ពលរដ្ឋ​និង​សង្គម​ស៊ីវិល​បារម្ភ​ពី​បញ្ហា​អសន្តិសុខ​បង្ក​ដោយ​ជន​បរទេស​ខ្លះ​នៅ​ខេត្ត​ព្រះសីហនុ

ដោយ ដែន អយុធ្យា
2015-02-27
អ៊ីម៉ែល
មតិ
Share
បោះពុម្ព
ឆ្នេរ​អូរឈើទាល ខេត្ត​ព្រះសីហនុ នា​ពេល​រាត្រី កាល​ពី​ថ្ងៃ​ទី​១៧ ខែ​តុលា ឆ្នាំ​២០១៤។
ឆ្នេរ​អូរឈើទាល ខេត្ត​ព្រះសីហនុ នា​ពេល​រាត្រី កាល​ពី​ថ្ងៃ​ទី​១៧ ខែ​តុលា ឆ្នាំ​២០១៤។
RFA/Den Ayuthyea

សមត្ថកិច្ច​ខេត្ត​ព្រះសីហនុ កំពុង​ស៊ើប​អង្កេត​បទល្មើស​ផ្ទុះ​អាវុធ កាល​ពី​ម៉ោង​ជាង ១១​យប់ ថ្ងៃ​ទី​២៦ ខែ​កុម្ភៈ នៅ​ម្តុំ​រង្វល់​មូល​តោ​ពីរ ដែល​គេ​សង្ស័យ​ថា​មាន​ជាប់​ពាក់ព័ន្ធ​នឹង​ជន​បរទេស​ពីរ​ក្រុម។ ក្នុង​ហេតុការណ៍​ផ្ទុះ​អាវុធ​នោះ បណ្ដាល​ឲ្យ​បុរស​ជនជាតិ​ខ្មែរ​ម្នាក់​រស់នៅ​ក្បែរ​នោះ​រង​របួស​ធ្ងន់។

​មន្ត្រី​សង្គម​ស៊ីវិល និង​ពលរដ្ឋ​មួយ​ចំនួន បាន​សម្ដែង​ក្តី​បារម្ភ​ពី​បញ្ហា​អសន្តិសុខ អំពើ​ហិង្សា និង​បទល្មើស​ផ្ទុះ​អាវុធ ដែល​តែង​បង្ក​ឡើង​ដោយ​ជន​បរទេស។

ស្នងការ​នគរបាល​ខេត្ត​ព្រះសីហនុ លោក ស៊ាង កុសល មាន​ប្រសាសន៍​ថា កំពុង​សួរ​នាំ​ជន​រងគ្រោះ និង​ស៊ើប​អង្កេត​លើ​ករណី​បាញ់​បោះ​សេរី កាល​ពី​យប់​ថ្ងៃ​ទី​២៦ ខែ​កុម្ភៈ នៅ​ម្តុំ​រង្វង់​មូល​តោ​ពីរ​ពី​ជន​រងគ្រោះ​ជនបរទេស ដែល​បាន​មក​ដាក់​ពាក្យ​បណ្ដឹង​នៅ​ស្ថាប័ន​នេះ មុន​នឹង​ឈាន​ដល់​ចាប់​ខ្លួន​ជនល្មើស។

លោក​បន្ត​ថា អាជ្ញាធរ​នៅ​មិន​ទាន់​កំណត់​មុខ​សញ្ញា​ជនល្មើស ឬ​ជន​សង្ស័យ​បាន​ច្បាស់លាស់​ទេ និង​ស្នើសុំ​ពេលវេលា​ទុក​ឲ្យ​សមត្ថកិច្ច​បើក​ការ​ស៊ើប​អង្កេត​បទល្មើស​ផ្ទុះ​អាវុធ​បង្ក​ដោយ​ជន​បរទេស នា​មូលដ្ឋាន​នេះ​ជា​មុន​សិន មុន​នឹង​ផ្សព្វផ្សាយ​ជា​សាធារណៈ។

ចំណែក លោក ហេង ប៊ុនទី មេបញ្ជាការ​កង​រាជ​អាវុធហត្ថ​ខេត្ត​ព្រះសីហនុ មាន​ប្រសាសន៍​ប្រាប់​វិទ្យុ​អាស៊ីសេរី ថ្មីៗ​នេះ​ថា សមត្ថកិច្ច​លោក​បាន​ខិតខំ​រក្សា​សន្តិសុខ និង​រក្សា​សុវត្ថិភាព​ជូន​ប្រជាពលរដ្ឋ និង​ភ្ញៀវ​ទេសចរ​ដែល​ចូល​មក​ទស្សនា​ខេត្ត​ទេសចរណ៍​មួយ​នេះ​ទាំង​យប់​ថ្ងៃ មិន​ធ្វេសប្រហែស​ទេ។ ជាង​នេះ លោក​ក៏​បាន​ស្នើ​ដល់​ប្រជាពលរដ្ឋ​ត្រូវ​ផ្តល់​ព័ត៌មាន​ពិត​ពី​ទីតាំង ឬ​មុខ​សញ្ញា​របស់​ជនល្មើស​មក​កម្លាំង​កង​រាជ​អាវុធហត្ថ​របស់​លោក​ឲ្យ​បាន​ទាន់​ពេលវេលា ទាក់ទង​បទល្មើស​អ្វី​មួយ ដើម្បី​ឈាន​ដល់​បង្ក្រាប ឬ​ចាប់​ខ្លួន​បាន​ទាន់​ពេលវេលា។

ទោះ​យ៉ាង​ណា មន្ត្រី​សង្គម​ស៊ីវិល និង​ប្រជាពលរដ្ឋ​មួយ​ចំនួន​នា​ខេត្ត​ព្រះសីហនុ បាន​អះអាង​ថា ជន​បរទេស​កំពុង​ធ្វើ​សកម្មភាព​ហិង្សា​មាន​កាប់​ចាក់ និង​ឈាន​ដល់​ប្រើ​អាវុធ​បាញ់​ប្រហារ​គ្នា​យ៉ាង​អនាធិបតេយ្យ​នា​មូលដ្ឋាន​នេះ ចាប់​ពី​ខែ​កុម្ភៈ មក ប៉ុន្តែ​សមត្ថកិច្ច​នគរបាល ឬ​កង​រាជ​អាវុធហត្ថ​ជាដើម ទប់ស្កាត់​មិន​ទាន់​មាន​ប្រសិទ្ធភាព​ទេ។

មន្ត្រី​ស៊ើប​អង្កេត​អង្គការ​លីកាដូ (Licadho) ខេត្ត​ព្រះសីហនុ លោក ឃុន សាវឿន បាន​ឲ្យ​ដឹង​នៅ​សុក្រ ថ្ងៃ​ទី​២៧ ខែ​កុម្ភៈ ថា អាច​ដោយសារ​តែ​ការ​អនុវត្ត​ការងារ​របស់​កម្លាំង​សមត្ថកិច្ច​នគរបាល កង​រាជ​អាវុធហត្ថ ឬ​ការ​ដឹក​នាំ​របស់​ថ្នាក់​ដឹក​នាំ​ខេត្ត​ព្រះសីហនុ មាន​ភាព​ធូរ​រលុង ឬ​គ្រប់គ្រង​មិន​ដិតដល់ ទើប​បទល្មើស​ផ្សេងៗ​បាន​បន្ត​កើត​មាន​ជា​បន្តបន្ទាប់។ លោក​បន្ត​ថា កន្លង​មក​បទល្មើស​ចោរ​ឆក់​កាបូប ចោរ​លួច​ម៉ូតូ ឬ​ឈាន​ដល់​ជនល្មើស​ធ្វើ​សកម្មភាព​ប្លន់​អាជីវករ​ដូរ​លុយ ឬ​លក់​មាស​នៅ​តាម​ផ្លូវ​សាធារណៈ បាន​កើត​ឡើង​ជា​បន្តបន្ទាប់ និង​កម្រ​ឃើញ​សមត្ថកិច្ច​បង្ក្រាប ឬ​ចាប់​ជនល្មើស​បាន​ទាន់​ពេលវេលា​ណាស់។

