លោក ហ៊ុន សែន បញ្ជា​ឱ្យ​ដោះលែង និង​បញ្ឈប់​ការ​ចាប់ចង​ធ្វើ​ទុក្ខបុកម្នេញ​​អ្នក​ទោស​នយោបាយ

ដោយ មាន ឫទ្ធិ
2019-11-14
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន និង​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
លោក​នាយករដ្ឋមន្ត្រី ហ៊ុន សែន និង​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
រូប៖ ហ្វេសប៊ុក​លោក ហ៊ុន សែន និង​លោក សម រង្ស៊ី

លោក ហ៊ុន សែន មេដឹកនាំ​របប​ក្រុង​ភ្នំពេញ បាន​បញ្ជា​ឲ្យ​ដោះលែង និង​​បញ្ឈប់​ការ​​ចាប់​ចង ឬ​ធ្វើ​ទុក្ខ​បុក​ម្នេញ ដល់​​អ្នក​ទោស​នយោបាយ ដែល​ត្រូវ​រង​ការ​បង្ក្រាប​ក្នុង​កំឡុង​ពេល​យុទ្ធនាការ​ ធ្វើ​មាតុភូមិ​និវត្តន៍​របស់​លោក សម រង្ស៊ី ​កន្លង​មក។ អ្នក​នាំ​ពាក្យ​របប​ក្រុង​ភ្នំពេញ​ថា នេះ​ជា​សន្ដានចិត្ត​របស់​លោក ហ៊ុន សែន។ តែ​​អ្នក​វិភាគ​នយោបាយ​ថា នេះ​ជា​​វិធានការ​ឆ្លើយ​តប​ទៅ​នឹង​សម្ពាធ​អន្តរជាតិ។

 

មេដឹកនាំ​របប​ក្រុង​ភ្នំពេញ លោក ហ៊ុន សែន បញ្ជា​អាជ្ញាធរ​​ពាក់ព័ន្ធ​មាន​សមត្ថកិច្ច​ទាំង​អស់ រួម​ទាំង​តំណាង​អយ្យការ​ ត្រូវ​ធ្វើ​​កិច្ចការ ដោះលែង​សកម្មជន​បក្ស​ប្រឆាំង​​​ទាំង​អស់​ឲ្យ​លឿន តាម​ដែល​អាច​ធ្វើ​ទៅ​បាន។ លោក​ណែនាំ​ឲ្យ​គ្រួសារ​របស់​សកម្មជន​ ដែល​ត្រូវ​បាន​ចាប់​ខ្លួន​ទាំង​នោះ ធ្វើ​លិខិត​តាម​រយៈ​មេធាវី ឬ​មេធាវី​ខ្លួន​ឯង អាច​ធ្វើ​លិខិត​ស្នើសុំ​ឲ្យ​អ្នក​ដែល​កំពុង​ជាប់​ពន្ធនាគារ​ទាំង​នោះ បាន​នៅ​ក្រៅ​ឃុំ​បណ្ដោះអាសន្ន។ ប៉ុន្តែ​ត្រូវ​បង្ហាញ​មុខ ពេល​ឡើង​តុលាការ​ និង​ត្រូវ​ទទួល​ការ​កាត់​ក្ដីរបស់​តុលាការ​នៅ​ពេល​ខាង​មុខ។

លោក ហ៊ុន សែន ក៏​បាន​បញ្ជា​ឲ្យ​អាជ្ញាធរ​ពាក់ព័ន្ធ ដក​ហូត​ដីកា​ចោទ​ប្រកាន់​ និង​ចាប់​ខ្លួន សកម្មជន​បក្ស​ប្រឆាំង​ទាំង​នៅ​ក្នុង​ប្រទេស និង​ក្រៅ​ប្រទេស​ត្រឡប់​មក​វិញ​ទាំង​អស់។ ប៉ុន្តែ​លោក ហ៊ុន សែន ​មិន​​លើក​លែង​ទោស​ឲ្យ​មេដឹកនាំ​គណបក្ស​ប្រឆាំង គឺ​លោក សម រង្ស៊ី ឡើយ។

លោក ហ៊ុន សែន ក៏​​អំពាវនាវ​ឲ្យ​សកម្មជន​បក្ស​ប្រឆាំង​​ ដែល​កំពុង​រត់​គេច​ខ្លួន​ទាំង​អស់ ត្រឡប់​វិល​ចូល​ផ្ទះ​សម្បែង​ ជួបជុំ​គ្រួសារ​ឡើងវិញ ដោយ​គ្មាន​ការ​ភ័យ​ខ្លាច គឺ​​​ទាំង​អ្នក​រត់​គេច​​ខ្លួន​ពី​ភូមិ ទៅ​តាម​បណ្ដា​ខេត្ត​ និង​​អ្នក​រត់​គេច​ចេញ​ទៅ​ក្រៅ​ប្រទេស​ ដែល​មិន​ទាន់​បាន​​ទៅ​ដល់​ប្រទេស​ទី៣ ឲ្យ​ត្រឡប់​​ចូល​​ផ្ទះ​វិញ ដោយ​លោក​ធានា​ថា នឹង​បញ្ឈប់​ការ​ធ្វើ​ទុក​បុក​ម្នេញ​ត​ទៅ​ទៀត៖ «»

 

លោក​ ហ៊ុន សែន ថ្លែង​បែប​នេះ នៅ​ព្រឹក​ថ្ងៃ​ទី១៤ វិច្ឆិកា ក្នុង​ឱកាស​ដែល​លោក​ទៅ​សម្ពោធ​រោងចក្រ​ស៊ីម៉ងត៍​មួយ នៅ​ខេត្ត​កំពត។ លោក​អះអាង​ថា ការ​ដោះលែង និង​បញ្ឈប់​ការ​ចាប់ចង​នេះ ដោយ​សារ​លោក​ពិភាក្សា​ជាមួយ លោក ស ខេង យល់​ថា អ្នក​គាំទ្រ​បក្ស​ប្រឆាំង​ទាំង​នោះ ជា​អ្នក​ចាញ់​បោក ​ក្រុម​មេដឹកនាំ​​គណបក្ស​សង្គ្រោះ​ជាតិ ដែល​រុញ​ច្រាន​ឲ្យ​ពលរដ្ឋ​​រង​ទុក្ខ​ទោស​ជំនួស​ខ្លួន និង​យល់​ថា ផែន​ការ​ធ្វើ​រដ្ឋ​ប្រហារ​នៅ​ថ្ងៃ​ទី៩ វិច្ឆិកា​ទទួល​បរាជ័យ។​

ផ្ទុយ​ពី​ការ​លើក​ឡើង​របស់​មេដឹកនាំ​របប​ក្រុង​ភ្នំពេញ អ្នក​វិភាគ​នយោបាយ បណ្ឌិត ឡៅ​ ម៉ុង​ហៃ យល់​ថា នេះ​គឺជា​សំនួន​វោហារ​សព្ទ​នយោបាយ។ តែ​ការ​ពិត​នៅ​ពី​ក្រោយ​រឿង​នេះ គឺ​រដ្ឋាភិបាល​​ប្រើ​វិធានការ​​ជា​វិជ្ជមាន​ ដើម្បី​ឆ្លើយ​តប​នឹង​​សម្ពាធ​របស់​សហគមន៍​អន្តរជាតិ។ ចំពោះ​ប្រសិទ្ធិភាព ថា​តើ​សហគមន៍​អន្តរ​ជាតិ នឹង​នៅ​តែ​បន្ត​សម្ពាធ ឬ​អត់​នោះ លោក​ថា វា​អាស្រ័យ​លើ​ជំហរ និង​កម្រិត​ទាមទារ​របស់​សហគមន៍​អន្តរជាតិ​នោះ។

បណ្ឌិត ឡៅ ម៉ុង​ហៃ យល់​ឃើញ​ថា ជម្លោះ​រវាង​គណបក្ស​ប្រឆាំង​ជាមួយ​រដ្ឋាភិបាល នៅ​តែ​បន្ត​ ខណៈ​គណបក្ស​ប្រឆាំង កំពុង​មាន​ប្រៀប​ជាង​រដ្ឋាភិបាល ​លើ​ឆាក​អន្តរជាតិ។ លោក​បន្ត​ថា សកម្មភាព​របស់​​រដ្ឋាភិបាល​ប្រទេស​ម៉ាឡេស៊ី​ ដែល​មិន​ចាប់​ខ្លួន មិន​​ហាម​ឃាត់​ ក្រុម​មេដឹកនាំ​បក្ស​ប្រឆាំង ហើយ​ផ្ទុយ​ទៅ​វិញ ​បាន​ស្វាគមន៍ និង​អញ្ជើញ​លោក សម រង្ស៊ី ថែម​ទៀត​នោះ ជា​ការ​ផ្គើន នឹង​រដ្ឋាភិបាល​កម្ពុជា៖ «»

