សុទិដ្ឋិនិយម​ថា រដ្ឋាភិបាល​ថៃ អាច​កែប្រែ​ចិត្ត​រឿង​ហាមឃាត់​លោក​មិន​ឱ្យ​ចូល​ទឹកដី​ថៃ​នេះ។ ទោះជា​យ៉ាង​នេះ​ក្តី ភ្លាមៗ​ក្រោយ​ក្រុមហ៊ុន​អាកាសចរណ៍​ថៃ មិន​អនុញ្ញាត​ឱ្យ​លោក​ធ្វើដំណើរ​តាម​យន្តហោះ​ថៃ លោក​បានសម្រេច​ទិញ​សំបុត្រ​យន្តហោះ ក្រុមហ៊ុន​អាកាសចរណ៍​ផ្សេង និង​ទៅ​ប្រទេស​ផ្សេង​វិញ ដើម្បី​ធ្វើដំណើរ​ឱ្យ​បាន​ឆាប់ កុំ​ឱ្យ​បង្អង់​យូរ។ លោក​ស្នើ​ឱ្យ​អ្នកគាំទ្រ​គណបក្ស​សង្គ្រោះ​ជាតិ ទាំងអស់​រក្សា​ការ​អត់ធ្មត់ ព្រោះ​ការរៀបចំ​ការ​ធ្វើ​ដំណើរ​ជាថ្មី​នេះ នឹង​ប្រព្រឹត្តទៅ​ឆាប់ៗ​បំផុត តាម​ដែល​អាច​ធ្វើ​ទៅ​បាន៖ «អត់​យូរ​ប៉ុន្មាន​ទេ ព្រោះ​ឥឡូវនេះ ខ្ញុំ​ទាក់ទង​ជាប់​លាប់​ជាមួយ​ថ្នាក់ដឹកនាំ​គណបក្ស​សង្គ្រោះជាតិ។ ទោះជា​យើង​មាន​វត្ត​មាននៅ​ឆ្ងាយ​ពី​គ្នា ប៉ុន្តែ​តាម​មធ្យោបាយ​ទំនើប យើង​ទាក់ទង​គ្នា​ប្រចាំ​ម៉ោង ប្រចាំ​នាទី ហើយ​យើង​ធ្វើ​សេចក្ដី​សម្រេច​ជាមួយ​គ្នា។ ឥឡូវនេះ​យើង​គិតគូរ​អំពី​ការទិញ​សំបុត្រ​យន្តហោះ​ថ្មី ទិញ​ជាមួយ​ក្រុមហ៊ុន​អាកាសចរណ៍​ថ្មី យើង​នឹង​ហោះ​ទៅ​ប្រទេសជិតខាង​មួយទៀត ក្រៅពី​ប្រទេស​ថៃ យើង​រក​ប្រទេស​មួយទៀត ហើយ​យើង​នឹង​រក​ផ្លូវ​ថ្មី ដើម្បី​ចូល​ទឹកដី​កម្ពុជា»

បើ​ទោះ​ជា​លោក សម រង្ស៊ី បញ្ជាក់​អំពី​ការ​តាំង​ចិត្ត និង​ប្ដេជ្ញា​ខ្ពស់​ក្នុង​ការ​វិលត្រឡប់​ទៅ​ប្រទេស​កម្ពុជា​វិញ​ឆាប់ៗ ឱ្យ​ខាងតែ​បាន​យ៉ាង​នេះ​ក្តី ក៏​លោក ហ៊ុន សែន ឯណោះ​បាន​ចំអក​ឱ្យ​លោក សម រង្ស៊ី ថា ជា​មនុស្ស​កំសាក មិន​ហ៊ាន​វិល​មក​ស្រុក​ខ្មែរ​វិញ​ទេ ព្រោះ​បើ​លោក សម រង្ស៊ី ចិត្តសឿង​មែន ម្ល៉េះ​លោក សម រង្ស៊ី ទិញ​សំបុត្រ​យន្តហោះ ទៅ​ចុះ​នៅ​ព្រលាន​យន្តហោះ​ស្រុក​ខ្មែរ មិនមែន​ទិញ​សំបុត្រ​ទៅ​ចុះ​នៅ​ស្រុក​ថៃ ឬ​ប្រទេស​ដទៃ​នោះ​ទេ៖ «បន្តិចទៀត​នឹង​ប្រកាស​ថា នឹង​មិន​មក​ទេ ដោយសារតែ​ថៃ​មិន​ឱ្យ​ចូល​។ ចុះបើ​ថៃ​មិន​ឱ្យ​ចូល ម្ដេច​មិន​ជិះ​យន្តហោះ​មក​ចុះ​នៅ​សៀមរាប ចុះ​នៅ​ភ្នំពេញ ចុះ​នៅ​នេះ​តែម្តង​ទៅ ម៉េច​ក៏​ចាំបាច់​មក​តាម​ហ្នឹង?»

