អ្នក​វិភាគ​ថា លោក ហ៊ុន សែន នឹង​ធ្លាក់​ពី​អំណាច​បើ​លោក សម រង្ស៊ី ចូល​ស្រុក​ដឹក​នាំ​កម្លាំង​មហាជន

ដោយ សុជីវី
2019-09-03
អ៊ីម៉ែល
មតិ
Share
បោះពុម្ព
លោក ហ៊ុន សែន នាយករដ្ឋមន្ត្រី និង​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
លោក ហ៊ុន សែន នាយករដ្ឋមន្ត្រី និង​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
រូប៖ ហ្វេសប៊ុក​លោក ហ៊ុន សែន និង​លោក សម រង្ស៊ី

អ្នកវិភាគ​នយោបាយ​លើកឡើង​ថា​ សារ​អំពាវនាវ​របស់​ប្រធាន​ស្ដី​ទី​គណបក្ស​សង្គ្រោះ​ជាតិ​ឱ្យ​ប្រជារាស្ត្រ​ខ្មែរ​អនុវត្ត​សិទ្ធិ​ងើប​តវ៉ា ដើម្បី​ផ្លាស់​ប្ដូរ​របប​លោក ហ៊ុន សែន នៅ​តែ​មាន​ឥទ្ធិពល​ខ្លាំង។ ការ​លើក​ឡើង​នេះ​ បន្ទាប់​ពី​លោក សម រង្ស៊ី បង្ហោះ​សារ​អំពាវនាវ​ថា នៅ​ពេល​លោក​ចូល​ស្រុក​វិញ​ សូម​ឱ្យ​ប្រជាពលរដ្ឋ​ខ្មែរ​យក​គំរូ​តាម​ប្រជាពលរដ្ឋ​ហ្វីលីពីន ​ដែល​បាន​បណ្ដេញ​មេ​ដឹក​នាំ​ផ្ដាច់​ការ​ចេញពី​ដំណែង​ដោយសន្តិវិធី​​ តាមរយៈ​ចលនា​មួយ​ដែល​ហៅថា​អំណាច​ប្រជាពលរដ្ឋ (People Power)។

លោក គឹម សុខ ដែល​កំពុង​រស់​នៅ​ភៀស​ខ្លួន​នៅ​ក្រៅ​ប្រទេស​ពី​ការ​តាម​ចាប់​របស់​របប​លោក ហ៊ុន សែន នោះ​ មាន​ប្រសាសន៍​ថា ​កម្រិត​ប្រជាប្រិយ​ភាព​របស់​លោក ​សម​ រង្ស៊ី​ ទាំង​ក្នុង​ប្រទេស ​និង​នៅ​​ក្រៅ​ប្រទេស​នៅ​តែ​ខ្លាំង ​ប្រសិន​បើ​មេ​ដឹក​នាំ​បក្ស​ប្រឆាំង​រូប​នេះ​មាន​លទ្ធភាព​វិល​ចូល​ស្រុក​តាម​ការ​សន្យា​ និង​ចេញ​មុខ​ជា​គំរូ​ដឹកនាំ​ការ​តវ៉ា​ដោយសន្តិវិធី​។លោក​បន្ត​ថា ប្រជាពលរដ្ឋ​ចង់​ផ្លាស់​ប្ដូរ​ព្រោះ​ពួក​គេ​មិន​ពេញ​ចិត្ត​ ចំពោះ​ការ​ដឹក​នាំ​របស់​ក្រុម​លោក​ ហ៊ុន​ សែន។ ជា​ពិសេស​ស្ថិត​ក្នុង​ស្ថានភាព​ដែល​កម្ពុជា​កំពុង​ប្រឈម​បាត់បង់​ប្រព័ន្ធ​អនុគ្រោះ​ពន្ធEBA៖

«គឺ​ការដឹកនាំ​របស់​ក្រុម​លោក​ ហ៊ុន​ សែន​ គឺ​ជា​របៀប​បំបិទ​សិទ្ធិ​និង​ បំផ្លាញ​ផល​ប្រយោជន៍​របស់​ពួក​គាត់​ ជា​ពិសេស​អាជ្ញាធរ​របស់​ក្រុម​លក​ ហ៊ុន​ សែន ​តាំង​ពី​ថ្នាក់​ក្រោម​រហូត ដល់​ថ្នាក់​កំពូល​ធ្វើ​អ្វីៗ ដើម្បី​ប្រយោជន៍​ផ្ទាល់ខ្លួន​ហើយ​ជា​ជំនួស​ក្នុង​ការ​ទាញ​ឱ្យ​ប្រជាពលរដ្ឋ​នៅ​ខាង​ខ្លួន​ គឺ​មានតែ​ការ​គាប​សង្កត់​បំបិទ​សិទ្ធិ​ហើយ​បន្លាច​ថែម​ទៅទៀត​មិនមែន​បម្រើ​ប្រ​ជា​ពលរដ្ឋ​ដើម្បី​ទាក់ទាញ​សមាន​ចិត្ត​នោះ​ទេ។ ប្រសិនបើ​ក្រុម​លោក​សម​ រង្ស៊ី​ ពិត​ជា​ចូល​មែន ហើយ​មាន​យុទ្ធសាស្ត្រ​ប្រាកដ​ក្នុង​ការ​ដឹក​នាំ​ការ​ងើប​ឡើង​ ដោយ​អនុវត្ត​សិទ្ធិ​តាម​រដ្ឋធម្មនុញ្ញ​របស់​ប្រជាពលរដ្ឋ​ជាពិសេស ​កម្មករកម្មការិនី និង​មន្ត្រី​រាជ​ការ​ផ្សេងៗ ដែល​ចង់​ឱ្យ​មានការ​ផ្លាស់​ប្ដូរ​នេះ​អាច​ ទៅ​រួច​ហើយ​សង្ឃឹម​មាន​ការ​​ជោគជ័យ​តែ​ត្រូវ​ឆ្លងកាត់​ពេលវេលា​មួយ​រយៈ​និង​ការឈឺចាប់​ខ្លួន​ដែរ»

ទោះ​បី​ជា​យ៉ាង​ណា​លោក​ គឹម​ សុខ​ បន្ត​ថា ​លោក​នៅ​តែ​ចង់​ឃើញ​មេ​ដឹក​នាំ​បក្ស​ប្រឆាំង ​និង​មេ​ដឹក​ នាំ​បក្ស​កាន់​អំណាច​ជ្រើសរើស​មធ្យោបាយ​ជួប​ចរ​ចារ​គ្នា​ដោះស្រាយ​វិបត្តិ​នយោបាយ​ដែរ៖ «ប៉ុន្តែ​បើ​យើង​មើល​ស្ថានភាព​នយោបាយ​ជាក់​ស្ដែង​ គឺ​មក​ដល់​ពេល​នេះ គឺ​គ្មាន​ពន្លឺ​ដែល​ជា​ការ​ចរ​ចារ​ទេ​ព្រោះ​អ្វី​ដែល​កំណត់​ដោយ​ក្រុម​លោក​ ហ៊ុន​ សែន​ គឺ​ការ​សម្លាប់​គួរ​ប្រជែង​កុំ​ឱ្យ​ងើប​រួច ដើម្បី​ប្រើ​ឱកាស​នេះ​ពង្រឹង​គ្នា​គាត់​ឱ្យ​បាន​រឹងមាំ»