ចំណែក​អ្នក​នាំ​ពាក្យ​រដ្ឋាភិបាល​វិញ លោក ផៃ ស៊ីផាន ប្រាប់​ថា ការ​ប្រកាស​ឲ្យ​ដោះលែង និង​អំពាវនាវ​ឲ្យ​សកម្មជន​បក្ស​ប្រឆាំង​​វិល​ចូល​ស្រុក​​ជួបជុំ​ក្រុម​គ្រួសារ​​ មិន​ពាក់ព័ន្ធ​នឹង​វិធានការ​សម្ពាធ​អន្តរជាតិ ឬ EBA ឡើយ៖ «»

មិន​យូរ​ប៉ុន្មាន ក្រោយ​ការ​ប្រកាស​របស់​លោក​នាយក​រដ្ឋ​មន្ត្រី ហ៊ុន​ សែន នៅ​ព្រឹក​ថ្ងៃ​ទី១៤ វិច្ឆកា​ដដែល មេធាវី​ការពារ​ក្ដី​ឲ្យ​សកម្មជន​បក្ស​ប្រឆាំង លោក​មេធាវី​ ជួង ជូងី ប្រាប់​អាស៊ី​សេរី​ថា លោក​កំពុង​មមាញឹក​ធ្វើ​លិខិតស្នាម​​ជាមួយ​ក្រុម​គ្រួសារ​របស់​សកម្មជន​បក្ស​ប្រឆាំង​ទាំង​នោះ។ លោក​​មេធាវី​ថ្លែង​ថា លោក​ពិបាក​ពន្យល់​ករណី​ ឬ​លិខិតស្នាម​នេះ​ណាស់ ដោយសារ នេះ​ជា​ករណី​នយោបាយ។ តែ​គិត​ត្រឹម​ម៉ោង​ជាង​ ៣រសៀល ថ្ងៃ​ទី​១៤ វិច្ឆិកា កូន​ក្ដី​​របស់​លោក​មេធាវី​ ជួង ជូងី ចំនួន​ ៣​នាក់​ហើយ ត្រូវ​បាន​ដោះលែង គឺ​នៅ​ខេត្ត​កំពត ២នាក់ មាន​លោក នុត​ ពេជ្រ និង​អ្នក​ស្រី ប៉ែន មុំ និង​ម្នាក់​ទៀត នៅ​ខេត្ត​ក្រចេះ អ្នកស្រី ទ្រី ស៊ាងអ៊ី។ លោក​ថា កូន​ក្ដី មួយ​ចំនួន​ទៀត នៅ​ខេត្ត​កណ្ដាល និង​ខេត្ត​ឧត្តរ​មាន​ជ័យ តុលាការ​កំពុង​ធ្វើការ​ដោះលែង​៖ «»

តាម​គណបក្ស​សង្គ្រោះ​ជាតិ យ៉ាង​ហោច​ណាស់ មាន​សកម្មជន​ និង​អ្នក​គាំទ្រ​គណ​បក្ស​ប្រឆាំង​ជាង​៨០​នាក់ ត្រូវ​បាន​របប​ក្រុង​ភ្នំពេញ ចាប់​ខ្លួន ក្នុង​ករណី​នយោបាយ​ ក្នុង​រយៈ​ពេល​ជាង ១១ខែ ក្នុង​ឆ្នាំ២០១៩ នេះ។ ​ចំណែក​សកម្មជន​ចំនួន ១៩៩​នាក់​ផ្សេង​ទៀត មាន​ដីកា​ចាប់​ខ្លួន និង​កោះហៅ​ របស់​តុលាការ និង​ប៉ូលិស​ប៉ុស្តិ៍៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Stop say what do am wrong??????with tell other stop do bad karma to others...justice in hell

Who will joins to ICC with HSen world famous most wanted????do good karma u deserve good karma,if u do bad karma there will deserve bad karma"inner cycle"and justice must be deserve it.

Nov 15, 2019 05:14 PM

គេហទំព័រ​ទាំងមូល