ទោះជា​លោក ហ៊ុន សែន ឌឺ​ឱ្យ​លោក សម រង្ស៊ី ជិះ​យន្តហោះ​ពី​បារាំង ហោះ​ត្រង់​មក​កម្ពុជា​យ៉ាងណាក្តី កម្ពុជា​គ្មាន​ជើង​យន្តហោះ ដែល​ហោះហើរ​ត្រង់ ពី​ប្រទេស​អឺរ៉ុប​ឆ្ពោះ​ទៅ​កាន់​ប្រទេស​កម្ពុជា​នោះ​ទេ​។ អ្នកដំណើរ​ពី​ប្រទេស​អឺរ៉ុប ឬ​សហរដ្ឋ​សហរដ្ឋអាមេរិក ដែល​ធ្វើដំណើរ​ទៅ​ប្រទេស​កម្ពុជា ត្រូវតែ​ឈប់​សំចត​នៅ​ប្រទេស​ណាមួយ ក្នុង​តំបន់​អាស៊ី​ជាមុន​សិន មុននឹង​បន្ត​ដំណើរ​ទៅ​ប្រទេស​កម្ពុជា​បាន។

ជាង​នេះ​ទៅ​ទៀត​លោក ហ៊ុន សែន ថ្មីៗ​នេះ បាន​បញ្ជា​ឱ្យ​ក្រុមហ៊ុន​អាកាសចរណ៍​ស៊ីវិល ៤៧ ក្រុមហ៊ុន កុំ​ដឹក​លោក សម រង្ស៊ី និង មន្ត្រី​ជាន់ខ្ពស់​បក្ស​ប្រឆាំង ៨​រូប​ផ្សេងទៀត ចូល​ដី​ខ្មែរ និង ព្រមាន​ដាក់ទោស​ក្រុមហ៊ុន​ទាំងអស់​នោះ បើ​ហ៊ាន​ល្មើស​នឹង​បទបញ្ជា​នេះ​។ មិនតែប៉ុណ្ណោះ​លោក ហ៊ុន សែន បាន​គម្រាម​បាញ់សម្លាប់​លោក សម រង្ស៊ី នៅ​ព្រំដែន និង​បាន​ពង្រាយ​កងទ័ព​យ៉ាង​ច្រើន​ទៅ​ព្រំដែន​ខេត្ត​បន្ទាយមានជ័យ ត្រង់​ចក្រ​ទ្វារ​ព្រំដែន​ប៉ោយប៉ែត ដែល​ជា​ច្រក​លោក សម រង្ស៊ី ប្រកាស​ថា ដើរចូល​ដី​ខ្មែរ​តាម​នោះ​។ ស្រប​ពេល​ជាមួយគ្នា​នេះ​ដែរ របប​នេះ បាន​រឹតត្បិត​សិទ្ធិ​សេរីភាព​ប្រជាពលរដ្ឋ ក្នុង​ការ​ចែក​រម្លែក​សារ ឬ​បញ្ចេញមតិ​គាំទ្រ​ដំណើរ​មាតុភូមិនិវត្តន៍​នេះ ដោយ​អាជ្ញាធរ​បាន​ចេញ​ដីកា​ចោទប្រកាន់ និង​ចាប់ខ្លួន​សកម្មជន​បក្ស​ប្រឆាំង​ជា​ទ្រង់ទ្រាយ​ធំ ក្នុង​រយៈពេល​ចុងក្រោយ​នេះ​។ មិនតែប៉ុណ្ណោះ មន្ត្រីរាជការ​ទាំង​ស៊ីវិល និង​យោធា រង​ការ​រឹតត្បិត មិន​ឱ្យ​សុំច្បាប់​ឈប់សម្រាក ឬ ធ្វើដំណើរ​ទៅ​ក្រៅ​ប្រទេស​ក្នុងអំឡុងពេល នៃ​ដំណើរ​មាតុភូមិនិវត្តន៍​របស់​មន្ត្រី​បក្ស​ប្រឆាំង​នេះ។

