អង្គការ និង​សហជីព រក​ឃើញ​ថា កម្មករ​ធ្វើ​ការ​ងារ​រហូត​ដល់​ជំពាក់​បំណុល​វ័ណ្ឌ​ក និង​គ្មាន​លទ្ធភាព​សង​វិញ

ដោយ ខែ សុណង
2020-06-30
អ៊ីម៉ែល
មតិ
Share
បោះពុម្ព
កម្មករ​ កម្មការិនី​ចេញ​ពី​រោងចក្រមួយ នៅ​តាម​ផ្លូវ​ទំនប់​កប់ស្រូវ ខាង​លិច​រាជធានី​ភ្នំពេញ ថ្ងៃ​ទី១៣ ខែកុម្ភៈ ឆ្នាំ២០២០។
កម្មករ​ កម្មការិនី​ចេញ​ពី​រោងចក្រមួយ នៅ​តាម​ផ្លូវ​ទំនប់​កប់ស្រូវ ខាង​លិច​រាជធានី​ភ្នំពេញ ថ្ងៃ​ទី១៣ ខែកុម្ភៈ ឆ្នាំ២០២០។
រូប៖ កម្មករ

ក្រុមអង្គការសង្គមស៊ីវិល និង​សហជីព​រក​ឃើញ​​ថា កម្មករ​ធ្វើ​ការ​​ក្នុង​វិស័យ​កាត់ដេរ ​ធ្លាក់​ខ្លួន​​ជំពាក់​បំណុល​វ័ណ្ឌ​ក និង​ គ្មាន​លទ្ធភាព​សង​បំណុល​វិញ ​ទាល់តែ​សោះ នៅ​ក្នុង​ស្ថានភាព​វិបត្តិ​ជំងឺ​កូវីដ១៩ (Covid-19)។ ទោះ​ជា​យ៉ាង​ណា តំណាង​ស្ថាប័ន​មីក្រូ​ហិរញ្ញ​វត្ថុ​ថា របាយការណ៍​នេះ មិន​ឆ្លុះ​បញ្ចាំង​ពី​​​​​​ទិដ្ឋភាព​ទាំង​ស្រុង​នោះ​ទេ។

អង្គការ​លីកាដូ ចេញ​ផ្សាយ​របាយការណ៍​សង្ខេប​មួយ​​​​​ថា កម្មករ​ក្នុង​វិស័យ​កាត់​ដេរ បាន​ធ្វើ​​ការ​ងារ​រហូត​​ដល់​ជំពាក់​​​បំណុល​វ័ណ្ឌក ខណៈ​ កម្មករ​ កំពុង​ប្រឈម​មុខ នឹង​ការ​​​​ខ្ចី​បំណុល​ច្រើន​លើស​លុប​ ជា​បន្ត​ទៀត។

អង្គការ​លីកាដូ លើក​ឡើង​ក្នុង​របាយការណ៍​នេះ​ថា កម្មករ កម្មការិនី​រោង​ចក្រ​កាត់​ដេរ​ រាប់​ម៉ឺន​នាក់​ នៅ​ក្នុង​ប្រទេស​កម្ពុជា​ នឹង​ជួប​ការ​លំបាក​ជា​ខ្លាំង ក្នុង​ការ​សង​បំណុល​មីក្រូ​ហិរញ្ញ​វត្ថុ​ នៅ​ពេល​ដែល​ពួក​គាត់​ត្រូវ​បាន​បញ្ឈប់​ពី​ការ​ងារ ហើយ​រោង​ចក្រ​ដែល​ពួក​គាត់​ធ្វើ​ការ ត្រូវ​ផ្អាក​ដំណើរ​ការ​ដោយ​សារ​បញ្ហា​កូវីដ១៩។ បញ្ហា​នេះ​បង្កើត​ឱ្យ​មាន​វិបត្តិ​រំលោភ​សិទ្ធិ​មនុស្ស​ជា​ច្រើន ដែល​នាំ​ឱ្យ​ពួក​គាត់​ជួប​ការ​លំបាក​ខ្លាំង​ក្នុង​ការ​ផ្គត់​ផ្គង់​ជីវភាព​គ្រួសារ និង​ធ្វើ​ឱ្យ​ការ​កាន់​កាប់​ដី​ធ្លី​របស់​ពួក​គាត់​ត្រូវ​រង​សម្ពាធ​យ៉ាង​ខ្លាំង​ពី​សំណាក់​គ្រឹះ​ស្ថាន​មីក្រូ​ហិរញ្ញវត្ថុ ។ អង្គការ​ដដែល​បន្ត​ថា ប្រសិន​បើ​គ្មាន​កម្ម​វិធី​សម្រាល​បន្ទុក​បំណុល​ភ្លាម​ៗ​ទេ ​នោះ​កម្មករ កម្មការិនី​ទាំង​នេះ នឹង​ត្រូវ​ប្រឈម​នឹង​ការ​លក់​ដី​ឬ​ផ្ទះ កាត់​បន្ថយ​ការ​បរិភោគ​អាហារ ឬ​ខ្ចី​ប្រាក់​កម្ចី​កាន់​តែ​ច្រើន​ឡើង ដើម្បី​យក​ទៅ​សង​បំណុល​ដែល​មាន​ស្រាប់ ។