កាល​ពី​ថ្ងៃ​ទី១ ខែ​កញ្ញា​ លោក​ សម រង្ស៊ី បាន​បង្ហោះ​សារ​នៅ​លើ​ហ្វេសប៊ុក​អំពាវនាវ​ថា នៅ​ពេល​ លោក​ត្រឡប់​មក​ប្រទេស​កម្ពុជា​វិញ​នៅ​ថ្ងៃ​ទី៩ វិច្ឆិកា ឆ្នាំ២០១៩ ខាង​មុខ​នេះ​ សូម​ប្រជារាស្ត្រ​ខ្មែរ​យក​គំរូ​តាម​ប្រ​ជា​រដ្ឋ​ហ្វីលីពីន ដែល​បាន​បណ្ដេញ​ជន​ផ្ដាច់​ការ​ឈ្មោះ​លោក ម៉ាកូស (Marcos) ពី​តំណែង​ដោយ​សន្តិវិធី​ក្នុង​ឆ្នាំ១៩៨៦​ តាមរយៈ​ចលនា​មួយ​ជា​ប្រវត្តិសាស្ត្រ​ហៅថា​ ``អំណាច​ប្រជាពលរដ្ឋ​``។លោក​អះអាង​ថា របប​ផ្ដាច់​ការ​មួយ​ដ៏​សាហាវ​ត្រូវ​បាន​បញ្ចប់​ ដោយ​គ្មាន​ការ​បង្ហូរ​ឈាម​ឡើយ។ លោក ហ្វែឌីណង់​ម៉ាកូស (Ferdinand Marcos) គឺ​ជា​មេ​ដឹក​នាំ​ផ្ដាច់​ប្រទេស​ហ្វីលីពីន​ជាង ២០ឆ្នាំ​ហើយ​ត្រូវ​បាន​ចោទ​ប្រកាន់​ថា​បាន​រំលោភ​សិទ្ធិ​មនុស្ស​ទ្រង់ទ្រាយ​ធំ និង​បាន​ប្លន់​ទ្រព្យសម្បត្តិ​របស់​ប្រទេសជាតិ​ ដើម្បី​ផល​ប្រយោជន៍​ផ្ទាល់​ខ្លួន។ ប្រជាពលរដ្ឋ​ហ្វីលីពីន​ចាប់​ផ្តើម​ងើប​តវ៉ា ​ហើយ​បន្ទាប់​មក​ ក្រុម​កម្លាំង​ប្រដាប់​អាវុធ ​បាន​ចូលរួម​គាំទ្រ​ចលនា​ប្រជាពលរដ្ឋ​រហូត​ទម្លាក់​លោក​ ម៉ា​សកូស ចេញ​ពី​ដំណែង​ដោយ​ជោគជ័យ។

អ្នកនាំពាក្យ​គណបក្ស​ប្រជាជន​កម្ពុជា​លោក​ សុខ​ ឥសាន​ ថ្លែង​ថា​សារ​អំពាវនាវ​របស់​លោក សម រង្ស៊ី នេះ គ្រាន់​តែ​ជា​នយោបាយ​ទាល់​ច្រក​ប៉ុណ្ណោះ ពីព្រោះ​លោក​គ្មាន​ជំនឿ​ថា លោក សម រង្ស៊ី នឹង​វិល​ចូល​កម្ពុជា​តាម​ការ​សន្យា​នោះ​ទេ។ លោក​ សុខ​ ឥសាន​ ក៏​មិន​ជឿ​ថា​មាន​ពលរដ្ឋ​ងើបឡើង​បះបោរ​តាម​ការ​អំពាវនាវ​នេះ​ដែរ។ អ្នក​នាំ​ពាក្យ​បក្ស​កាន់អំណាច​រូប​នេះ​បន្ត​ថា ប្រសិន​បើ​លោក សម រង្ស៊ី ចូល​ទឹកដី​កម្ពុជា​តាម​កាល​កំណត់​មែន​នោះ សមត្ថកិច្ច​នឹង​ចាប់​ខ្លួន​ភ្លាមៗ៖ «មិន​មក​ទេ​ហើយ​ស្រែក​នេះ​ដើម្បី​ស្ទង់​មើល​ថា​តើ​ មាន​ប្រជាជន​និង​កងទ័ព​ប៉ុន្មាន​នាក់​គាំទ្រ​ខ្លួន​ហើយ​ឥឡូវ​បើ​គាត់​ពូកែ​ថា​តែខ្លួន​ឯង​ថា​រក​មនុស្ស​រាប់​លាន​នាក់​រាប់​សែន​នាក់​ហែហម​មក​នោះ​ម៉េចក៏មិន​មក​ទៅ​ហេតុ​អី​ចាំ​បាច់​ពន្យារ​ពី​មួយថ្ងៃ​ទៅ​មួយ​ថ្ងៃ»

អ្នក​តាម​ដាន​បញ្ហា​សង្គម​ និង​ជា​អ្នក​សិក្សា​ផ្នែក​ច្បាប់​លោក វ៉ន ចាន់ឡូត នៅ​តែ​ជឿ​ថា ការ​អំពាវនាវ​របស់​លោក សម រង្ស៊ី​ គឺ​មាន​ឥទ្ធិពល​ខ្លាំង​ទៅ​លើ​ប្រជាពលរដ្ឋ ប៉ុន្តែ លោក​មិន​គាំទ្រ​ជម្រើស​បែប​នេះ​ទេ ព្រោះ​វា​អាច​នាំ​មក​នូវ​ការ​ប្រឈម​បែប​ហិង្សា​រវាង​ពលរដ្ឋ និង​កងកម្លាំង​របស់​លោក ហ៊ុន សែន។ លោក​ចង់​ឃើញ​មេ​ដឹក​នាំ​គណបក្ស​ទាំង​ពីរ​លះបង់​គំនុំ​បុគ្គល ហើយ​គិត​ប្រយោជន៍​ជាតិ​ និង​ប្រជាជន​ជា​ធំ​ហើយ​ចាប់​ផ្ដើម​វិល​ទៅ​រក​តុ​ចរ​ចារ​ដោយ​សន្តិវិធី៖

«យើង​ឃើញ​កូន​អុក ដែល​បក្ស​ប្រឆាំង​នៅ​មាន​ប្រៀប គឺ​ការ​គាំទ្រ​ពី​សហគមន៍​អន្តរជាតិ​ ហើយ​កូន​អុក​ទី២ ដែល​បក្ស​ប្រឆាំង​អាច​ប្រើ​បាន ហើយ​ជា​ជម្រើស​ចុង​ក្រោយ​ប្រសិន​បើ​មិន​មាន​ការ​ចរចា​នយោបាយ​កើត​ឡើង​នៅ​មុន​ការ​វិល​ត្រឡប់​របស់​លោក សម រង្ស៊ី ទេ។ ដូច្នេះ គឺ​កម្លាំង​ប្រជាពលរដ្ឋ។ ដូច្នេះ​យើង​មើល​ឃើញ​ថា ឧទាហរណ៍​ជា​ច្រើន​ហើយ នៅ​ពេល​ដែល​មេ​បក្ស​ប្រឆាំង​នៅ​ប្រទេស​វេណេហ្សុយអេឡា​ប្រកាស​ថា​នឹង​វិល​ចូល​ស្រុក និង​ប្រកាស​អំពាវ​នាវ​ឱ្យ​ប្រជាពលរដ្ឋ​ចូលរួម​ជាមួយ​គាត់​ គឺ​ពិតជា​មានការ​ចូលរួម​ពិតមែន​ក្នុង​ការ​ទាមទារ​ឱ្យ​រដ្ឋាភិបាល​ចុះចេញ​ពី​ដំណែង»

រហូតមកដល់​ពេលនេះ​មេ​ដឹក​នាំ​គណបក្ស​ទាំងពីរ​មិន​ទាន់​បង្ហាញ​សញ្ញា​វិល​ទៅ​រក​តុ​ចរ​ចារ​នោះ​ទេ​ដោយ​ភាគី​ទាំង​តែងតែ​បញ្ចេញ​សារ​ព្រមាន​គ្នា​ទៅវិញ​មក ម្ខាង​អាង​កម្លាំង​ប្រជាពលរដ្ឋ និង​ម្ខាង​ទៀត​អាង​កម្លាំង​ប្រដាប់​អាវុធ។

