ពលរដ្ឋ​នៅ​ឃុំ​ដូង​ខេត្ត​ស្វាយរៀង​ចោទ​អាជ្ញាធរ​ថា​ឃុបឃិត​គ្នា​កាប់​ដើម​ត្នោត​លក់​ឲ្យ​វៀតណាម

ដោយ ថា កិត្យា
2015-10-29
អ៊ីម៉ែល
មតិ
Share
បោះពុម្ព
១១-ឧសភា-២០១៤៖ ទី​រួម​ខេត្ត​ស្វាយរៀង។
១១-ឧសភា-២០១៤៖ ទី​រួម​ខេត្ត​ស្វាយរៀង។
RFA/Chum Rasy

ប្រជាពលរដ្ឋ​នៅ​ឃុំ​ដូង ស្រុក​រមាសហែក ចោទ​អាជ្ញាធរ​ថា ឃុបឃិត​គ្នា​កាប់​ដើម​ត្នោត​លក់​ឲ្យ​ឈ្មួញ​យក​ទៅ​ប្រទេស​វៀតណាម។ ប៉ុន្តែ​អាជ្ញាធរ​ច្រានចោល​ចំពោះ​ការ​ចោទ​ប្រកាន់​នេះ។ អង្គការ​លីកាដូ ថា ប្រសិនបើ​កាប់​ដើម​ត្នោត​លក់​ទៅ​ឲ្យ​ប្រទេស​វៀតណាម បែប​នេះ គឺ​អាច​ធ្វើ​អោយ​បាត់បង់​នៅ​ពេល​អនាគត។

ប្រជាពលរដ្ឋ​នៅ​ភូមិ​ព្រៃទួល ឃុំ​ដូង ស្រុក​រមាសហែក ខេត្ត​ស្វាយរៀង សោកស្ដាយ​ចំពោះ​អាជ្ញាធរ​ខ្មែរ​ដែល​ក្លាយ​ទៅ​ជា​ឈ្មួញ​កណ្ដាល ឬ​មេការ​ប្រមូល​ទិញ​ដើម​ត្នោត​ពី​ប្រជាពលរដ្ឋ ហើយ​កាប់​ដឹក​យក​ទៅ​លក់​ឲ្យ​ប្រទេស​វៀតណាម។

​ប្រជាពលរដ្ឋ​ម្នាក់​សុំ​មិន​បញ្ចេញ​ឈ្មោះ​រៀបរាប់​ថា មួយ​ខែ​ចុង​ក្រោយ​នេះ អាជ្ញាធរ​តែងតែ​ធ្វើ​សកម្មភាព​បញ្ចុះបញ្ចូល​ឲ្យ​ប្រជាពលរដ្ឋ​ដែល​មាន​ដើម​ត្នោត​លក់​អោយ​ពួកគាត់​ក្នុង​តម្លៃ​ថោក គឺ​មួយ​ដើម​ប្រមាណ ៣​ម៉ឺន ទៅ ៤​ម៉ឺន​រៀល៖ «អាជ្ញាធរ​ភូមិ និង​ឃុំ រួម​និង​ធ្លាក់​ដល់​ស្រុក​បាន​ឃុបឃិត​គ្នា​ជាមួយ​កម្លាំង​យោធា គឺ​ទាហាន​នៅ​តាម​តំបន់​ព្រំដែន ដើរ​ទិញ​ដើម​ត្នោត​ពី​ប្រជាពលរដ្ឋ​ដែល​មាន​តម្លៃ​ថោកៗ យក​ទៅ​លក់​អោយ​វៀតណាម។ ខ្ញុំ​ជា​ប្រជាពលរដ្ឋ​មាន​ការ​ឈឺចាប់ និង​សោកស្ដាយ​មែន​ទែន»

​ប្រជាពលរដ្ឋ​ផ្សេង​ទៀត​លើក​ឡើង​ថា បើ​មិន​ការ​អន្តរាគមន៍​ពី​ថ្នាក់​លើ​ទេ​នោះ ដើម​ត្នោត​ខ្មែរ​នៅ​ឃុំ​ដូង អាច​នឹង​មិន​សេសសល់​ទៀត​ឡើយ៖ «មាន​គេ​ដើរ​ជីក​ដើម​ត្នោត ហើយ​ខ្មែរ​យើង​ត្រូវការ​​ដើម​ត្នោត​ដែល​ជា​បេះដូង​ប្រទេស​ជាតិ តែ​ឥឡូវ​គេ​ចេះតែ​មក​ទិញ​អ៊ីចឹង ខ្ញុំ​ស្ដាយ​ដែរ»

​ជា​ការ​ឆ្លើយ​តប មេ​ឃុំ​ដូង លោក នាង សាមាន និយាយ​ប្រាប់​វិទ្យុ​អាស៊ីសេរី ទាំង​ទើសទាល់​ថា ការ​ចោទ​ប្រកាន់​របស់​ប្រជាពលរដ្ឋ គឺ​ជា​រឿង​មិន​ពិត៖ «គ្មាន​ទេ គ្មាន​អាជ្ញាធរ​ណា​ទៅ​ឃុបឃិត​ជាមួយ​អ្នក​ណា​កាប់​ដើម​ត្នោត​លក់​អោយ​វៀតណាម​ទេ ពីព្រោះ​ដើម​ត្នោត​គឺ​ជា​កម្មសិទ្ធិ​របស់​ប្រជាពលរដ្ឋ»

​ប្រជាពលរដ្ឋ​នៅ​តំបន់​នោះ​អះអាង​ថា ជា​រឿង​ធម្មតា​ទៅ​ហើយ​ដែល​អាជ្ញាធរ​មិន​ទទួល​ខុស​ត្រូវ​ចំពោះ​ទង្វើ​របស់​ខ្លួន។ ពួកគាត់​ក៏​រិះគន់​លោក​មេឃុំ​ដូង ដែរ ថា​ជា​មនុស្ស​គ្មាន​សីលធម៌ និង​សុជីវធម៌ ដោយ​វាយ​ឫក​ខ្ពស់​លើស​ពី​ចៅហ្វាយ​ខេត្ត​ទៀត​ផង។

​ទាក់ទិន​ករណី​នេះ​ដែរ មន្ត្រី​សម្របសម្រួល​របស់​អង្គការ​លីកាដូ ប្រចាំ​ខេត្ត​ស្វាយរៀង គឺ​លោក នុត បូពិណ្ណារ័ត្ន យល់​ថា អាជ្ញាធរ​គួរ​តែ​ណែនាំ​ប្រជាពលរដ្ឋ​ឈប់​លក់​ដើម​ត្នោត ហើយ​នាំគ្នា​អភិរក្ស​ថែរក្សា ព្រោះ​ថា ដើម​ត្នោត​មាន​តម្លៃ​មហា​សាល​សម្រាប់​កម្ពុជា។ លោក​ថា ការ​បាត់បង់​ដើម​ត្នោត គឺ​ប៉ះពាល់​ធ្ងន់ធ្ងរ​ណាស់​សម្រាប់​ប្រទេស​ជាតិ ព្រោះ​ថា ដើម​ត្នោត​ក៏​ជា​និមិត្តរូប​របស់​កម្ពុជា​ដែរ៖ «អាជ្ញាធរ​មិន​ត្រូវ​អនុញ្ញាត​អោយ​កាប់​ទេ ហើយ​ត្រូវ​ពន្យល់​ប្រជាពលរដ្ឋ​អោយ​ដឹង​ពី​សារប្រយោជន៍​នៃ​ដើម​ត្នោត មិនមែន​អោយ​តែ​គេ​ទិញ ចេះតែ​កាប់​លក់​នោះ​ទេ។ បើ​អស់​ដើម​ត្នោត​ទៅ ថ្ងៃ​ក្រោយ​គឺ​បាត់បង់​អត្តសញ្ញាណ​ខ្មែរ ហើយ​បាត់បង់​ចំណុច​គោលដៅ​កន្លែង​ណា​ដែល​ជា​ទឹកដី​ខ្មែរ»

​ខ្មែរ​បាន​ចាត់​ទុក​ដើម​ត្នោត​ជា​រុក្ខជាតិ​ប្រជាប្រិយ​ដែល​តំណាង​អោយ​និមិត្តរូប​ជាតិ និង​តំណាង​អោយ​វប្បធម៌​ដូច​មាន​ការ​បញ្ជាក់​តាម​រយៈ​ចម្លាក់​នៅ​លើ​ជញ្ជាំង​ប្រាសាទ​អង្គរវត្ត​ជា​សក្ខីភាព​ស្រាប់។ ដូច្នេះ អាជ្ញាធរ និង​ប្រជាពលរដ្ឋ​ខ្មែរ​ការពារ​កុំ​កាប់​បំផ្លាញ​ដើម​ត្នោត និង​បញ្ឈប់​ចរាចរណ៍​ដើម​ត្នោត​នាំ​ចេញ​ទៅ​ក្រៅ​ប្រទេស​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

As we know that palm trees are the symbol of Cambodia if authorities involve with cutting down to transport to VN it means authorities are not khmer at all and want the Cambodia's land be occupied by VN.

Oct 29, 2015 05:34 AM

គេហទំព័រ​ទាំងមូល