ខ្សែ​ជីវិត​ស្ត្រី​ខ្មែរ​ម្នាក់​នៅ​កំពង់ចាម​ចាញ់​បោក​មេ​ខ្យល់​រៀបការ​ទៅ​ប្រទេស​ចិន

ដោយ សូត សុខប្រាថ្នា
2015-01-30
អ៊ីម៉ែល
មតិ
Share
បោះពុម្ព
ស្ត្រី​ខ្មែរ​ដែល​ចាញ់​បោក​មេខ្យល់​ទៅ​រៀបការ​ជាមួយ​បុរស​ជនជាតិ​ចិន វិល​ត្រឡប់​មក​ដល់​ប្រទេស​កម្ពុជា នៅ​ថ្ងៃ​ទី​១៣ ខែ​ធ្នូ ឆ្នាំ​២០១៤។
ស្ត្រី​ខ្មែរ​ដែល​ចាញ់​បោក​មេខ្យល់​ទៅ​រៀបការ​ជាមួយ​បុរស​ជនជាតិ​ចិន វិល​ត្រឡប់​មក​ដល់​ប្រទេស​កម្ពុជា នៅ​ថ្ងៃ​ទី​១៣ ខែ​ធ្នូ ឆ្នាំ​២០១៤។
Photo: RFA

ស្ត្រី​ខ្មែរ​មួយ​ចំនួន​ចាញ់​បោក​មេ​ខ្យល់​ជា​បន្តបន្ទាប់ ដោយ​តម្រូវ​ឲ្យ​ទៅ​រៀបការ​ប្ដី​ជាមួយ​ជនជាតិ​ចិន។ លទ្ធផល​ចុង​ក្រោយ មាន​ស្ត្រី​ខ្មែរ​ជាច្រើន​នាំ​គ្នា​រត់​គេច​មក​ស្រុក​កំណើត​វិញ ដោយសារ​តែ​មិន​អាច​ទ្រាំ​នឹង​ការ​ធ្វើ​បាប​លើ​ពួក​គាត់​បាន។ ក្នុង​នោះ​ក៏​មាន​ស្ត្រី​ម្នាក់​នៅ​ខេត្ត​កំពង់ចាម ដែល​ទើប​នឹង​ត្រឡប់​មក​ពី​ប្រទេស​ចិន រត់​គេច​ពី​ការ​ធ្វើ​បាប​ផ្លូវ​ចិត្ត និង​រាងកាយ ដោយ​សុខ​ចិត្ត​រត់​ចោល​កូន​ខ្ចី​ទើប​សម្រាល​បាន​បី​ខែ។

ចិន្តា ជា​ឈ្មោះ​អ្នក​និពន្ធ​ដាក់​ឲ្យ។ គាត់​សម្រេច​ចិត្ត​យល់​ព្រម​រៀបរាប់​ពី​ខ្សែ​ជីវិត​ផ្ទាល់​ខ្លួន និង​ខ្សែ​ជីវិត​ដែល​ធ្លាប់​បាន​ទៅ​រស់នៅ​ប្រទេស​ចិន រយៈពេល​ជិត ២​ឆ្នាំ។

មាន​ស្រុក​កំណើត​នៅ​ស្រុក​ចម្ការលើ ខេត្ត​កំពង់ចាម ជា​កូនស្រី​ត្រកូល​អ្នក​ក្រីក្រ និង​មាន​សមាជិក​គ្រួសារ​ច្រើន។ ចិន្តា មិន​បាន​ទទួល​ការ​អប់រំ​ច្រើន​ដូច​ស្ត្រី​កូន​អ្នក​ធូរធារ​នោះ​ទេ។ នាង​ត្រូវ​បង្ខំ​ចិត្ត​ឈប់​រៀន​នៅ​ថ្នាក់​ទី​៥ ដើម្បី​ជួយ​ធ្វើ​ការ​ឪពុក​ម្ដាយ​ជា​កសិករ និង​ដើរ​ស៊ី​ឈ្នួល​ធ្វើ​ចម្ការ​ឲ្យ​គេ​ជាដើម និង​ក្រោយ​មក ក៏​ធ្លាប់​ប្រឡូក​ក្នុង​វិស័យ​កាត់​ដេរ​ទៀត​ផង។ សម្បុរ​ខ្មៅ​ស្រអែម ទឹក​មុខ​ស្រស់​នៅ​ពេល​ដំបូង ប៉ុន្តែ​ទឹក​មុខ​របស់​ចិន្តា ប្រែ​ជា​ស្រពាប់ស្រពោន​នៅ​ពេល​ខ្ញុំ​សាកសួរ​ពី​ខ្សែ​ជីវិត ពិសេស​ខ្សែ​ជីវិត​ដែល​ធ្លាប់​រស់នៅ​ប្រទេស​ចិន។

ចិន្តា រៀបរាប់​ថា ដោយសារ​កត្តា​ជីវភាព​លំបាក និង​ជឿ​តាម​ការ​អូស​ទាញ​ពី​សំណាក់​មេ​ខ្យល់ ថា​ប្រសិន​បើ​យក​ប្ដី​ជា​ជន​បរទេស នឹង​អាច​ធ្វើ​ឲ្យ​ខ្លួន និង​គ្រួសារ​មាន​កម្រិត​ជីវភាព​បាន​ប្រសើរ​ជាង​បច្ចុប្បន្ន៖ «ព្រម​ទៅ ព្រោះ​គេ​កុហក​បោក​ខ្ញុំ​អ៊ីចឹង​បង! គេ​និយាយ​ថា​ម៉េច​ទៅ? គេ​ថា​ទៅ​ហ្នឹង គឺ​មាន​បាន​ហើយ​បង! គេ​ប្រាប់​ថា​ទៅ​ធ្វើ​ការ​ធ្វើ​អី​បាន​លុយ​ផ្ញើ​មក​អ្នក​ផ្ទះ​អ៊ីចឹង»

ចិន្តា សម្រេច​យល់​ព្រម​ចាក​ចេញ​ពី​ស្រុក​កំណើត​នៅ​ឆ្នាំ​២០១៣ ស្រប​ពេល​ដែល​នាង​មិន​ទាន់​គ្រប់​អាយុ​ផង​នៅ​ពេល​នោះ គឺ​ទើប​មាន​អាយុ ១៧​ឆ្នាំ ព្រោះ​មេ​ខ្យល់​បាន​យក​ឯកសារ​ឈ្មោះ​អ្នក​ដទៃ​មក​រត់​ការ​ឲ្យ​នាង។ នៅ​ក្នុង​អំឡុង​ពេល​រត់​ឯកសារ មេ​ខ្យល់​បាន​ឲ្យ​ប្រាក់​ទៅ​គ្រួសារ ចិន្តា ចំនួន ២​លាន​រៀល ស្មើ​នឹង ៥០០​ដុល្លារ។ ចំណែក​លិខិត​សុំ​អនុញ្ញាត​រៀបការ​ជន​បរទេស​ចេញ​ពី​ឃុំ គឺ​មិន​បាន​បញ្ជាក់​ថា រៀបការ​ជាមួយ​ជនជាតិ​ចិន នោះ​ទេ ហើយ​នៅ​ពេល​ចេញ​ពី​ស្រុក​ខ្មែរ ក៏​ហាក់​លួច​លាក់​ទៅ​ទៀត។ ចិន្តា ថា​នៅ​ពេល​ទៅ​ដល់​ប្រទេស​ចិន ដំបូង គឺ​មេ​ខ្យល់​នៅ​ទីនោះ​មិន​ទាន់​ឲ្យ​ធ្វើ​អ្វី​ទេ ដែល​ទំនង​ជា​មេ​ខ្យល់​ដើរ​ទាក់ទង​បុរស​ជនជាតិ​ចិន មិន​ទាន់​បាន។ រយៈពេល​ពីរ​ខែ ទើប​មេ​ខ្យល់​បង្ខំ​ឲ្យ ចិន្តា ត្រូវ​រៀបការ​ជាមួយ​បុរស​ចិន ម្នាក់៖ «ចុះ​នៅ​ពេល​ពីរ​ខែ​ក្រោយ ពេល​បាន​ស្វាមី តើ​គេ​គាប​សង្កត់​យ៉ាង​ម៉េច​ទេ? គេ​គំរាម​ខ្ញុំ​ថា បើ​ខ្ញុំ​អត់​យក គេ​នឹង​មក​ប្ដឹង​ម៉ែ​ឪ​ខ្ញុំ​នៅ​ក្រោម​អ៊ីចឹង ខ្ញុំ​ភ័យ​ខ្ញុំ​ព្រម​ចុះ​អេតាស៊ីវិល»

ក្តី​រំពឹង​របស់ ចិន្ដា ថា​នឹង​អាច​ផ្ដល់​លុយ​កាក់ ឬ​អាច​ជួយ​គ្រួសារ​នោះ ប្រែ​ខុស​ស្រឡះ ពីព្រោះ​សូម្បី​តែ​លិខិត​ឆ្លង​ដែន​ក៏​ត្រូវ​គ្រួសារ​ប្ដី​ដក​ហូត​ទុក សម្លៀកបំពាក់​មាន​តែ​ពីរ​បី​បំឡាស់​សម្រាប់​ស្លៀក លុយ​កាក់​គេ​មិន​ឲ្យ​កាន់ គឺ​ចិន្តា មាន​តួនាទី​ត្រឹម​តែ​ជា​អ្នក​បម្រើ​ប្ដី និង​គ្រួសារ​របស់​គេ​ប៉ុណ្ណោះ។ ក្រោយ​ពេល​បាន​ប្ដី​ដែល​មិន​ដូច​ទៅ​នឹង​ការ​សន្យា​របស់​មេ​ខ្យល់ ទើប​ចិន្តា​ដឹង​ខ្លួន​ថា គេ​បាន​បោកប្រាស់​នាង​យក​មក​លក់​ក្នុង​តម្លៃ ៩​ម៉ឺន​យ៉ន់ ស្មើ​នឹង​ជិត ១៥.០០០​ដុល្លារ (១៤.៦៨៨​ដុល្លារ)។ បើ​ទោះ​បី​ជា ចិន្តា ត្រូវ​ជួប​ការ​វាយ​ដំ​ច្រំ​ធាក់ មើល​ងាយ​មើល​ថោក​ពី​សំណាក់​ប្ដី និង​គ្រួសារ​ក៏ដោយ​ចុះ ប៉ុន្តែ​ពេល​ខ្លះ ចិន្ដា ត្រូវ​បង្ខំ​ចិត្ត​លួច​ទូរស័ព្ទ​មក​ប្រាប់​អ្នក​ផ្ទះ​នៅ​ស្រុក​កំណើត​ថា កុំ​ឲ្យ​បារម្ភ​នឹង​ខ្លួន ពីព្រោះ​នាង​បាន​សុខ​ទេ។ នាង​ចង់​រត់​ចេញ​ពី​ក្រុម​គ្រួសារ​ប្ដី​នៅ​ប្រទេស​ចិន តាំង​ពី​ពេល​ដឹង​ថា នាង​ត្រូវ​បាន​គេ​បោកប្រាស់​ម្ល៉េះ ប៉ុន្តែ​អ្វីៗ​យឺត​ពេល​បន្តិច ពីព្រោះ​នាង​មាន​ផ្ទៃពោះ​ទៅ​ហើយ។ ចិន្តា ត្រូវ​ទ្រាំ​រហូត​ដល់​កូនប្រុស​សម្រាល​រួច ទើប​មាន​ស្ត្រី​ខ្មែរ​ដែល​យក​ប្ដី​ចិន នៅ​ក្បែរ​ខាង ណែនាំ​ឲ្យ​នាង​រត់​មក​រក​កិច្ច​អន្តរាគមន៍​នៅ​ស្ថានទូត​ខ្មែរ។

រត់​មក​ដល់​ស្ថានទូត​ខ្មែរ​រយៈពេល​ជិត ១​ខែ ទម្រាំ​គេ​រត់​ឯកសារ​បាន ទើប​នាង​អាច​ត្រឡប់​មក​ស្រុក​ខ្មែរ​វិញ​នៅ​ថ្ងៃ​ទី​១៤ មករា ដោយ​ជើង​យន្តហោះ​ចុះ​ចត​នៅ​ខេត្ត​សៀមរាប ជាមួយ​ស្ត្រី​ខ្មែរ​ម្នាក់​ទៀត​នៅ​ខេត្ត​ត្បូងឃ្មុំ ដែល​ចាញ់​បោក​មេ​ខ្យល់​ទៅ​យក​ប្ដី​ចិន ដូច​នាង​ដែរ។ ចិន្តា ប្រៀប​ដូច​មាន​ជីវិត​ថ្មី​នៅ​លើ​ដី​កំណើត​របស់​ខ្លួន ដោយ​សុខ​ចិត្ត​ចោល​កូនប្រុស​ទើប​នឹង​កើត​បាន​បី​ខែ​ផង។ បច្ចុប្បន្ន នាង​មិន​ទាន់​មាន​ការងារ​ជា​ផ្លូវ​ការ​នៅ​ឡើយ ប៉ុន្តែ​យូរៗ​ម្តង នាង​សុំ​ម្ចាស់​អ័កកាដង់​នៅ​ក្បែរ​ខាង​ទៅ​ច្រៀង និង​រាំ​តាម​កម្មពិធី​ផ្សេងៗ ដើម្បី​បាន​កម្រៃ​ខ្លះ​ជួយ​គ្រួសារ និង​ដើម្បី​បន្លប់​វិប្បដិសារី​ដ៏​អាក្រក់​ដែល​កើត​ឡើង​លើ​ជីវិត​នាង។ ទន្ទឹម​នេះ នាង​កំពុង​ស្វែងរក​ការងារ​ដែល​មាន​ប្រាក់​កម្រៃ​សមរម្យ​អាច​ជួយ​ឧបត្ថម្ភ​គ្រួសារ​បាន។ ចិន្តា សូម​ផ្ដាំ​ផ្ញើ​ទៅ​ស្ត្រី​ខ្មែរ​ផ្សេង​ទៀត​ដូច​នេះ​ថា៖ «គឺ​ខ្ញុំ​ជួយ​ប្រាប់ៗ​ថា កុំ​ឲ្យ​ទៅ​ទៀត ព្រោះ​គេ​បោក។ កុំ​ឲ្យ​ទៅ បើ​គេ​និយាយ​អី​កុំ​ឲ្យ​ជឿ​គេ»

ចំណែក​ឪពុក​ចិន្តា ដែល​អង្គុយ​ប្រកប​ដោយ​ទឹក​មុខ​ក្រៀមក្រំ​ស្តាប់​ពី​ការ​រៀបរាប់​របស់​កូន​នោះ ពោល​ថា ដើម​ចម​ដែល​នាំ​ឲ្យ​លោក និង​ប្រពន្ធ​យល់​ព្រម​ឲ្យ​កូន​ទៅ​ប្រទេស​ចិន គឺ​ដោយសារ​តែ​ជីវភាព​ខ្វះខាត​ពេក និង​ម្យ៉ាង​ជឿ​តាម​សម្ដី​មេ​ខ្យល់​ផង។ លោក​ថា ដី​ស្រែ​នៅ​ក្នុង​ស្រុក​កំណើត​មិន​មាន​ច្រើន លោក​ត្រូវ​សុំ​ដី​គេ​ធ្វើ​នៅ​ខេត្ត​ឆ្ងាយៗ ដូចជា​នៅ​ខេត្ត​ស្ទឹងត្រែង ដើម្បី​ធ្វើ​ចម្ការ​គ្រាន់​ចិញ្ចឹម​គ្រួសារ។ លោក​បន្ត​ថា សេចក្តី​បារម្ភ​ចំពោះ​កូនស្រី គឺ​មាន​គ្រប់​ពេលវេលា ប៉ុន្តែ​មិន​ដឹង​ត្រូវ​ដោះស្រាយ​ដោយ​របៀប​ណា និង​ទាក់ទង​តាម​វិធី​ណា? គ្រាន់​តែ​សួរ​ពី​ទុក្ខ​លំបាក​របស់​កូន​នៅ​ប្រទេស​ចិន ភ្លាម ឪពុក​ចិន្តា ក៏​អួល​ដើមក​និយាយ​លេង​ចេញ ដោយ​ទឹក​ភ្នែក​ត្រូវ​ហូរ​ចេញ​ជំនួស​វិញ៖ «បាត់​ហ្នឹង​ទៅ​គេ​ប្រឹង​ធ្វើ​ប្រឹង​រក ខ្ញុំ​ប្រឹង​ធ្វើ​ប្រឹង​រក។ ក្រោយ​មក​បាន​ដំណឹង​ថា​រត់​មក​ស្ថានទូត ហើយ​ក៏​បាត់​ដំណឹង​ទៀត ហើយ​មិន​ដឹង​ថា​យ៉ាង​ណា​ម្តាយ​វា​ក៏​យំ»

ឪពុក​ចិន្ដា ផ្ដាំ​ផ្ញើ​ថា បើ​ទោះ​បី​ជា​មាន​ជីវភាព​ក្រ​កម្សត់​យ៉ាង​ណា​ក៏ដោយ គឺ​សុំ​ឲ្យ​ឪពុក​ម្ដាយ​ទាំងអស់ សុខ​ចិត្ត​ថែ​រក្សា​កូន​ឲ្យ​រស់នៅ​ក្នុង​ប្រទេស​កំណើត​របស់​ខ្លួន​ជា​ការ​ប្រសើរ និង​ពិចារណា​ឲ្យ​បាន​ត្រឹមត្រូវ ជៀសវាង​នាំ​ឲ្យ​មាន​វិប្បដិសារី​ដូច​រូប​លោក។

អ្នក​នាំ​ពាក្យ​ក្រសួង​ការ​បរទេស លោក កុយ កួង មាន​ប្រសាសន៍​ថា ចំនួន​ស្ត្រី​ខ្មែរ​ដែល​បាន​ជួយ​សង្គ្រោះ​ពី​ប្រទេស​ចិន នៅ​ឆ្នាំ​២០១៤ គឺ​មាន​ចំនួន ៥៨​នាក់ ហើយ​ពួក​គាត់​ទាំង​នោះ គឺ​ចាញ់​បោក​មេ​ខ្យល់​ទៅ​រៀបការ​ជាមួយ​បុរស​ចិន ប៉ុន្តែ​សម្រាប់​ខែ​មករា ឆ្នាំ​២០១៥ គឺ​មិន​ទាន់​ដឹង​នៅ​ឡើយ​ទេ។ លោក​បន្ត​ថា បើ​ទោះ​បី​ជា​មាន​បញ្ហា​ជាច្រើន​កើត​ឡើង​លើ​ស្ត្រី​ខ្មែរ​ទាំង​នោះ​ក៏ដោយ​ចុះ ប៉ុន្តែ​មិន​បណ្ដាល​ឲ្យ​ប៉ះពាល់​ដល់​ទំនាក់ទំនង​រវាង​ប្រទេស​ទាំង​ពីរ​ទេ ព្រោះ​លោក​ថា នេះ​ជា​រឿង​បុគ្គល។ លោក​បញ្ជាក់​ថា ខាង​ក្រសួង​ការ​បទេស​ខ្មែរ​ទទួល​ពាក្យ​បណ្ដឹង​ពី​ក្រុម​គ្រួសារ​ជន​រងគ្រោះ និង​អង្គការ​ក្រៅ​រដ្ឋាភិបាល​ថា មាន​ស្ត្រី​ផ្សេង​ទៀត​កំពុង​រងគ្រោះ​នៅ​ប្រទេស​ចិន ហើយ​អាជ្ញាធរ​ខ្មែរ និង​ចិន កំពុង​សហការ​គ្នា​ដើម្បី​ចាត់​វិធានការ​លើ​បញ្ហា​ទាំង​នោះ៖ «ការ​ជួយ​ហ្នឹង​យើង​ខិតខំ​ប្រឹងប្រែង​ណាស់ យើង​មិន​ដែល​ព្រងើយ​កន្តើយ​ចំពោះ​ពលរដ្ឋ​យើង​ទេ»

លោក​បន្ថែម​ថា នៅ​ពេល​ស្ត្រី​រងគ្រោះ​បាន​វិល​ត្រឡប់​មក​ដល់​ស្រុក​ខ្មែរ​វិញ បញ្ហា​ការងារ គឺ​មិន​បាន​ចោទ​ឡើង​សម្រាប់​ពួក​គាត់​ឡើយ ព្រោះ​ពួក​គាត់​អាច​សម្រប​ខ្លួន​ជាមួយ​គ្រួសារ​ធ្វើ​ស្រែ ឬ​ចម្ការ និង​ធ្វើ​ការងារ​ផ្សេងៗ​ទៀត។ កន្លង​មក ខាង​ក្រសួង​ការ​បរទេស ក៏​បាន​ចេញ​លិខិត​អំពាវនាវ​ដល់​ពលរដ្ឋ​ខ្មែរ​ទាំងអស់ ឲ្យ​ប្រុង​ប្រយ័ត្ន​ខ្ពស់​ចំពោះ​ការ​ឆបោក​ពី​បុគ្គល​មួយ​ចំនួន ដែល​ប៉ុនប៉ង​យក​ស្ត្រី​ខ្មែរ​ទៅ​លក់​ដូរ​នៅ​ប្រទេស​ចិន ទោះ​បី​ជា​ឋិត​នៅ​ក្រោម​រូបភាព​ណា​ក៏ដោយ។ លើស​ពី​នេះ អាជ្ញាធរ​ខ្មែរ​ក៏​បាន​ចាប់​មេ​ខ្យល់​ទាំង​ជនជាតិ​ចិន និង​ខ្មែរ យក​មក​ផ្ដន្ទាទោស​ជា​បន្តបន្ទាប់ និង​កំពុង​ចាត់​វិធានការ​បន្ត​ទៀត។

មន្ត្រី​សម្រប​សម្រួល​សមាគម​ការពារ​សិទ្ធិ​មនុស្ស​អាដហុក (Adhoc) ខេត្ត​កំពង់ចាម និង​ជា​អ្នក​ទទួល​បន្ទុក​កម្មវិធី​ស្ត្រី និង​កុមារ អ្នកស្រី ធីម ណារីន មាន​ប្រសាសន៍​ថា មាន​កត្តា​ជាច្រើន​ដែល​ជំរុញ​ឲ្យ​ស្ត្រី​ខ្មែរ​មួយ​ចំនួន​ហ៊ាន​ប្រថុយ​យក​ប្ដី​ជា​ជនជាតិ​ចិន។ ទី​មួយ កត្តា​ចំណេះ​ដឹង ដែល​ពួក​គាត់ និង​គ្រួសារ​មាន​កម្រិត ធ្វើ​ឲ្យ​ពួក​គាត់​ឆាប់​ជឿ​តាម​ការ​អូស​ទាញ​របស់​មេ​ខ្យល់។ កត្តា​មិន​មាន​ការងារ​ធ្វើ​ឲ្យ​បាន​ប្រសើរ​នៅ​ក្នុង​ស្រុក។ កត្តា​ជីវភាព​គ្រួសារ​ខ្វះខាត និង​កត្តា​សម្ភារៈ​និយម​នា​សម័យ​បច្ចុប្បន្ន ជាដើម។ អ្នកស្រី​បន្ថែម​ថា ហេតុផល​ដែល​ជំរុញ​ឲ្យ​ស្ត្រី​ទាំង​នោះ​ត្រូវ​រក​ជំនួយ ដើម្បី​បាន​ត្រឡប់​មក​ស្រុក​ខ្មែរ​វិញ គឺ​ដោយសារ​តែ​ការ​រំពឹង​ទុក​របស់​ពួក​គាត់​ត្រូវ​ខក​បំណង៖ «ការ​រឹត​ត្បិត​នៃ​សិទ្ធិ​សេរីភាព​នៃ​ការ​ដើរ​ហើរ មិន​អាច​ឲ្យ​គាត់​ទៅ​ណា​បាន។ ទី​ពីរ ការ​បង្ខំ​រួម​ភេទ​ជាច្រើន ដែល​ពួក​គាត់​មិន​អាច​ទទួល​យក​បាន និង​បញ្ហា​ហូប​ចុក​មិន​គ្រប់គ្រាន់»

អ្នកស្រី​ថា ចង់​ឬ​មិន​ចង់ បញ្ហា​នេះ​ក៏​អាច​ធ្វើ​ឲ្យ​ប៉ះពាល់​ដល់​ប្រជាជាតិ​ទាំង​ពីរ​ខ្លះ​ដែរ ពីព្រោះ​រូបភាព​ស្ត្រី​ខ្មែរ​ដែល​គេ​យក​ទៅ​ប្រទេស​ចិន កន្លង​មក គឺ​ជា​រូបភាព​ជួញ​ដូរ​មនុស្ស ទោះ​បី​ក្នុង​ទម្រង់​ស្ម័គ្រ​ចិត្ត​ក៏ដោយ។ អ្នកស្រី​យល់​ថា អាជ្ញាធរ​នៃ​ប្រទេស​ទាំង​ពីរ​គប្បី​ត្រូវ​រឹត​បន្តឹង​ច្បាប់​នាំ​ចេញ និង​ទទួល​យក​ស្ត្រី​ពី​ស្រុក​ខ្មែរ​ឲ្យ​បាន​រឹងមាំ ជាពិសេស អាជ្ញាធរ​ចិន គប្បី​ចាត់​វិធានការ​ឲ្យ​បាន​តឹងរ៉ឹង​បំផុត​ចំពោះ​មេ​ខ្យល់​នៅ​ប្រទេស​ចិន ដែល​ជា​អ្នក​ទទួល​ស្ត្រី​ខ្មែរ​ទៅ​លក់​បន្ត​នោះ ព្រោះ​បើ​សិន​គ្មាន​អ្នក​ទទួល​យក​ទៅ​លក់​នៅ​ទីនោះ​ទេ ក៏​គ្មាន​ការ​បញ្ជូន​ពី​ស្រុក​ខ្មែរ​ទៅ​ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

THIS IS CURRENT GOV DESTROY THEIR OWN PEOPLE BECAUSE THEY WANT ONLY POWER THAT WHY THEY MAKE PEOPLE GOING POOR AND EVERONE GIVING UP THEIR OWN COUNTRY AND THE RESULT A LOT OF PEOPLE HAD DIES BECAUSE OF GOVERNMENT KILLER.

Jan 30, 2015 10:48 PM

អ្នក​អាន​អនាមិក

After I read this article, I feel very sorry for her that she thought everything will be alright, but in contrast, her hope has turned in to be wrong. Instead of having a good husband, she became a victem. So all Khmer people think thoroughly before decide.

Jan 30, 2015 01:21 PM

គេហទំព័រ​ទាំងមូល