លោក សម រង្ស៊ី ចាត់​ទុក​ការ​ផ្ចាញ់ផ្ចាល​លោក ថា​មិន​ហ៊ាន​ទិញ​សំបុត្រ​យន្តហោះ ហោះ​ត្រង់​ទៅកាន់​ប្រទេស​កម្ពុជា​នេះ គឺជា​សារ​គួរ​ឱ្យ​អស់សំណើច និង​សម្ដី​កូនក្មេង​ដែល​បង្ហាញ​អំពី​ភាព​កំសោយ​របស់​លោក ហ៊ុន សែន ទៅវិញ​ទេ៖ «មានន័យថា ហ៊ុន សែន អន់​ណាស់​! ហ៊ុន សែន ខ្លាច សម រង្ស៊ី ខ្លាច​ហួសហេតុ​មែនទែន​! ថា​ចង់​ចាប់​ខ្ញុំ​។ ខ្ញុំ​ចូល​ឱ្យ​ចាប់ មិន​មិន​ព្រម​ឱ្យ​ខ្ញុំ​ចូល បែរជា​ទៅ​អង្វរ​ប្រទេស​ជិតខាង មិន​ឱ្យ​ខ្ញុំ​ចូល​ទៅ​វិញ​។ គាត់​ភ័យ ខ្លាច​ខ្ញុំ​ចូល​ទៅ​ចាប់​គាត់​មែន»

លោក ហ៊ុន សែន អះអាង​ថា លទ្ធផល​នៃ​ការរារាំង មិន​ឱ្យ​លោក សម រង្ស៊ី វិល​ចូល​ស្រុក​វិញ​បាន​នេះ គឺជា​លទ្ធផល ដែល​បាន​មក​ពី​កិច្ច​ខិតខំ​ប្រឹងប្រែង​របស់​លោក ដែល​សុំ​ប្រទេស​អាស៊ាន​ទាំងអស់ ឱ្យ​ជួយ​សហការ​ជាមួយ​របប​លោក តាម​ដីកា​តាម​ចាប់ខ្លួន​ថ្នាក់ដឹកនាំ​បក្ស​ប្រឆាំង ដែល​របប​នេះ​បាន​បញ្ជូន ទៅ​ប្រទេស​សមាជិក​អាស៊ាន​ទាំងអស់​នោះ​។ លោក​ថ្លែង អួតអាង​បន្ថែម កាលពី​ថ្ងៃ​ទី៧ ខែ វិច្ឆិកា នៅ​សណ្ឋាគារ​សុខា នៅ​ទីក្រុង​ភ្នំពេញ ថា​ប្រទេស​អាស៊ាន​ទាំងអស់ ព្រម​ស្តាប់​តាម​សំណើ​របស់​លោក ព្រោះ​លោក​បាន​ជួប​ជាមួយ​មេដឹកនាំ​ប្រទេស​ទាំងនោះ​ដោយ​ផ្ទាល់ កាលពី​ក្នុង​កិច្ចប្រជុំ​អាស៊ាន នៅ​ទីក្រុង​បាងកក នា​ពេល​ថ្មីៗ​នេះ៖ «ហើយ​ក្នុង​រយៈពេល​ដែល​ខ្ញុំ​ទៅ​ប្រជុំ​អាស៊ាន ខ្ញុំ​បាន​ធ្វើ​ការ​ជាមួយ​ដៃគូ​ទាំងអស់ នៅ​ក្នុង​អាស៊ាន​របស់​យើង ដែល​នេះ​ចូលរួម​ចំណែក​សំខាន់ ដែល​ចូលរួម​ចំណែក​ដល់​ស្ថិរភាព​របស់​ប្រទេស»

