ប្អូនស្រី​បង្កើត​លោក ហ៊ុន សែន រង​ការ​រិះគន់​ដែល​យក​កូន​ក្រពើ​លែង​ក្នុង​កសិណ​អង្គរ

ដោយ ម៉ៅ សុធានី
2019-11-08
អ៊ីម៉ែល
មតិ
Share
បោះពុម្ព
​ប្អូនស្រី​បង្កើត​របស់​លោក​នាយក​រដ្ឋមន្ត្រី ហ៊ុន សែន គឺ​អ្នកស្រី ហ៊ុន ស៊ីណាត។
​ប្អូនស្រី​បង្កើត​របស់​លោក​នាយក​រដ្ឋមន្ត្រី ហ៊ុន សែន គឺ​អ្នកស្រី ហ៊ុន ស៊ីណាត។
Photo courtesy

ក្រុម​មគ្គុទ្ទេសក៍​អង្គរ និង​ពលរដ្ឋ​រស់នៅ​ក្រុង​សៀមរាប ហួសចិត្ត​នៅ​គ្រា​ដែល​ប្អូនស្រី​បង្កើត​របស់​លោក​នាយក​រដ្ឋមន្ត្រី ហ៊ុន សែន គឺ​អ្នកស្រី ហ៊ុន ស៊ីណាត ដែល​លែង​កូន​សត្វ​ក្រពើ ចូល​ក្នុង​ទឹក​កសិណ​អង្គរវត្ត កាលពីដើម​សប្ដាហ៍​នេះ​។ ពួកគេ​បារម្ភ​ថា ទង្វើ​នេះ​មិន​ផ្ដល់​ផល​ចម្រើន​ដល់​សង្គម​នោះ​ទេ ផ្ទុយទៅវិញ​នឹង​បង្ក​គ្រោះថ្នាក់​ដល់​អាយុជីវិត​មនុស្ស​នៅ​ថ្ងៃ​អនាគត។

ក្រុម​មគ្គុទ្ទេសក៍​អង្គរ និង​ពលរដ្ឋ​សម្ដែង​ការ​មិន​សប្បាយ​ចិត្ត​ទេ ចំពោះ​ករណី​លែង​កូន​ក្រពើ ចូល​ក្នុង​កសិណ​អង្គរវត្ត ដែល​ជា​តំបន់​រមណីដ្ឋាន​ទេសចរ​ប្រវត្តិសាស្ត្រ​ដ៏​ល្បីល្បាញ​លើ​ពិភពលោក​នោះ​។ ប្រតិកម្ម​នេះ គឺ​បន្ទាប់ពី​អ្នកស្រី ហ៊ុន ស៊ីណាត បង្ហោះ​សារ​តាម​ហ្វេសប៊ុក បង្ហាញ​ពី​សកម្មភាព​លែង​កូន​ក្រពើ​ចូល​ទឹក​កសិណ​ទឹក ខាងមុខ​ប្រាសាទ​អង្គរវត្ត។

ប្រធាន​សមាគម​មគ្គុទ្ទេសក៍​អង្គរ​ខេត្ត​សៀមរាប លោក ខៀវ ធី ថ្លែង​ថា ការ​លែង​កូន​ក្រពើ​ចូល​ក្នុង​ទឹក​កសិណ​អង្គរ​បែបនេះ ជា​រឿង​មិន​អាច​ទទួល​យក​បាន​នោះ​ទេ​។ លោក​ព្យាករ​ថា ៣​ឆ្នាំក្រោយ កូន​ក្រពើ​នឹង​ធំ​ឡើង នឹង​បង្ក​គ្រោះថ្នាក់​ដល់​ភ្ញៀវ​ទេសចរ និង​ពលរដ្ឋ​រស់នៅ​តំបន់​នោះ ដែល​តែង​ចុះ​មុជទឹក និង​លាង​ដៃជើង​មាត់ច្រាំង​កសិណ​អង្គរ៖ «មិន​អាច​ទទួល​យក​បាន​ទេ ប្អូន! ក្រពើ​វា​គ្រោះថ្នាក់ ពេល​អនាគត​ទៅ​។ ក្រពើ​វា​ធំ​ទៅ​អ្នកណា​ច្រឡំ​ចុះ​លាងដៃ ជើង ក្រពើ​អាច​ខាំ​គ្រោះថ្នាក់​។ មិន​គួរ​ណា យក​ក្រពើ​នៅ​តំបន់​កសិណ​អង្គរ​ទេ​ប្អូន។ បើ​អ្នក​ទេសចរ​មក​តែ​ខ្លួនឯង ចុះ​លាង​ដៃជើង ក្រពើ​អាច​ខាំ គ្រោះថ្នាក់»

អាស៊ីសេរី​បាន​ព្យាយាម​ទាក់ទង អភិបាលខេត្ត​សៀមរាប លោក ទៀ សីហា និង​អ្នកនាំពាក្យ​អាជ្ញាធរ​អប្សរា តែ​ទូរស័ព្ទ​ហៅ​ចូល​ច្រើនដង គ្មាន​អ្នកទទួល​នៅ​ថ្ងៃ​ទី​៨ វិច្ឆិកា។

