ខ្មែរ​ក្រោម​៧​នាក់​និង​ព្រះសង្ឃ​២​អង្គ​ត្រូវ​វៀតណាម​កាត់​ទោស​ពី​បទ​ក្បត់

តុលាការ​ប្រជាជន​វៀតណាម ខេត្ត​ឃ្លាំង ប្រទេស​វៀតណាម នៅ​ថ្ងៃ​ទី២៧ ខែ​កញ្ញា បាន​កាត់​ទោស​ប្រជាពលរដ្ឋ​ខ្មែរ​ក្រោម​ចំនួន ៩​នាក់ ក្នុង​នោះ​មាន​ព្រះសង្ឃ​ចំនួន ២​អង្គ ឲ្យ​ជាប់​ទោស​ចន្លោះ​ពី ១០​ខែ ទៅ ៦​ឆ្នាំ ពី​បទ​បង្ក​ឲ្យ​ខូចខាត​សណ្ដាប់ធ្នាប់​សាធារណៈ និង​ក្បត់​រដ្ឋាភិបាល​វៀតណាម។
ដោយ ទីន ហ្សាការីយ៉ា
2013-09-27
អ៊ីម៉ែល
មតិ
Share
បោះពុម្ព

ការ​កាត់​ទោស​នេះ នៅ​បន្ទាប់​ពី​ពួក​គាត់​បាន​ជាប់​ឃុំឃាំង​អស់​រយៈពេល​ជិត ៥​ខែ​កន្លង​មក។ ករណី​នេះ អង្គការ​សមាគម​ខ្មែរ​ក្រោម បាន​ដាក់​ញត្តិ​ទៅ​រដ្ឋាភិបាល​វៀតណាម ភ្លាមៗ តាម​រយៈ​ស្ថានទូត​នៅ​ទីក្រុង​ភ្នំពេញ។

ស្ថានទូត​វៀតណាម ប្រចាំ​នៅ​កម្ពុជា បាន​បដិសេធ​ញត្តិ​របស់​អង្គការ​សមាគម​ខ្មែរ​ក្រោម​ជា​ថ្មី​ម្ដង​ទៀត ដែល​ដាក់​ទៅ​នាយក​រដ្ឋមន្ត្រី​នៃ​សាធារណរដ្ឋ​សង្គម​និយម​វៀតណាម ដើម្បី​សុំ​ឲ្យ​ដោះ​លែង​ព្រះសង្ឃ និង​ប្រជាពលរដ្ឋ​ឲ្យ​មាន​សេរីភាព​ឡើង​វិញ។

ប្រធាន​បណ្ដាញ​យុវជន​ខ្មែរ​កម្ពុជា​ក្រោម លោក សឺន ជុំជួន មាន​ប្រសាសន៍​ថា នៅ​ព្រឹក​ថ្ងៃ​ទី២៧ កញ្ញា អង្គការ​សមាគម​ខ្មែរ​ក្រោម បាន​យក​ញត្តិ​ទៅ​ដាក់​នៅ​ស្ថានទូត​វៀតណាម ប្រចាំ​នៅ​ទីក្រុង​ភ្នំពេញ រួម​គ្នា ដើម្បី​សុំ​ឲ្យ​ដោះ​លែង​ព្រះសង្ឃ​ចំនួន​ពីរ​អង្គ និង​ប្រជាពលរដ្ឋ​ចំនួន ៧​នាក់​ទៀត ដែល​តុលាការ​បាន​កាត់​ទោស​ឲ្យ​ជាប់​ពន្ធនាគារ​នោះ ប៉ុន្តែ​ត្រូវ​បាន​ស្ថានទូត​វៀតណាម បដិសេធ។ លោក សឺន ជុំជួន ពន្យល់​ថា មូលហេតុ​ដែល​អាជ្ញាធរ​វៀតណាម ចាប់​ខ្លួន​ព្រះសង្ឃ និង​ប្រជាពលរដ្ឋ​នេះ ដោយសារ​តែ​ព្រះសង្ឃ​ទាំង​នេះ​គ្រោង​បង្កើត​សាលា​រៀន​បង្រៀន​អក្សរ​សាស្ត្រ​ខ្មែរ។

នេះ​មិន​មែន​ជា​លើក​ទី១ ទេ ដែល​ស្ថានទូត​វៀតណាម បដិសេធ​ញត្តិ​របស់​តំណាង​អង្គការ​សមាគម​ខ្មែរ​ក្រោម ចំពោះ​ការ​ស្នើសុំ​ឲ្យ​ដោះ​លែង ឬ​ស្នើ​ឲ្យ​គោរព​សិទ្ធិ​ប្រជាពលរដ្ឋ​ខ្មែរ​​ក្រោម​រស់​នៅ​លើ​ទឹក​ដី​កំណើត​របស់​ខ្លួន​នៅ​ភូមិ​ភាគ​វៀតណាម​ខាង​ត្បូង។ ស្ថានទូត​វៀតណាម បាន​បដិសេធ​ជា​ហូរហែ​មក ដោយ​មិន​បាន​ពន្យល់​ពី​ហេតុផល​ទាំងអស់។

លោក សឺន ជុំជួន អះអាង​ថា អង្គការ​សមាគម​ខ្មែរ​ក្រោម​នឹង​ដាក់​ញត្តិ​ដដែល​នេះ​ទៅ​ក្រសួង​ការ​បរទេស​ខ្មែរ ផ្ញើ​ជូន​លោក​នាយក​រដ្ឋមន្ត្រី​វៀតណាម ជា​ថ្មី​ទៀត ទោះ​បី​ជា​កន្លង​មក ក្រសួង​ការ​បរទេស​ខ្មែរ​មិន​បាន​ឆ្លើយ​តប​ញត្តិ​តំណាង​អង្គការ​សមាគម​ខ្មែរ ដែល​បាន​ដាក់​កាល​ពី​ខែ​មិថុនា ឆ្នាំ​២០១៣ ក្ដី ដើម្បី​សុំ​ឲ្យ​អន្តរាគមន៍​រឿង​នេះ​ក្ដី។

លោក សឺន ជុំជួន អះអាង​ថា នៅ​ព្រឹក​ថ្ងៃ​ទី២៧ កញ្ញា តុលាការ​វៀតណាម ខេត្ត​ឃ្លាំង បាន​បើក​សវនាការ​កាត់​ទោស​ព្រះសង្ឃ​ចំនួន​ពីរ​អង្គ ព្រះនាម លីវ នី និង​ព្រះនាម ថាច់ ធៀន ឲ្យ​ជាប់​ពន្ធនាគារ​ក្នុង​ម្នាក់ៗ​ចំនួន ៦​ឆ្នាំ។ ប្រជាពលរដ្ឋ​ពីរ​នាក់​ទៀត​ឈ្មោះ ថាច់ ភូមិរិន្ទ កាត់​ទោស​ឲ្យ​ជាប់​ពន្ធនាគារ ៣​ឆ្នាំ និង​ឈ្មោះ ថាច់ វណ្ណថា ចំនួន ២​ឆ្នាំ។

ដោយ​ឡែក កាល​ពី​ថ្ងៃ​ទី២៦ កញ្ញា តុលាការ​វៀតណាម បាន​កាត់​ទោស​ប្រជាពលរដ្ឋ​ចំនួន ៥​នាក់​ទៀត ក្នុង​នោះ​មាន​ម្នាក់​កាត់​កំបាំង​មុខ ដោយសារ​តែ​គាត់​ភៀស​ខ្លួន​រត់​គេច​ពី​ការ​ចាប់​ខ្លួន កាល​ពី​ខែ​ឧសភា ឆ្នាំ​២០១៣ មក។ ក្នុង​ចំណោម​អ្នក​ទាំង ៥​នាក់​នេះ តុលាការ​វៀតណាម កាត់​ឲ្យ​ជាប់​ទោស​ក្នុង​ម្នាក់ៗ​ពី ១០​ខែ ទៅ ១២​ខែ ពី​បទ​បង្ក​ឲ្យ​ខូចខាត​សណ្ដាប់ធ្នាប់​សាធារណៈ។

វិទ្យុ​អាស៊ីសេរី មិន​អាច​ទាក់ទង​មន្ត្រី​នាំ​ពាក្យ​ស្ថានទូត​វៀតណាម បាន​ទេ នៅ​ថ្ងៃ​ទី២៧ កញ្ញា ឆ្នាំ​២០១៣។

ព្រះសង្ឃ និង​ប្រជាពលរដ្ឋ​ទាំង ៩​នាក់ ត្រូវ​បាន​អាជ្ញាធរ​វៀតណាម ចាប់​ខ្លួន​កាល​ពី​ខែ​ឧសភា ឆ្នាំ​២០១៣ មក។ ក្រៅ​ពី​អ្នក​ទាំង ៩​នាក់​នេះ ក៏​មាន​ព្រះសង្ឃ​មួយ​អង្គ​ទៀត ព្រះនាម លី ចិន្តា និង​ប្រជាពលរដ្ឋ​ជាច្រើន​នាក់​ទៀត ដែល​អាជ្ញាធរ​វៀតណាម ចាប់​ខ្លួន​ដូច​គ្នា ប៉ុន្តែ​ត្រូវ​បាន​ដោះ​លែង​វិញ តែ​ព្រះតេជព្រះគុណ លី ចិន្តា ត្រូវ​បាន​ចាប់​ផ្សឹក​រហូត​ដល់​បច្ចុប្បន្ន។ នៅ​ក្នុង​ញត្តិ​នោះ រៀប​រាប់​ថា នៅ​ថ្ងៃ​ចាប់​ខ្លួន​នោះ មាន​មន្ត្រី​នគរបាល​ជាច្រើន​នាក់​ទៅ​ឡោម​ព័ន្ធ​វត្ត​ព្រៃជាប់ និង​វត្ត​សេរីតាសេក ហើយ​នគរបាល​វៀតណាម បាន​ចាប់​ព្រះសង្ឃ​ទាំង​នេះ​ច្រក​បាវ​បោះ​ដាក់​លើ​ឡាន​ជាដើម។

ខ្លឹមសារ​ញត្តិ​ដែល​ស្ថានទូត​វៀតណាម មិន​ព្រម​ទទួល​នោះ សុំ​ឲ្យ​នាយក​រដ្ឋមន្ត្រី​វៀតណាម លោក ង្វៀង តឹងយ៉ុង ឲ្យ​ដោះ​លែង​ព្រះតេជព្រះគុណ លីវ នី ព្រះតេជព្រះគុណ ថាច់ ធៀន និង​ប្រជាពលរដ្ឋ​ទាំង ៧​នាក់​ទៀត ដែល​តុលាការ​កាត់​ទោស​នោះ​ជា​បន្ទាន់ និង​ឥត​លក្ខខណ្ឌ សុំ​បញ្ឈប់​ជា​បន្ទាន់​នូវ​ការ​ជ្រៀតជ្រែក​កិច្ចការ​ផ្ទៃ​ក្នុង​ព្រះពុទ្ធ​សាសនា​នៅ​តាម​វត្ត​អារាម​នានា និង​សុំ​បញ្ឈប់​ជា​បន្ទាន់​នូវ​ការ​គំរាម​កំហែង​គ្រប់​រូបភាព ការ​តាម​ដាន ការ​ឃ្លាំ​មើល និង​ការ​បិទ​សិទ្ធិ​សេរីភាព​ព្រះសង្ឃ និង​ប្រជាពលរដ្ឋ​ខ្មែរ​ក្រោម​ជាដើម។

លោក សឺន ជុំជួន បាន​ឲ្យ​ដឹង​ថា អង្គការ​សមាគម​ខ្មែរ​ក្រោម​ទាំងអស់ គ្រោង​នឹង​ធ្វើ​បាតុកម្ម​នៅ​មុខ​ស្ថានទូត​វៀតណាម ឆាប់ៗ​នេះ ដើម្បី​ឲ្យ​រដ្ឋាភិបាល​វៀតណាម ដោះ​លែង​អ្នក​ទាំង​នោះ​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (4)
Share

starlonely

ពី phnom penh

please help them

Sep 28, 2013 01:50 AM

Khmer Aussie

Vietnamese government is very greedy and racist. Vietnamese can learn their language and have their own community while they are living in Cambodia illegally. and why can't Khmer Krom can't learn their native language in town is known to the Vietnamese Government is Kampuchea Krom.

Sep 27, 2013 09:34 PM

អ្នក​អាន​អនាមិក

ក្នុងនាមកូនខ្មែរម្នាក់ សូមគាំទ្រតាមកម្លាំងចិត្តចំពោះការតស៊ូដ៏ស្វិត​ស្វាញ និងប្រឈមដោយភាពគ្រោះថ្នាក់របស់ខ្មែរក្រោម។ សូម ព្រលឹងអតីកអ្នកតស៊ូខ្មែរក្រោម ជួយតាមថែរក្សាខ្មែរក្រោមបច្ចុប្បន្ន។ សូមអោយការទាមទាររបស់អ្នក ទទួលបានជោគជ័យ។

Sep 27, 2013 11:35 AM

KONE KHMER

ពី PHNOM PENH

TO THE VIETNAMESE GOVERNMENT:
WE ARE KHMER WANTING YOU TO KNOW THAT YOU SHOULD NOT FORGET THAT A BUNCH OF YOUR VIETNAMESE PEOPLE WHO LIVE IN KAMPUCHEA. IT IS FAIR THAT IF YOU SUFFER KHMER IN THEIR OWN LAND ( KAMPUCHEA KROM ), DO YOU THINK THAT KHMER CANNOT SUFFER YOUR VIETNAMESE PEOPLE WHO LIVE IN KAMPUCHEA NOW ? REMEMBER THAT YOU ARE THE INVADER.
SO LONG AS THE WOMEN HAVE THE BABIES, THEN VIETNAMESE AND KHMER WILL HAVE TO DEAL WITH IT...

Sep 27, 2013 10:38 AM

គេហទំព័រ​ទាំងមូល