ទោះជា​យ៉ាង​នេះ​ក្តី ក្នុងចំណោម​ប្រទេស​អាស៊ាន​ទាំងនេះ មាន​ប្រទេស​ជាច្រើន រួម​ទាំង​ប្រទេស​ឥណ្ឌូណេស៊ី និង ប្រទេស​ម៉ាឡេស៊ី​ផង មិន​ធ្វើតាម​សំណើ​របស់​លោក ហ៊ុន សែន នោះ​ទេ​។ ថ្មីៗ​នេះ ប្រទេស​ឥណ្ឌូណេស៊ី អនុញ្ញាត​ឱ្យ​អនុប្រធាន​គណបក្ស​សង្គ្រោះ​ជាតិ​អ្នកស្រី មូរ សុខ​ហួរ ចូល​ទៅ​ប្រទេស​នេះ នឹងធ្វើ​សន្និសីទកាសែត​មួយ​ទៀតផង​។ ដោយ​មិន​ពេញចិត្ត នឹង​ការអនុញ្ញាត​ឱ្យ​អ្នកស្រី មូរ សុខហួរ មាន​វត្ត​មាននៅ​ទីនោះ និង​អាច​ធ្វើ​សន្និសីទកាសែត​ផង​នោះ របប​លោក ហ៊ុន សែន តាមរយៈ​តំណាង​ទូត​ខ្មែរ​នៅ​ប្រទេស​ឥណ្ឌូណេស៊ី តាម​អុក​ឡុក​រំខាន​អ្នកស្រី មូរ សុខហួរ ដល់​កន្លែង​ធ្វើ​សន្និសីទ​នោះ។

ចំណែក​ឯ​ប្រទេស​ម៉ាឡេស៊ី​ឯណោះ​វិញ បាន​អនុញ្ញាត​ឱ្យ​អ្នកស្រី មូរ សុខហួរ និង​មន្ត្រី​ជាន់ខ្ពស់​គណបក្ស​សង្គ្រោះ​ជាតិ មាន​សេរីភាព​ក្នុង​ការ​បន្ត​ស្នាក់នៅ​ប្រទេស​នេះ និង​បាន​ដោះលែង​សកម្មជន​គណបក្ស​សង្គ្រោះ​ជាតិ​ពីរ​រូប​ទៀត​គឺ កញ្ញា ងឹម គាថា និង លោក ហេង ស៊ាងលាង ពី​ការ​ឃាត់ខ្លួន​បណ្ដោះអាសន្ន។

អ្នកស្រី មូរ សុខហួរ បញ្ជាក់​ពី​ប្រទេស​ម៉ាឡេស៊ី ថា​អ្នកស្រី និង​មន្ត្រី​គណបក្ស​សង្គ្រោះជាតិ​ឯទៀត កំពុង​រង់ចាំ​ផ្លូវលោក សម រង្ស៊ី ដែល​រួម​ដំណើរ​ជាមួយគ្នា ទៅ​ប្រទេស​កម្ពុជា​នៅ​ថ្ងៃ​ទី៩ ខែ វិច្ឆិកា​ខាងមុខ​នោះ​។ អ្នកស្រី នៅតែ​ប្រកាន់​ជំហរ​ថា ថ្ងៃទី៩ ខែ​វិច្ឆិកា​នោះ គឺជា​ថ្ងៃ​សំខាន់ សម្រាប់​ការ​ផ្លាស់ប្តូរ​ជា​វិជ្ជមាន​នៅ​កម្ពុជា៖ «ដូច្នេះ​យើង​ត្រូវ​ចាំ​លោក​ប្រធាន​។ យើង​ត្រូវ​បង្ហាញខ្លួន​ជាមួយគ្នា​។ ថ្ងៃ៩ ខែ​វិច្ឆិកា យើង​ឈរ​ជាមួយគ្នា»

កញ្ញា ងឹម គាថា ក៏​ប្ដេជ្ញា ថា​នឹង​នៅ​រួម​ដំណើរ​ជាមួយ​លោក សម រង្ស៊ី ដើម្បី​វិល​ទៅ​ស្រុក​ខ្មែរ​វិញ ទោះ​តាម​មធ្យោបាយ​ណា​ក៏ដោយ៖ «នាង​ខ្ញុំ​នឹង​វិល​ទៅ​ប្រទេស​កម្ពុជា​វិញ ព្រោះ​ជា​ទឹកដី​កំណើត​របស់ខ្ញុំ​។ ដរាប​នាង​ខ្ញុំ​នៅ​មាន​ជីវិត នាង​ខ្ញុំ​នឹង​នៅ​តស៊ូ»