តែ​ទោះ​យ៉ាងណា អភិបាលខេត្ត​សៀមរាប លោក ទៀ សីហា បាន​ថ្លែង​​ថា អាជ្ញាធរ​ខេត្ត​ជំរុញ​អាជ្ញាធរ​ពាក់ព័ន្ធ ឱ្យ​សហការ​ជាមួយ អាជ្ញាធរ​អប្សរា រក​មធ្យោបាយ​ស្វែងរក ចាប់​កូន​ក្រពើ​នោះ​មក​វិញ។ លោក​ថា កូន​ក្រពើ​នោះ ប្រវែង​បណ្ដោយ​ប្រហែល ៤០​សង់ទីម៉ែត្រ និង​មិន​ទាន់​ចល័ត​ចេញពី​កសិណ​អង្គរ​នៅឡើយ​ទេ ហើយ​វា​អាច​នឹង​រក​ចំណី​នៅ​ពេល​យប់​តាម​មាត់ច្រាំង​កសិណ​អង្គរ​។ លោក​បញ្ជាក់​ថា មន្ត្រី​ជំនាញ​នឹង​រក​មធ្យោបាយ​ចាប់​វា​មកវិញ ដោយ​ការ​ដាក់​សន្ទូច អូស​មង និង​ឆ្លុះ​នៅ​ពេល​យប់​ជាដើម។

ពលរដ្ឋ​រស់នៅ​ក្រុង​សៀមរាប លោក វិន ភារម្យ គិតថា ផ្ទៃ​ទឹក​កសិណ​អង្គរ​ធំធេង មន្ត្រី​ជំនាញ​មិន​ងាយ​ចាប់​កូន​ក្រពើ​នោះ​បាន​មកវិញ​ទេ​។ លោក​បារម្ភ​ថា បើ​អាជ្ញាធរ​រក​កូន​ក្រពើ​នេះ​មិន​ឃើញ រយៈពេល ៣​ឆ្នាំក្រោយ វា​នឹង​ធំ​ឡើង នឹង​បង្ក​គ្រោះ​ដល់​អាយុជីវិត​ក្មេងៗ ដែល​តែង​ចុះ​មុជទឹក ក្នុង​កសិណ​អង្គរ​។ លោក​ថា មាន​ប្រជាជន​ជាច្រើន​ប្រតិកម្ម​រឿង​នេះ និង​ស្នើសុំ​អាជ្ញាធរ​ឱ្យ​អប្សរា​រក​វិធានការ​ចាប់​កូន​ក្រពើ​នោះ​មក​វិញ ដើម្បី​បញ្ចៀស​គ្រោះថ្នាក់​នៅ​ថ្ងៃ​អនាគត​៖ «ក្រពើ​ប្រលែង ២ ទៅ​៣ ឆ្នាំ វា​ធំ វា​ធំ​វា​អាច​ប៉ះពាល់​ដល់​កូនក្មេង វា​អត់​ដឹង​ចុះ​មុជទឹក​។ ប្រជាជន​គេ​ប្រតិកម្ម​គ្រប់គ្នា គេ​ធ្លាប់តែ​ប្រលែង​ត្រី ហើយ​ណាមួយ​ទៀត ក្មេងៗ​តែ​មុជ​ទឹក​នៅ​កសិណ​អង្គរ»

ពលរដ្ឋ និង​ក្រុម​មគ្គុទ្ទេសក៍​អង្គរ ស្នើ​ឱ្យ​អាជ្ញាធរ​អប្សរា គួរតែ​ដាក់​ស្លាក​សញ្ញា ហាមឃាត់​មិន​ឱ្យ​មាន​ករណី​នេះ ក្រោយៗ​ទៀត​។ រហូតមកដល់​នៅ​ល្ងាច​ថ្ងៃ​ទី​៨ ខែ​វិច្ឆិកា នេះ អាជ្ញាធរ​ពាក់ព័ន្ធ នៅ​មិនទាន់​ចាប់​កូន​ក្រពើ​នេះ​បាន​មកវិញ​នៅឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

នេះជាឧក្រិដ្ឋជនឬទេ?

Nov 08, 2019 09:39 PM

stupid,bully,lunatic,evil without shame

It's so weirdness that some of evil Hun Sen's family create more bad thing that most khmer pple disbelief.Angkor Wat temple is very natural place,integrity,harmoniously,elegant,world unessco's heritage,rich history,and etc.And why she released a crocodile onto that majestic pond?or what the reason?there could be very dangerous to any tourist onlooker,they should release any kinds of pretty fish in there to attract onlookers rather release any kind of dangerous animal in there"no make any sense at all".Remember Hun Sen's daughter Hun Mana who distributed coffins to any old pple rather than give them food,medicine,or shelter that made the whole entire country felt bad and reacted why she did that to the oldest pple?.They need food,medicine,clothes,or shelter as a necessary...There didn't want a coffin"shame on her".

Nov 08, 2019 11:24 AM

គេហទំព័រ​ទាំងមូល