ក្រៅ​ពី​នេះ លោក ឃុន សាវឿន បាន​សង្កត់​ធ្ងន់​ថា សព្វថ្ងៃ​នេះ​ខេត្ត​ព្រះសីហនុ ក៏​កើត​មាន​ករណី​ជន​បរទេស​ជាច្រើន​ក្រុម បាន​បើក​ការ​វាយ​ប្រហារ​គ្នា​ដោយ​កាំភ្លើង ឬ​កាំបិត​ជាដើម បាន​កើត​មាន​ជាច្រើន​ករណី ហើយ​សកម្មភាព​ផ្ទុះ​អាវុធ ឬ​ប្រើ​ហិង្សា​នេះ បាន​បន្ត​រីក​រាលដាល​ពី​មួយ​ថ្ងៃ​ទៅ​មួយ​ថ្ងៃ ទោះ​បី​សមត្ថកិច្ច​ខេត្ត​នេះ​បាន​ចាប់​ខ្លួន​ជន​សង្ស័យ​មួយ​ចំនួន បញ្ជូន​ទៅ​កាន់​តុលាការ និង​ឃុំ​ខ្លួន​បែប​ណា​ក្តី។

ភាព​អនាធិបតេយ្យ​នៃ​ការ​ប្រើ​អំពើ​ហិង្សា​ផ្ដើម​ដោយ​ជន​បរទេស​នៅ​លើ​ទឹក​ដី​ខ្មែរ​នា​ខេត្ត​ព្រះសីហនុ លោក ឃុន សាវឿន បាន​ស្នើ​ដល់​លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ និង​លោក​នាយ​ឧត្តមសេនីយ៍ សៅ សុខា មេបញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស ជួយ​មាន​វិធានការ​ជា​បន្ទាន់ ព្រោះ​សកម្មភាព​របស់​ជន​បរទេស​ដែល​ភាគ​ច្រើន​បង្ក​ដោយ​ជន​បរទេស ឬ​ហៅ​ថា​ក្រុម​ម៉ាហ្វីយ៉ា​ឆ្លង​ដែន​ទាំង​នេះ បាន​ធ្វើ​សកម្មភាព​មិន​ខ្លាច​ញញើត​កម្លាំង​សមត្ថកិច្ច​ខេត្ត​នេះ​ទេ​នា​ពេល​កន្លង​ទៅ។

បញ្ហា​នេះ ទាំង​មន្ត្រី​សង្គម​ស៊ីវិល និង​ពលរដ្ឋ​ខេត្ត​ព្រះសីហនុ បាន​អះអាង​ថា ជម្លោះ​បង្ក​ដោយ​ជន​បរទេស នៅ​ក្នុង​ខែ​កុម្ភៈ ឆ្នាំ​២០១៥ នេះ បាន​កើត​មាន​ចន្លោះ​ពី ២ ទៅ ៣​ករណី ហើយ​បទល្មើស​ទាំង​នេះ ជន​សង្ស័យ ឬ​ជនល្មើស​បាន​ប្រើ​កាំភ្លើង និង​កាំបិត​សម្រាប់​បង្ក​ហិង្សា។ ជម្លោះ​ផ្ដើម​ដោយ​ជន​បរទេស សមត្ថកិច្ច​នគរបាល​ខេត្ត​ព្រះសីហនុ ក៏​បាន​បើក​កិច្ច​ប្រតិបត្តិការ និង​ឆែកឆេរ​លំនៅឋាន​ជន​សង្ស័យ និង​ឃាត់​ខ្លួន​ជន​បរទេស ២​នាក់ បញ្ជូន​ទៅ​តុលាការ និង​ឃុំ​ខ្លួន​ក្នុង​ពន្ធនាគារ​បណ្ដោះអាសន្ន។ ក្នុង​នោះ សមត្ថកិច្ច​ក៏​បាន​រក​ឃើញ​កាំបិត និង​កាំភ្លើង​ជាច្រើន​ដើម​នៅ​ក្នុង​វីឡា​ជួល​ធំ​ស្កឹមស្កៃ​របស់​ជន​សង្ស័យ​​ជា​ជន​បរទេស​មួយ​ចំនួន​ផង។