ការ​ធ្វើ​ទុក្ខបុកម្នេញ​​របស់​របប​លោក ហ៊ុន សែន ក្នុង​ការ​រារាំង​គ្រប់​មធ្យោបាយ មិន​ឱ្យ​មន្ត្រី​គណបក្ស​សង្គ្រោះ​ជាតិ វិល​ចូល​ស្រុក​វិញ​នេះ រង់​ការរិះគន់ និង ថ្កោលទោស​។ សហរដ្ឋ​អាមេរិក ស្នើ​ឱ្យ​របប​ក្រុងភ្នំពេញ​បញ្ឈប់​ការ​ធ្វើទុក្ខបុកម្នេញ​នេះ និង ងាក​មក​រក​ការចរចា​ជាបន្ទាន់ ដើម្បី​ឱ្យ​មានការ​ផ្សះផ្សា​ជាតិ​។ ចំណែក​ឯង​អង្គការ​សិទ្ធិមនុស្ស​អន្តរជាតិ រួមមាន​អង្គការ Human Rights Watch និង អង្គការ​លើកលែងទោស​អន្តរជាតិ ក៏បាន​ទាមទារ​ឱ្យ​របប​លោក ហ៊ុន សែន អនុញ្ញាត​ឱ្យ​មន្ត្រី​បក្ស​ប្រឆាំង វិលត្រឡប់​ទៅ​កម្ពុជា​វិញ ដោយ​គ្មាន​ការរារាំង​។ ក្រុម​សមាជិកសភា​អាស៊ាន​ដើម្បី​សិទ្ធិមនុស្ស ក៏បាន​អំពាវនាវ​ឱ្យ​រដ្ឋាភិបាល​នៃ​ប្រទេស​អាស៊ាន​ទាំងអស់ បើកផ្លូវ​ឱ្យ​មន្ត្រី​បក្ស​ប្រឆាំង ធ្វើ​ដំណើរ​ឆ្លងកាត់​ប្រទេស​នេះ ដើម្បី​វិល​ទៅ​កម្ពុជា​វិញ ដោយ​មិន​ត្រូវ​ហាមឃាត់​ពួកគេ​នោះ​ឡើយ។

លោក សម រង្ស៊ី ថា​បុព្វហេតុ​របស់​គណបក្ស​សង្គ្រោះជាតិ ក្នុង​ការ​ប្រឹងប្រែង​រក​ច្រក​ចូល​កម្ពុជា ដើម្បី​ស្ដារ​សិទ្ធិមនុស្ស និង​ប្រជាធិបតេយ្យ​នេះ ទទួល​បានការ​ស្វាគមន៍​ពី​ប្រទេស​ប្រជាធិបតេយ្យ​ជាច្រើន ដែល​ជា​ការ​លើកទឹកចិត្ត​មួយ​។ លោក​អំពាវនាវ​ឱ្យ​អ្នកគាំទ្រ​គណបក្ស​សង្គ្រោះ​ជាតិ​ទាំងអស់ បន្ត​ចូលរួម​ជាមួយ​លោក ក្នុង​បុព្វហេតុ​ឱ្យ​មានការ​ផ្លាស់ប្ដូរ​ជា​វិជ្ជមាន​នេះ៖ «គ្រាន់តែ​ពន្យារពេល​បន្តិច​ទេ ប៉ុន្តែ​គម្រោង​យើង​នៅ​រក្សា​ដដែល​។ ការ​ប្រមូល​ផ្តុំ​នឹង​កើតមាន​នៅ​លើ​ទឹកដី​កម្ពុជា​ជាក់​ជា​មិន​ខាន។ គោលដៅ​នៅ​ដដែល យើង​នឹង​សម្រេច​ឱ្យ​បាន​នៅ​ពេល​ឆាប់ៗ​នេះ»

លោក សម រង្ស៊ី ថា កាលណា​គេ​ធ្វើបាប​គណបក្ស​សង្គ្រោះ​ជាតិ​កាន់តែ​ខ្លាំង លោក​កាន់តែ​មានការ​ប្ដេជ្ញា​ចិត្ត​ខ្ពស់ និង​ស្នើ​ឱ្យ​អ្នកគាំទ្រ​ទាំងអស់​តាំងចិត្ត​ដូចគ្នា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

anonymous

The opposition party should keep a secret reveals"no breach out"it doesn't matter to tell anyone else to know about it.U are not suppose to say about your plans when where how what and why?,there are many things that u can do it to reach out that goal to avoid enemy intercept it that is the smart political strategy and be success.Just keep do it at the right course and stay strong than before,keep your dream alive and don't give up to fight fight for your right and don't let any bully try to take your right away from u.Be careful with what u say...say what u mean...mean what u do...do what u won't.

Nov 08, 2019 09:52 AM

គេហទំព័រ​ទាំងមូល