របាយការណ៍​សង្ខេប​ស្ដីពី​ភាព​ជំពាក់​បំណុល​ច្រើន​លើស​លុប​ក្នុង​វិស័យ​កាត់ដេរ​នៅ​ប្រទេស​កម្ពុជា​នេះ គឺ​អង្គការ​លីកាដូ បាន​ធ្វើ​ការ​រួម​គ្នា​ជាមួយ​​សម្ព័ន្ធ​សហជីព​កម្ពុជា និង​អង្គការ​សង់ត្រាល់ ដោយ​ស្ទង់​មតិ​កម្មករ កម្មការិនី​ ច្រើន​ជាង ១៥០នាក់ នៃ​រោងចក្រ​ចំនួន​៣ ដែល​បាន​​ព្យួរ​ការងារ​កម្មករ​។

ក្នុង​របាយការណ៍​បញ្ជាក់​ថា ក្នុង​ចំណោម​កម្មករ​ កម្មការិនី ដែល​ត្រូវ​បាន​ស្ទង់​មតិ​ទាំង​អស់​ មាន​តែ​៤​នាក់​គត់ ​ដែល​មិន​​ជំពាក់​បំណុល​។ ដោយ​ឡែក​ស្ទើរ​តែ​ទាំង​អស់​នៃ​អ្នក​ដែល​បាន​ស្ទង់​មតិ សុទ្ធ​តែ​​អះអាង​ថា ពួក​គេ​គ្មាន​លទ្ធ​ភាព​សង​បំណុល ​វិញ​ទេ ប្រសិន​បើ​ការ​ងារ​របស់​ពួក​គាត់​បន្ត​ព្យួរ។ កម្មករ កម្មការិនី​ បន្ត​​ថា ជីវភាព​រស់​នៅ ​សព្វ​ថ្ងៃ​ ជួប​ការ​លំបាក​ខ្លាំង​ជាង​ មុន​ពេល​​ជាប់​ជំពាក់​កម្ចី​ឥណ​ទាន។

អ្នក​គ្រប់​គ្រង​កម្មវិធី​សិទ្ធ​ការងារ​នៃ​អង្គការ​សង់ត្រាល់ លោក ឃុន ថារ៉ូ ​ប្រាប់​អាស៊ី​សេរី ​ថា គោល​បំណង​ សំខាន់​នៃ​ការ​ចេញ​ផ្សាយ​របាយការណ៍​នេះ ​គឺ ដើម្បី​ដាក់​ទៅ​រដ្ឋាភិបាល និង​ភាគី​ពាក់ព័ន្ធ ឲ្យ​ជួយ​ដោះ​ស្រាយ ​បញ្ហា​បំណុល​របស់​កម្មករ​ និង​លទ្ធភាព​សង​បំណុល ទៅ​ធនាគារ គ្រឹះស្ថាន​មីក្រូហិរញ្ញវត្ថុ និង​សង​អ្នក​ចង​ការ​ប្រាក់​ក្រៅ​ប្រព័ន្ធ ដែល​វា​បាន​ក្លាយ​ជា​បន្ទុក​ធ្ងន់ធ្ងរ​សម្រាប់​​កម្មករ ក្នុង​ពេល​គ្មាន​ការងារ​ធ្វើ។

លោក ឃុន ថារ៉ូ បន្ត​ថា ​កម្មករ​​​គ្មាន​លទ្ធភាព​ សង​បំណុល​​ ព្រោះ​​ពួកគេ គ្មាន​ប្រាក់​ចំណូល​បន្ថែម​ទៀត ក្រៅ​ពី​ប្រាក់​ឧបត្ថម្ភ ៤០ភាគ​រយ ពី​រដ្ឋាភិបាល និង​ថៅកែ។ លោក​ រក​ឃើញ​​ទៀត​ថា កម្មករ​ខ្លះ ​មិន​បាន​យក​ប្រាក់ ៤០ភាគរយ ស្មើ​ប្រមាណ ៧០ដុល្លារ​នោះ ​ទៅ​ចំណាយ​ជីវភាព​ប្រចាំ​ថ្ងៃ​ទេ ដោយ​​ស៊ូទ្រាំ ​កាត់​បន្ថយ​ការ​ហូប​ចុក និង​រត់​ទៅ​ខ្ចី​ប្រាក់​ពី​ អ្នក​ចង​ការ​ឯក​ជន​បន្ថែម ដើម្បី​​​យក​មក​​សង​បំណុល​ធនាគារ និង​មីក្រូ​ហិរញ្ញ​វត្ថុ​៖«ការ​ហូប​ចុក​របស់​គាត់(កម្មករ) គឺ​មាន​ការ​កាត់​បន្ថយ​ខ្លាំង ដើម្បី​ឲ្យ​គាត់ អាច​មាន​លទ្ធភាព​សន្សំ​លុយ ពី​ការ​កាត់​បន្ថយ​នៃ​ការ​ហូប​ចុក​របស់​គាត់​ហ្នឹង ក្នុង​ការ​ស្វះស្វែង​រក​ និង​កម្ចី​ការប្រាក់​ខាង​ក្រៅ និង​ការ​សន្សំ​តិចតួច​ស្ដួច​ស្ដើង​ ដែល​គាត់​មាន​នឹង បង់​ទៅ​បំណុល​របស់​គាត់ ដែល​គាត់​ជំពាក់​នៅ​មីក្រូ​ហិរញ្ញ​វត្ថុ​ហ្នឹង»

ប្រធាន​សម្ព័ន្ធ​សហ​ជីព​កម្ពុជា អ្នក​ស្រី យ៉ាង សុភ័ណ្ឌ មាន​ប្រសាសន៍​ក្នុង​របាយការណ៍​ថា កម្មករ កម្មការិនី រោង​ចក្រ​កាត់​ដេរ ​បាន​ខិត​ខំ​ធ្វើការ​ងារ​យ៉ាង​ខ្លាំង ដើម្បី​មាន​លទ្ធ​ភាព​ផ្គត់​ផ្គង់​អាហារ​បរិភោគ​ដល់​ក្រុម​គ្រួសារ​របស់​ពួក​គាត់ តែ​ពេល​នេះ ​ពួក​គាត់​ស្ទើរ​តែ​មិន​អាច​មាន​លទ្ធ​ភាព​ចិញ្ចឹម​ខ្លួន​ឯង។ អ្នកស្រី ព្រួយ​បារម្ភ​ថា ប្រសិន​បើ​គ្មាន​កម្ម​វិធី​សម្រាល​បន្ទុក​បំណុល ឬ​កិច្ច​គាំពារ​ផ្នែក​សង្គម​ទេ ​ កម្មករ​នឹង​កាន់​តែ​​ជួប​ការ​លំបាក​កាន់​តែ​ខ្លាំង​ឡើងៗ។

ឆ្លើយ​តប​របាយការណ៍​នេះ ប្រធាន​ទំនាក់ទំនង និង​ជា​អ្នក​នាំ​ពាក្យ​សមាគម​មីក្រូហិរញ្ញវត្ថុ លោក កាំង តុងងី មាន​ប្រសាសន៍​ថា ខាង​សមាគម​បាន​ទទួល​របាយការណ៍​នេះ​ហើយ និង​យល់​ថា របាយការណ៍​នេះ មិន​ឆ្លុះ​បញ្ចាំង​ពី​ទិដ្ឋភាព​ទាំង​ស្រុង និង​ពិបាក​ឲ្យ​ជឿ​ថា ពិត​ប្រាកដ ឬ​អត់។ លោក កាំង តុងងឺ បន្ត​ថា ខាង​សមាគម​ទទួល​ស្គាល់​ថា កំឡុង​ពេល​នេះ​ពលរដ្ឋ​ខ្មែរ និង​កម្មករ កំពុង​ជួប​ប្រទះ​វិបត្តិ​ផ្សេងៗ ដោយ​សារ​ជំងឺ​កូវីដ១៩ តែ​ខាង​សមាគម​កំពុង​ជួយ​គ្រប់​អតិថិជន ដែល​ភាគច្រើន​ជា​កម្មករ​រោងចក្រ។

លោក​ឲ្យ​ដឹង​ថា អតិថិជន​របស់​គ្រឹះស្ថាន​មីក្រូ​ហិរញ្ញវត្ថុ​ជាង​ពីរ​សែន ពីរ​ម៉ឺន (២២០.០០០) នាក់​ បាន​រៀបចំ​កម្ចី​សារ​ឡើង​វិញ ឬ​ទទួល​បាន​ការ​ផ្អាក​​សង​បំណុល​ ដោយ​សារ​វិបត្តិ​ជំងឺ​កូវីដ១៩ ហើយ​ភាគច្រើន​គឺជា​កម្មករ​ជួប​វិបត្តិ​កូវីដ១៩។ ​លោក​ កាំង តុងងឺ​ ជំរុញ​ឲ្យ​កម្មករ​ ដែល​បន្ត​រង​ផល​ប៉ះពាល់​​ពី​​វិបត្តិ​ជំងឺ​កូវីដ១៩ ស្នើសុំ​ទៅ​​មីក្រូ​ហិរញ្ញ​វត្ថុ​សាមី ដើម្បី​រៀបចំ​កម្ចី​សារ​ឡើងវិញ៖ «ហើយ​យើង​ឃើញ​ថា បើ​ទោះ​ជា​ក្នុង​ឥណទាន​មួយ​ចំនួន ដែល​យើង​តម្រូវ​ឲ្យ​អតិថិជន​ដាក់​ប្លង់​បញ្ចាំ ឬ​ក៏​ទ្រព្យ​បញ្ចាំ​ គឺ​យើង​យក​តែ​ឯកសារ​ទេ។ ដោយ​ឡែក​ទ្រព្យ​សម្បត្តិ​ ដែល​ជា​ទ្រព្យ​បញ្ចាំ​ទាំង​អស់ គឺ​អតិថិជន​ គាត់​នៅ​តែ​ប្រើប្រាស់​ដដែល។ យើង​ធ្វើ​កន្លង​មក គឺ​ជា​អ្វី​ គិត​ថា យើង​បាន​ធ្វើ​ច្រើន​មក​ហើយ ហើយ​ជា​ពិសេស​ការ​រៀបចំ​ឥណទាន​ឡើងវិញ​​នេះ គឺ​ថា ក្នុង​រយៈ​ពេល ៣ខែ តាំង​ពី​ខែ​មីនា​មក យើង​បាន​ធ្វើ​រឿង​នេះ យ៉ាង​សកម្ម​មែន​ទែន​ជាមួយ​សមាជិក​របស់​យើង»

លោក ឃុន ថារ៉ូ ប្រាប់​ថា អង្គការ និង​សហជីព នឹង​បញ្ជូន​របាយការណ៍​នេះ ទៅ​រដ្ឋាភិបាល និង​ភាគី​ពាក់ព័ន្ធ ដើម្បី​ស្នើសុំ​ឲ្យ​រក​ដំណោះស្រាយ​រួម​គ្នា​ ជួយ​ដល់​កម្មករ​វិស័យ​កាត់ដេរ ដែល​កំពុង​គ្មាន​លទ្ធភាព​សង​បំណុល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល