ព្រះមហាក្សត្រ​យាង​ទៅ​ប្រទេស​ចិន​ខណៈ​លោក ហ៊ុន សែន កំពុង​ស្វះស្វែង​ស្នើ​ព្រះអង្គ​ដាក់​ប្រទេស​ក្នុង​គ្រាអាសន្ន

ដោយ យន់ សាមៀន
2020-03-31
អ៊ីម៉ែល
មតិ
Share
បោះពុម្ព
ព្រះមហាក្សត្រ និង​សម្ដេច​ម៉ែ យាង​ទៅ​ទីក្រុង​ប៉េកាំង​ប្រទេស​ចិន នៅ​ព្រឹក​​ថ្ងៃ​ទី១ ខែ​មេសា ឆ្នាំ២០២០។
ព្រះមហាក្សត្រ និង​សម្ដេច​ម៉ែ យាង​ទៅ​ទីក្រុង​ប៉េកាំង​ប្រទេស​ចិន នៅ​ព្រឹក​​ថ្ងៃ​ទី១ ខែ​មេសា ឆ្នាំ២០២០។
រូប៖ ហ្វេសប៊ុក​លោក​នាយករដ្ឋមន្ត្រី ហ៊ុន សែន

អ្នក​វិភាគ​ថា ការ​យាង​ចេញ​ពី​ប្រទេស​កម្ពុជា​របស់​ព្រះមហាក្សត្រ​ទៅ​កាន់​ប្រទេស​ចិន ព្រោះ​ទ្រង់​មិន​ចង់​ចូលរួម​បំផ្លាញ​ជាតិ​ជាមួយ​របប​ក្រុង​ភ្នំពេញ​ក្នុង​ការ​ដាក់​ប្រទេស​ក្នុង​ភាព​អាសន្ន។ អ្នក​វិភាគ​លើក​ឡើង​បែប​នេះ ខណៈ​លោក ហ៊ុន សែន កំពុង​ស្វះស្វែង​រក​ការ​គាំទ្រ​ពី​ព្រះ​មហាក្សត្រ​ដាក់​ប្រទេស​ក្នុង​គ្រា​អាសន្ន។

អ្នកវិភាគ​នយោបាយ និង​សង្គម​ដែល​ហ៊ាន​រិះគន់​លោក ហ៊ុន សែន ឥត​សំចៃ​មាត់ និង​កំពុង​និរទេស​ខ្លួន​នៅ​ក្រៅ​ប្រទេស លោក គឹម សុខ សង្កេត​ឃើញ​ថា នេះ​មិន​មែន​ជា​លើក​ទី១ ទេ ដែល​ព្រះ​មហាក្សត្រ ព្រះបាទ នរោត្តម សីហមុនី យាង​ចេញ​ពី​កម្ពុជា​នៅ​ពេល​របប​ក្រុង​ភ្នំពេញ​ធ្វើ​ច្បាប់​អ្វី​មួយ ដែល​មិន​ប្រយោជន៍​ជាតិ ព្រោះ​រដ្ឋធម្មនុញ្ញ​មិន​បាន​ផ្ដល់​សិទ្ធិ​អំណាច​ដល់​ព្រះមហាក្សត្រ​អាច​ជំទាស់​លើ​ច្បាប់ ដែល​របប​ក្រុង​ភ្នំពេញ​ស្នើ​នោះ​ទេ។ លោក គឹម សុខ ថា គម្រោង​ធ្វើ​ច្បាប់​ដាក់​ប្រទេស​ក្នុង​គ្រា​អាសន្ន បាន​ធ្វើ​ឲ្យ​ប៉ះ​ទង្គិច​ដល់​រាជ​ហឫទ័យ​ព្រះអង្គ​ខ្លាំង។ ដូច្នេះ ព្រះអង្គ​មាន​តែ​យាង​ទៅ​ក្រៅ​ប្រទេស៖ «ការ​យាង​ទៅ​របស់​ព្រះ​មហាក្សត្រ​នៅ​ក្នុង​ស្ថានភាព ដែល​ស្មុគស្មាញ​ហ្នឹង គឺ​ជា​វិធី ដែល​ព្រះ​អង្គ​ធ្វើ ដើម្បី​គេច​ពី​រួម​គំនិត​ផ្សំ​ឃុបឃិត ពួក​ដែល​កំពុង​ប្រើប្រាស់​ជាតិ ដើម្បី​តែ​អំណាច​ផ្ទាល់​ខ្លួន និង​ក្រុម​គ្រួសារ»

ព្រះមហាក្សត្រ ព្រះបាទ នរោត្តម សីហមុនី និង​សម្ដេច​ម៉ែ យាង​ទៅ​ទីក្រុង​ប៉េកាំង ប្រទេស​ចិន ចាប់​ពី​ថ្ងៃ​ទី១ ខែ​មេសា ដើម្បី​ពិនិត្យ​ព្រះរាជ​សុខភាព។ ទោះ​យ៉ាង​នេះ​ក្តី​ក្នុង​ព្រះរាជសារ​នោះ​មិន​បាន​បញ្ជាក់​ថា ព្រះអង្គ​នឹង​យាង​មក​ប្រទេស​កម្ពុជា​វិញ​នៅ​ថ្ងៃ​ណា​នោះ​ទេ។ ព្រះរាជ​សារ​ព្រះមហាក្សត្រ​បញ្ជាក់​ថា ក្នុង​ពេល​អវត្តមាន​ព្រះមហាក្សត្រ ប្រធាន​ព្រឹទ្ធសភា លោក សាយ ឈុំ នឹង​មក​ធ្វើ​ជា​ប្រមុខរដ្ឋ​ស្ដីទី។

ប្រធាន​ស្តីទី​គណបក្ស​សង្គ្រោះ​ជាតិ​លោក សម រង្ស៊ី សរសេរ​លើ​ហ្វេសប៊ុក​ថ្ងៃ​ទី៣១ ខែ​មីនា​ថា ការ​ដាក់​ប្រទេស​ក្នុង​ភាព​អាសន្ន គ្មាន​បាន​ប្រយោជន៍​អ្វី​ទេ គ្រាន់​តែ​ឆ្លុះ​បញ្ចាំង​ភាព​ស្លន់ស្លោ​របស់ លោក ហ៊ុន សែន ដែល​ភ័យ​ខ្លាច បាត់​បង់​អំណាច ពេល​ជំងឺ កូវីដ-១៩ កំពុង​តែ​រាតត្បាត។ លោក សម រង្ស៊ី លើក​ឡើង​ទៀត​ថា បំណង​ពិត​របស់​លោក ហ៊ុន សែន គឺ​រឹតត្បិត​សិទ្ធិ​សេរីភាព ក្នុង​ការ​សម្ដែង​មតិ របស់​ពលរដ្ឋ​ថែម​ទៀត រហូត​ដល់​បិទ​ទំព័រ Facebook របស់ អ្នក ដែល និយាយ​ការ​ពិត ហើយ​ផ្ដល់​គំនិត​ល្អៗ ជួយ​ប្រជារាស្ត្រ​ខ្មែរ។

មន្ត្រី​ជាន់​ខ្ពស់​គណបក្ស​សង្គ្រោះ​ជាតិ​លោក ម៉ន ផល្លា ដែល​កំពុង​និរទេស​ខ្លួន​នៅ​ក្រៅ​ប្រទេស និយាយ​ថា ក្នុង​ស្ថានភាព​ដែល​ពលរដ្ឋ​ខ្មែរ​កំពុង​ប្រឈម​នឹង​ជំងឺ​កូវីដ-១៩ លោក​ចង់​ឃើញ​ព្រះមហាក្សត្រ​គង់​នៅ​ក្នុង​ប្រទេស ដើម្បី​ជា​ម្លប់​ដល់​ប្រជារាស្ត្រ និង​កុំ​ឲ្យ​របប​ក្រុងភ្នំពេញ​ធ្វើ​អ្វី​ស្រេច​តែ​ចិត្ត។ មន្ត្រី​គណបក្ស​ប្រឆាំង​រូប​នេះ ស្នើ​ទៅ​របប​ក្រុង​ភ្នំពេញ​ព្យាយាម​ដោះ​ស្រាយ​បញ្ហា​ជំងឺ​កូវីដ-១៩ ឲ្យ​អស់​លទ្ធភាព​ជា​មុន​សិន​មុន​នឹង​រៀបចំ​ដាក់​ប្រទេស​ក្នុង​គ្រា​អាសន្ន៖ «ពិត​ប្រាកដ​ហើយ ដោយសារ​កន្លង​ទៅ ព្រះករុណា​កន្លង​ទៅ លោក​មិន​មាន​សិទ្ធិ​អំណាច​អ្វី​សម្រាប់​កិច្ចការ​ប្រទេស​នោះ​ទេ ព្រះអង្គ​ចាំ​តែ​ឡាយ​ព្រះហស្តលេខា​តាម​អ្វី​លោក ហ៊ុន សែន ស្នើ​ឡើង​ដូច្នេះ ព្រះអង្គ​មាន​ព្រះទ័យ​មិន​ចង់​ឃើញ​នូវ​អ្វី​ជា​កំហុស​ជា​ប្រវត្តិសាស្ត្រ​សម្រាប់​ប្រជាជន​ខ្មែរ។ អ៊ីចឹង​ព្រះ​អង្គ​សុខ​ចិត្ត​យាង​ទៅ​ពិនិត្យ​នៅ​ខាង​ក្រៅ»

រដ្ឋាភិបាល​លោក ហ៊ុន សែន បាន​បើក​ប្រជុំ​គណៈ​រដ្ឋ​មន្ត្រី​​ពិភាក្សា​ច្បាប់​ដាក់​ប្រទេស​ក្នុង​ភាព​អាសន្ន។ ជា​ទូ​ទៅ នៅ​ពេល​រដ្ឋាភិបាល​ធ្វើ​ច្បាប់​អ្វី​មួយ រដ្ឋសភា ព្រឹទ្ធសភា និង​ក្រុម​ប្រឹក្សា​ធម្មនុញ្ញ​ឯកភាព​លើ​សំណើ​នោះ ដោយ​គ្មាន​ការ​កែប្រែ​ចំណុច​ណា​មួយ​ឡើយ ដែល​ទីបំផុត​ទៅ​ព្រះមហាក្សត្រ ឬ​ប្រមុខ​រដ្ឋ​ស្ដីទី​នឹង​ប្រកាស​ឲ្យ​ប្រើ​ច្បាប់​នោះ។

ព្រះបាទ នរោត្តម សីហមុនី ទ្រង់​យាង​ទៅ​ពិនិត្យ​ព្រះរាជ​សុខភាព​នៅ​ប្រទេស​ចិន​ជា​ទៀងទាត់ ក៏ប៉ុន្តែ​ម្ដងម្កាល​នៅ​ពេល​រដ្ឋាភិបាល​ធ្វើ​ច្បាប់​ណាមួយ​ដែល​ប្រាសចាក​ពី​ស្មារតី​នៃ​រដ្ឋធម្មនុញ្ញ ទ្រង់​ក៏​យាង​ទៅ​ប្រទេស​ចិន​មុន​កាលវិភាគ​របស់​ទ្រង់​ផង​ដែរ។ កាល​ពី​ដើម​ឆ្នាំ២០១៨ ព្រះអង្គ​បាន​យាង​ចេញពី​កម្ពុជា​ទៅ​គង់នៅ​ទីក្រុង​ប៉េកាំង​អស់​រយៈពេល​ជាង​មួយ​ខែ ស្រប​ពេល​ដែល​របប​លោក ហ៊ុន សែន កំពុង​ធ្វើ​វិសោធនកម្ម​រដ្ឋធម្មនុញ្ញ និង​ក្រម​ព្រហ្មទណ្ឌ ដែល​ប៉ះពាល់​ដល់​សិទ្ធិ​សេរីភាព​ជា​មូលដ្ឋាន​របស់​ពលរដ្ឋ​។ អ្នកវិភាគ​យល់ថា ព្រះរាជ​ដំណើរ​របស់​ព្រះអង្គ​នៅ​ពេល​នោះ គឺ​ដោយសារ​ទ្រង់​មិន​សព្វព្រះរាជហឫទ័យ​ក្នុង​ការ​ឡាយ​ព្រះហស្តលេខា​លើ​ការ​កែប្រែ​ច្បាប់​ទាំងនេះ។

អ្នកវិភាគ និង​មន្ត្រី​បក្ស​ប្រឆាំង​ព្រួយ​បារម្ភ​ថា នៅ​ពេល​រដ្ឋាភិបាល​ដាក់​ប្រទេស​ក្នុង​គ្រា​អាសន្ន រដ្ឋាភិបាល​នឹង​យក​លេស​នេះ​ធ្វើ​ទុក្ខ​បុក​ម្នេញ​ថែម​ទៀត លើ​សកម្មជន​បក្ស​ប្រឆាំង មន្ត្រី​សង្គម​ស៊ីវិល និង​អ្នក​ដែល​មតិ​មិន​ស្រប​នឹង​រដ្ឋាភិបាល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Stupid crooks and thieves who stolen the country for decades...goooo away no more come back to Cambodia and die over there with your crooks friend

They both loved China to dead rather save its pple lives...stupid persons are so ignorance and arrogant with khmer pple.Maybe these two culprit predators and tmil HSen clown are already setup the secret plans to fools khmer pple...say one thing and do other thing to confusing khmer's public opinion...wait and see what are they planning next with Khmer pple?transform automatically power to other,or coup d'etat during this coronavirus crisis.

Apr 01, 2020 11:19 AM

គេហទំព័រ​ទាំងមូល