ទោះ​យ៉ាង​ណា​ក្ដី​លោក​ សម​ រង្ស៊ី​ ប្រកាន់​ជំហរ​ថា​លោក​នឹង​វិលត្រឡប់​ចូល​កម្ពុជា​វិញ​នៅ​ថ្ងៃ​ទី៩ ខែ​វិច្ឆិកា​ ឆ្នាំ២០១៩​ ខាង​មុខ និង​តែងតែ​អំពាវនាវ​ឱ្យ​កង​កម្លាំង​ប្រដាប់​អាវុធ​ស្នេហា​ជាតិ​បែរ​ចុង​កាណុង​សំដៅ​ទៅ​លោក ហ៊ុន សែន វិញ ប្រសិន​បើ​លោក ហ៊ុន សែន បញ្ជា​ឱ្យ​កងកម្លាំង​ប្រដាប់​អាវុធ​ស្នេហាជាតិ​បាញ់​ប្រហារ​មក​លើ​ប្រជាពលរដ្ឋ​ស្លូតត្រង់​ដែល​នឹង​ទៅ​ទទួល​លោក​នៅ​ថ្ងៃ​នោះ។

មេ​បក្ស​ប្រឆាំង​រូប​នេះ​ជឿ​ជាក់​ថា​ វត្តមាន​របស់​លោក​នឹង​ធ្វើ​ឱ្យ​កម្ពុជា​មានការ​ផ្លាស់​ប្ដូរ​មាន​ប្រជាធិបតេយ្យ និង​ការ​គោរព​សិទ្ធិ​មនុស្ស​ឡើង​វិញ ព្រម​ទាំង​ទៅ​ដោះ​ស្រាយ​បញ្ហា​ប្រឈម​ទាំង​ឡាយ​របស់​ជាតិ ដែល​របប​លោក ហ៊ុន សែន មិន​អាច​ដោះ​ស្រាយ​បាន​ជាពិសេស​គឺ​ជួយ​កុំ​ឱ្យ​មាន​ការ​ដក​ប្រព័ន្ធ​អនុគ្រោះ​ពន្ធ EBA៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (4)
Share

The smart thing China will cutting edge,or abandon Hun Sen govm't to avoid its economic crashs

Daily News today-China economic stay at high red alerts,it's start from bad to worse after many global manufactories come back home.China are getting a lot of problems at home and abroad...face trade war with the west+its national issues+international pressures+Hong Kong crisis unsolved mystery+Taiwan crisis+south China sea territorial dispute+Tibet crisis+China crisis built NAVAL base in Cambodia,and etc.

Sep 16, 2019 06:12 PM

អ្នក​អាន​អនាមិក

you can not talk to Hun Sen. HUn Sen wants to win every time. If you talk for loss, no need to talk. We need all people together to show that we don't want Hun Sen to destroy our country and our people anymore. We need to stand up, express our right against with this dictatorial regime.

Sep 04, 2019 10:01 PM

អ្នក​អាន​អនាមិក

ពី Long Beach

បានអីទៅដឹកនាំ...បើត្រូវគេដាក់ខ្នោះរួចបញ្ជូនចូលគុកបាត់ហើយ។

Sep 04, 2019 10:27 AM

តាសាន

ពី LA

រាស្ត្រខ្មែរសែនល្ងង់ម្ល៉េះ ទោះសមរង្សីដែលជាមនុស្សកំសាករុញជីវិតពួកគេអោយទៅងាប់ជំនួសដើម្បីយកអំណាចផ្ទាល់ខ្លួនក៏ទៅដែរ។ ចាំកាលនៅផ្លូវវេងស្រេងទេ គ្រាន់តែគេបាញ់ងាប់កម្មករបួនដប់នាក់នាំគ្នារត់ផាសក្រញាំ។ ពេលនោះសមរង្សីនិងបក្សពួកនៅក្រហែងណាដែរ?

Sep 04, 2019 05:43 AM

គេហទំព័រ​ទាំងមូល