យ៉ាង​ណា​ក៏ដោយ នៅ​ក្នុង​ប៉ុន្មាន​ថ្ងៃ​មក​នេះ បន្ទាប់​ពី​ថ្នាក់​ដឹក​នាំ​ខេត្ត​ព្រះសីហនុ បាន​បដិសេធ​បិទ​មិន​ឲ្យ​ក្រុមហ៊ុន​កាហ្សានធីប (Kazantip) របស់​ក្រុមហ៊ុន​បរទេស​មួយ​ដែល​ស្នើសុំ​បង្កើត​កម្មវិធី​ប្រគំ​តន្ត្រី​កម្សាន្ត​រយៈពេល ១០​ថ្ងៃ ចាប់​ពី​ថ្ងៃ​ទី​១៨ ដល់​ថ្ងៃ​ទី​២៨ ខែ​កុម្ភៈ នៅ​លើ​កោះពស់ ឋិត​ក្នុង​សង្កាត់​លេខ​៣ ក្រុង​ព្រះសីហនុ រួច​មក គេ​ឃើញ​មាន​សកម្មភាព​ចាក់​ភ្លេង​រាំ​ច្រៀង​តាម​រូបភាព​ផ្សេងៗ​របស់​ជន​បរទេស​នៅ​តាម​ឆ្នេរ​សមុទ្រ​មួយ​ចំនួន មាន​ឆ្នេរ​អូរត្រេះ និង​ឆ្នេរ​កាំសាប ជាដើម។ សកម្មភាព​នេះ សមត្ថកិច្ច​ចាត់​ទុក​ជា​សកម្មភាព​អនាធិបតេយ្យ ឬ​ខុស​ច្បាប់ និង​បាន​ចុះ​បិទ​ការ​ចាក់​ភ្លេង​រំខាន​ដល់​អ្នក​ជិត​ខាង​របស់​ជន​បរទេស​ទាំង​នោះ​នៅ​ទីកន្លែង​ពីរ​ផ្សេង​គ្នា។

បន្ទាប់​ពី​សមត្ថកិច្ច​ខេត្ត​ព្រះសីហនុ បាន​ចុះ​បិទ​ទីកន្លែង​រាំ​ច្រៀង​គ្មាន​ច្បាប់​ទម្លាប់​មួយ​ចំនួន​របស់​ជន​បរទេស កាល​ពី​សប្ដាហ៍​មុន ប៉ុន្តែ​កាល​ពី​ថ្ងៃ​ទី​២៦ ខែ​កុម្ភៈ លោក នូ សុផល ប្រធាន​មន្ទីរ​ទេសចរណ៍ ខេត្ត​ព្រះសីហនុ បាន​ចុះ​ហត្ថលេខា​ភ្លាមៗ​ទៅ​លើ​សំណើ​សុំ​រៀបចំ​កម្មវិធី​លក់​ម្ហូប​អាហារ​ខ្មែរ និង​ចាក់​ភ្លេង​កម្សាន្ត​ជូន​ភ្ញៀវ​ទេសចរ​ជាតិ និង​អន្តរជាតិ នៅ​ភោជនីយដ្ឋាន​មរកត​ស៊ីសាយ មាន​ទីតាំង​នៅ​ឆ្នេរ​កាំសាប ក្បែរ​សាលា​ខេត្ត​ព្រះសីហនុ ទៅ​តាម​សំណើ​សុំ​របស់ លោក ហ៊ី ប៊ុនឆី ជា​ម្ចាស់​កម្មវិធី​ដែល​បាន​ដាក់​លិខិត​ស្នើ​ចុះ​ថ្ងៃ​ទី​២៥ ខែ​កុម្ភៈ។

នៅ​ក្រោយ​មួយ​ថ្ងៃ​នៃ​សំណើ​ស្នើសុំ​នេះ លោក នូ សុផល ក៏​បាន​ចុះ​ហត្ថលេខា​យល់ព្រម ដោយ​អនុញ្ញាត​ឲ្យ លោក ហ៊ី ប៊ុនឆី អាច​រៀបចំ​កម្មវិធី​កម្សាន្ត ឬ​លក់​ម្ហូប​ខ្មែរ​នេះ ចាប់​ពី​ថ្ងៃ​ទី​២៦ ខែ​កុម្ភៈ រហូត​ដល់​ថ្ងៃ​ទី​៩ ខែ​មីនា ឆ្នាំ​២០១៥។ ការ​ចាក់​ភ្លេង​កំដរ​ភ្ញៀវ​នេះ ឃើញ​មាន​តែ​ជន​បរទេស​ទេ​បាន​ចូល​លេង និង​រាំ​ច្រៀង​ផឹក​ស៊ី​ទាំង​យប់​ទាំង​ថ្ងៃ។ ពួក​គេ​ឋិត​ក្នុង​សភាព​ស្រវឹង​ជោគជាំ និង​អាសអាភាស។

បញ្ហា​នេះ មន្ត្រី​សង្គម​ស៊ីវិល និង​ប្រជាពលរដ្ឋ​ភាគ​ច្រើន​នា​ខេត្ត​ព្រះសីហនុ បង្ហាញ​អារម្មណ៍​មិន​ពេញ​ចិត្ត​ចំពោះ​ការ​អនុញ្ញាត​ឲ្យ​មាន​ពិធី​រាំរែក​អាសអាភាស និង​ការ​រៀបចំ​ប្រគំ​តន្ត្រី​ផ្សេងៗ​តាម​ឆ្នេរ​នា​ខេត្ត​ព្រះសីហនុ ដែល​បាន​បង្កើត​ឲ្យ​មាន​អំពើ​ហិង្សា​ឈាន​ដល់​កាប់​ចាក់ និង​បាញ់​បោះ​សេរី​ក្នុង​ប៉ុន្មាន​ថ្ងៃ​មក​នេះ។ ប៉ុន្តែ​ទោះ​យ៉ាង​ណា ក៏​មាន​មនុស្ស​មួយ​ចំនួន ពិសេស​មន្ត្រី​ក្រសួង ឬ​មន្ទីរ​ទេសចរណ៍​ខេត្ត​ព្រះសីហនុ បាន​គាំទ្រ និង​ពេញ​ចិត្ត​ការ​បង្កើត​ឲ្យ​មាន​កម្មវិធី​ប្រគំ​តន្ត្រី​រាំ​ច្រៀង​នៅ​តាម​ឆ្នេរ​មួយ​ចំនួន​នា​ខេត្ត​ព្រះសីហនុ ព្រោះ​យល់​ថា អាច​ជា​ការ​ទាក់ទាញ​ចំនួន​ភ្ញៀវ​ទេសចរ​ឲ្យ​ចូល​មក​ទស្សនា​ប្រទេស​កម្ពុជា ពិសេស​តំបន់​ឆ្នេរ​ខេត្ត​ព្រះសីហនុ ឲ្យ​បាន​ច្រើន​ថែម​ទៀត​នា​ថ្ងៃ​អនាគត។

ប៉ុន្តែ ទន្ទឹម​គ្នា​នោះ លោក នូ សុផល ប្រធាន​មន្ទីរ​ទេសចរណ៍​ខេត្ត​ព្រះសីហនុ ក៏​បាន​ដាក់​លក្ខខណ្ឌ​ចំនួន ៤​ចំណុច​ជូន លោក ហ៊ី ប៊ុនធី ជា​ម្ចាស់​កម្មវិធី​លក់​មុខ​ម្ហូប​ខ្មែរ និង​មាន​ចាក់​ភ្លេង​កំដរ​ភ្ញៀវ​នៅ​ឆ្នេរ​កាំសាប ត្រូវ​អនុវត្ត​ឲ្យ​មាន​ប្រសិទ្ធភាព​រួម​មាន ត្រូវ​ធានា​មិន​ធ្វើ​ឲ្យ​ប៉ះពាល់​ដល់​វប្បធម៌ និង​ប្រពៃណី​ជាតិ​ខ្មែរ ដោយ​មិន​ត្រូវ​អនុញ្ញាត​ឲ្យ​មាន​ការ​រាំ​ស្រាត លេង​ល្បែង​ស៊ី​សង អំពើ​អាសអាភាស និង​ការ​ប្រើប្រាស់​គ្រឿង​ញៀន​ជា​ដាច់​ខាត។ ជាង​នេះ ក៏​ត្រូវ​សហការ​ជាមួយ​អាជ្ញាធរ​មាន​សមត្ថកិច្ច ដើម្បី​ធានា​ការពារ​សន្តិសុខ សុវត្ថិភាព និង​សណ្ដាប់ធ្នាប់​ជូន​ភ្ញៀវ និង​មិន​ត្រូវ​ធ្វើ​ឲ្យ​ប៉ះពាល់ ឬ​រំខាន​ដល់​ប្រជាពលរដ្ឋ​រស់នៅ​ជិត​ខាង​ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល