អាជីវករ​ផ្សារ​ដើមគរ​តវ៉ា​ប្រឆាំង​នឹង​គម្រោង​រុះរើ​ផ្សារ

ដោយ ថា កិត្យា
2015-07-22
អ៊ីម៉ែល
មតិ
Share
បោះពុម្ព
អាជីវករ​ផ្សារ​ដើម​គ​ឈរ​តវ៉ា​នៅ​មុខ​សាលា​រាជធានី​ភ្នំពេញ រូបថត​ថ្ងៃ​ទី​២២ ខែ​កក្កដា ឆ្នាំ​២០១៥។
អាជីវករ​ផ្សារ​ដើម​គ​ឈរ​តវ៉ា​នៅ​មុខ​សាលា​រាជធានី​ភ្នំពេញ រូបថត​ថ្ងៃ​ទី​២២ ខែ​កក្កដា ឆ្នាំ​២០១៥។
RFA/Tha Kitya

អាជីវករ​ផ្សារ​ដើមគ ប្រមាណ ៤០០​នាក់ តវ៉ា​ប្រឆាំង​នឹង​គម្រោង​រុះរើ និង​សាងសង់​ផ្សារ​ដើមគ ថ្មី​ឡើង​វិញ ដោយ​លើក​ហេតុផល​ថា គម្រោង​នេះ​នឹង​ធ្វើ​អោយ​ប៉ះពាល់​ដល់​មុខ​របរ​ប្រចាំ​ថ្ងៃ​របស់​ពួក​គាត់។ យ៉ាង​ណា​ក៏ដោយ អាជ្ញាធរ​រាជធានី​ភ្នំពេញ មិន​ទាន់​សម្រេច​យ៉ាង​ណា​នៅ​ឡើយ​ចំពោះ​គម្រោង​សាងសង់​ផ្សារ​ដើមគ ថ្មី​ទំនើប​នេះ ប្រសិនបើ​មិន​ទាន់​មាន​ការ​ឯកភាព​ពី​ក្រុម​អាជីវករ។

ក្នុង​ការ​តវ៉ា​នោះ​ពួកគាត់​លើក​ឡើង​ដែរ​ថា គម្រោង​អភិវឌ្ឍន៍​របស់​សាលា​រាជធានី​ភ្នំពេញ នេះ គឺ​ហាក់​ដូចជា​វាយ​កម្ទេច​ឆ្នាំង បាយ​របស់​ពួកគាត់។

យ៉ាង​នេះ​ហើយ​បាន​ជា​ក្រុម​អាជីវករ​ផ្សារ​ដើមគ ចេញ​មុខ​ជំទាស់​ដាច់ខាត​ចំពោះ​គម្រោង​របស់​សាលា​ក្រុង​ភ្នំពេញ ដែល​ចង់​សាងសង់​ផ្សារ​ដើមគ​ថ្មី នៅ​ពេល​ខាង​មុខ​នេះ។ ក្រុម​អាជីវករ​អះអាង​ថា សព្វថ្ងៃ​នេះ​ពួក​គាត់​មាន​កន្លែង​លក់ដូរ​សមរម្យ ហើយ​អាជីវករ​ទាំង​អស់​បាន​រៀបចំ​អនាម័យ និង​សណ្ដាប់ធ្នាប់​ត្រឹមត្រូវ​ហើយ មិន​ចាំបាច់​មាន​ផ្សារ​ដើមគ ថ្មី​មក​ជំនួស​នោះ​ទេ។

អាជីវករ៖ «ខ្ញុំ​ចង់​លក់​នៅ​ផ្សារ​ដើមគ ចាស់​នេះ​បន្ត​ទៀត ព្រោះ​ផ្សារ​នេះ​ស្អាត ដោយសារ​ក្នុង ១​អាទិត្យ​លាង​ផ្សារ​ម្ដង។ នៅ​ពេល​រុះរើ ហើយ​ទម្រាំ​សាងសង់​រួច​ទៀត​នោះ ពួក​ខ្ញុំ​បាត់​ម៉ូយ​អស់​ហើយ។ ដោយ​ឡែក​អាជីវករ​មួយ​ចំនួន​គាត់​ជំពាក់​បំណុល​ធនាគារ ហើយ​បើ​រុះរើ​ផ្សារ​ចេញ​ទៅ តើ​អាជីវករ​បាន​លុយ​ណា​បង់​ការ​អោយ​ធនាគារ និង​ចិញ្ចឹម​គ្រួសារ»

សកម្មភាព​អាជីវករ​ផ្សារ​ដើម​គ​លក់​ដូរ ពី​ជ្រុង​ខាង​កើត​ផ្សារ​ជាប់​ផ្លូវ​មុនីរ៉េត រូបថត​ថ្ងៃ​ទី​២២ ខែ​កក្កដា ឆ្នាំ​២០១៥។ RFA/Tha Kitya
សកម្មភាព​អាជីវករ​ផ្សារ​ដើម​គ​លក់​ដូរ ពី​ជ្រុង​ខាង​កើត​ផ្សារ​ជាប់​ផ្លូវ​មុនីរ៉េត រូបថត​ថ្ងៃ​ទី​២២ ខែ​កក្កដា ឆ្នាំ​២០១៥។ RFA/Tha Kitya

 

​យោង​តាម​ប្លង់​ផ្សារ​ដើមគ បង្ហាញ​ថា បច្ចុប្បន្ន​នេះ មាន​តូប​ចំនួន ៨២៥ កំពុង​ដំណើរការ ប៉ុន្តែ​មាន​អាជីវករ​លក់ដូរ​ដាក់​កញ្ច្រែង ល្អី ក្រោម​តង់​រាយប៉ាយ​ជា​ច្រើន​ទៀត​នៅ​តាម​ផ្លូវ​ចូល​ផ្សារ ដែល​មាន​ដី​ទំហំ​ជិត ១​ហិកតារ។

​ទាក់ទិន​បញ្ហា​នេះ អ្នក​នាំ​ពាក្យ​សាលា​រាជធានី​ភ្នំពេញ លោក ឡុង ឌីម៉ង់ មាន​ប្រសាសន៍​ថា កិច្ចប្រជុំ​ជាមួយ​អាជីវករ​ផ្សារ​ដើមគ នៅ​សាលា​រាជធានី​ភ្នំពេញ នៅ​ព្រឹក​ថ្ងៃ​ទី​២២ ខែ​កក្កដា នោះ ដើម្បី​បញ្ជាក់​ឲ្យ​ច្បាស់​អំពី​គម្រោង និង​ដំណោះស្រាយ​ជុំវិញ​ការ​បារម្ភ​របស់​ក្រុម​អាជីវករ​នោះ មិន​ទាន់​សម្រេច​យ៉ាង​ណា​នៅ​ឡើយ​ទេ​ចំពោះ​គម្រោង​នេះ ដោយ​ដកឃ្លា​ពិភាក្សា​គ្នា​សិន។

យ៉ាង​ណា​ក៏ដោយ លោក​បញ្ជាក់​ថា តាម​គោលការណ៍​នោះ បើសិនជា​គ្មាន​ការ​តវ៉ា ឬ​ប្រតិកម្ម​ណា​មួយ​ទេ​នោះ ទើប​សាលា​រាជធានី​ភ្នំពេញ ស្នើ​សុំ​គោលការណ៍​ពី​ប្រមុខ​រដ្ឋាភិបាល​កម្ពុជា ដើម្បី​សាងសង់​ផ្សារ​ដើមគ ថ្មី​ដែល​មាន​លក្ខណៈ​ទំនើប ប្រកប​ដោយ​សោភ័ណភាព សណ្ដាប់ធ្នាប់ និង​អនាម័យ​ខ្ពស់៖ «អ្នក​ណា​ក៏​ទៅ​ផ្សារ​ដែរ អ៊ីចឹង​ហើយ​បាន​ជា​យើង​ចង់​ធ្វើ​អោយ​ត្រឹមត្រូវ​តាម​ស្តង់ដារ រហូត​ដល់​សព្វថ្ងៃ​អ្នក​លក់​នៅ​តាម​ផ្លូវ​ដាក់​កញ្ច្រែង​ដាក់​អី​ហ្នឹង ក៏​យើង​រៀបចំ​ឲ្យ​បាន​សមរម្យ​ជូន​ពួកគាត់​ដែរ ជាពិសេស​មាន​ទាំង​ចំណត​សម្រាប់​ឡាន ម៉ូតូ​ទៀត ប៉ុន្តែ​ប្រហែលជា​បងប្អូន​អាជីវករ​មិន​ទាន់​យល់​អស់។ សាលា​រាជធានី​ភ្នំពេញ មិន​បាន​ឲ្យ​ក្រុមហ៊ុន​ឯកជន​ណា​មួយ​មក​វិនិយោគ​នោះ​ទេ គឺ​រដ្ឋ​ជា​អ្នក​ចេញ​ថវិកា​សាងសង់​ទាំង​ស្រុង ហើយ​ក៏​មិន​មាន​ការ​ជួល​តូប​ដល់​អាជីវករ​នោះ​ទេ បន្ទាប់ពី​សាងសង់​ផ្សារ​ថ្មី​រួច»

បើ​ទោះ​បី​ជា​យ៉ាង​ណា​ក៏ដោយ​ចុះ ក្រុម​អាជីវករ​ផ្សារ​ដើមគ ព្រមាន​ថា នឹង​តវ៉ា​ជា​ទ្រង់ទ្រាយ​ធំ ប្រសិនបើ​សាលា​រាជធានី​ភ្នំពេញ នៅ​តែ​បន្ត​គម្រោង​រុះរើ និង​សាងសង់​ផ្សារ​ដើមគ ថ្មី​ដោយ​គ្មាន​ការ​ឯកភាព​ពី​ពួកគាត់​ទេ​នោះ៕​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល