សង្គម​ស៊ីវិល និង​ពលរដ្ឋ​ហួសចិត្ត​ដែល​ក្រសួង​ថា ផ្លូវ​ខូច​បណ្ដាល​មក​ពី​បញ្ហា​អាកាសធាតុ

ដោយ ជាតិ ចំណាន
2019-10-10
អ៊ីម៉ែល
មតិ
Share
បោះពុម្ព
ស្ថានភាព​ផ្លូវ​ខាងក្រោយ​ផ្សារ​លើ ក្នុង​ក្រុង​សៀមរាប ខេត្ត​សៀមរាប កាល​ពី​ថ្ងៃទី៦ ខែ​ធ្នូ ឆ្នាំ​២០១៨។
ស្ថានភាព​ផ្លូវ​ខាងក្រោយ​ផ្សារ​លើ ក្នុង​ក្រុង​សៀមរាប ខេត្ត​សៀមរាប កាល​ពី​ថ្ងៃទី៦ ខែ​ធ្នូ ឆ្នាំ​២០១៨។
RFA

ក្រុម​ពលរដ្ឋ និង​មន្ត្រី​សង្គម​ស៊ីវិល ហួសចិត្ត​ដែល​មន្ត្រី​ក្រសួង​សាធារណការ​លើកឡើង​ថា ការ​ខូច​ផ្លូវ គឺ​បណ្ដាលមកពី​ការប្រែប្រួល​អាកាសធាតុ​។ ពួកគេ​ចាត់​ទុក​ការ​លើកឡើង​នេះ ជា​ការ​ឆ្លើយ​ដោះសា​គេច​ពី​ការ​ទទួលខុសត្រូវ។

មន្ត្រី​សង្គម​ស៊ីវិល និង ក្រុម​ពលរដ្ឋ យល់ថា គ្រោះ​ទឹកជំនន់​គ្រាន់តែ​ជា​ជ្រុង​មួយ​ដែល​បណ្តាល​ឱ្យ​ខូច​ផ្លូវថ្នល់ នៅ​តំបន់​មួយ​ចំនួន​ប៉ុណ្ណោះ​។ ពួកគេ​អះអាង​ថា មាន​មូលហេតុ​ជាច្រើន​បណ្តាល​ឱ្យ​ខូចខាត​ផ្លូវ គឺ​កត្តា​មនុស្ស ការអនុវត្ត​ច្បាប់ និង​អំពើពុករលួយ​ជាដើម​។ សង្គម​ស៊ីវិល និង​ពលរដ្ឋ​យល់ថា រដ្ឋាភិបាល​ពុំ​ទាន់​មាន​វិធានការ​បែប​វិទ្យាសាស្ត្រ​ណាមួយ ដោះស្រាយ​បញ្ហា​គុណភាព​ផ្លូវ និង​ការអនុវត្ត​ច្បាប់​លើ​អ្នក​បំពាន​ចំណី​ផ្លូវ​នៅ​ឡើយ​ទេ ជាច្រើន​ឆ្នាំ​មកនេះ។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ មើល​ឃើញ​ថា ភាព​ធូររលុង​ការ​អនុវត្ត​ច្បាប់ ការ​យក​ផ្លូវថ្នល់​ធ្វើ​អាជីវកម្ម និង​ការស្ថាបនា​ផ្លូវ​គ្មាន​គុណភាព គឺជា​មូលហេតុ​សំខាន់ បណ្ដាលមកពី​អំពើពុករលួយ​ធ្ងន់ធ្ងរ ក្នុង​ដំណើរការ កសាង​ហេដ្ឋារចនាសម្ព័ន្ធ​ផ្លូវថ្នល់​នៅ​ទូទាំង​ប្រទេស​។ លោក​ថា បញ្ហា​ប្រឈម​ទាំងនេះ បាន​អូសបន្លាយ​ពេល​ជាច្រើន​ឆ្នាំ​មក​ហើយ គ្មាន​ដំណោះស្រាយ​ប្រកបដោយ​ប្រសិទ្ធភាព​នៅឡើយ​ទេ។

ចំណែក ពលរដ្ឋ​រស់នៅ​រាជធានី​ភ្នំពេញ អ្នកនាង ប៉េង ឈុន យល់ថា ផ្លូវថ្នល់​ខូចខាត​ពុំ​មែន​បណ្ដាលមកពី​ទឹកជំនន់ តែមួយ​មុខ​នោះ​ទេ។ អ្នកនាង​មើល​ឃើញ​ថា ក្រសួង​សាមី មិន​បាន​យកចិត្តទុកដាក់​ស្ថាបនា​ផ្លូវ​ឱ្យ​មាន​គុណភាព លុបបំបាត់​អំពើពុករលួយ និង​ចាត់វិធានការ លើ​អ្នក​យក​ចំណី​ផ្លូវ​ធ្វើ​អាជីវកម្ម និង​ធ្វើ​ផ្ទះ​នោះ​ទេ។ បន្ថែម​លើ​នេះ អ្នកនាង​ថា អាជ្ញាធរ​មិន​បាន​អនុវត្ត​ច្បាប់​តឹងរ៉ឹង លើ​ម្ចាស់​រថយន្ត​ធុន​ធំ ដឹកទំនិញ​លើស​ទម្ងន់​នោះ​ឡើយ៖ «បច្ចេកទេស​កសាង​ផ្លូវ បើ​ខ្ញុំ​សង្កេតមើល​ប្រទេស​គេ គេ​កសាង​ផ្លូវ ចាក់​កៅស៊ូ និង​បៃ​តុង​លើ​ថ្នល់ គឺ​គេ​ចាក់​មក​ក្រាស់ៗ តែ​ស្រុក​ខ្មែរ​យើង បើ​ក្រឡេក​ប្រៀបធៀប​ជាមួយ​គេ គឺ​ខុស​ឆ្ងាយ​។ គាត់​ចាក់​ស្ដើង​ឱ្យ​រួចពីដៃ សូម​កែ​មក​ឱ្យ​ជាប់​មក។ ធ្វើ​ខ្វះ​បច្ចេកទេស​ផ្សេង​ទៅ ចំណុច​មួយទៀត​គឺ​ធ្វើ​ហ្នឹង​ដើម្បី​រិះ​ខាំ ដើម្បី​កិបកេង​លុយ​។ អ្នក​ខាងក្រៅ គេ​Support ច្រើនៗ តែ​ដល់​ពេល​ធ្វើ​ផ្លូវ​បាន​មួយ​ក្រវិចៗ ហើយ​ផ្លូវ​ធ្វើ​ឱ្យ​រួចពីដៃ ធ្វើ​ហើយ​គាស់​ទៅ​គាស់​មក»

ប្រតិកម្ម​របស់​មន្ត្រី​សង្គម​ស៊ីវិល និង​ប្រជាពលរដ្ឋ​នេះ គឺ​ដោយសារ រដ្ឋលេខាធិការ​ក្រសួង​សាធារណការ និង​ដឹកជញ្ជូន អ្នកស្រី ម៉ម រម​នា បាន​ថ្លែង​កាលពី​ថ្ងៃ​ទី៨ តុលា​ថា ការប្រែប្រួល​អាកាសធាតុ ធ្វើ​ឱ្យ​ខូចខាត ផ្លូវថ្នល់ ស្ពាន ព្រមទាំង​ហេដ្ឋារចនាសម្ព័ន្ធ​រូប​វ័ន្ត​ជាដើម តួយ៉ាង​គ្រោះ​ទឹកជំនន់ បង្ក​ប៉ះពាល់​តំបន់​មួយ​ចំនួន នៅ​ក្នុង​ខេត្ត ព្រះសីហនុ កំពត ពោធិ៍សាត់ ស្ទឹងត្រែង រតនគិរី ជាដើម​។ អ្នកស្រី​បន្ត​ថា គ្រោះធម្មជាតិ​នេះ​ក៏​បណ្ដាល​ឱ្យ​ផ្លូវថ្នល់ ស្ពាន​មួយ​ចំនួន​ខូចខាត និង​ផ្អាក​ចរាចរណ៍​ជា​បណ្ដោះអាសន្ន​ផង​ដែរ​។ អ្នកស្រី​បញ្ជាក់​ថា ផល​ប៉ះពាល់​នេះ រដ្ឋាភិបាល​ត្រូវ​ចំណាយ​ថវិកាជាតិ ថវិកា​ជំនួយ និង​កម្ចី​ពី​អន្តរជាតិ ដើម្បី ជួសជុល និង​ស្ដារ​ឡើង​វិញ។

អាស៊ីសេរី​បាន​ព្យាយាម​ទាក់ទង អ្នកនាំពាក្យ​ក្រសួង​សាធារណការ លោក តុប សុភ័ក្រ ដើម្បី​សុំ​ការ​អធិប្បាយ​បន្ថែម​រឿង​នេះ តែ​ទូរស័ព្ទ​របស់​លោក មិន​អាច​ទាក់ទង​បាន​នៅ​ថ្ងៃ​ទី៩ ខែ​តុលា នេះ។ ចំណែក​អ្នកនាំពាក្យ​គណៈកម្មការ​គ្រប់គ្រង​គ្រោះ​មហន្តរាយ លោក កែវ វី ក៏​មិន​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

ពលរដ្ឋ​ម្នាក់ទៀត រស់នៅ​ក្រុង​សៀមរាប លោក រិន ភារុន អះអាង​ថា ក្រុង​សៀមរាប ពុំ​មាន​គ្រោះធម្មជាតិ ឬ​ទឹកជំនន់​នោះ​ទេ ក៏ប៉ុន្តែ​ផ្លូវ​ក្នុង​ក្រុង​ស្ទើរ​គ្រប់កន្លែង​ខូចខាត ពិបាកធ្វើ​ដំណើរ​ជាច្រើន​ឆ្នាំ​មក​ហើយ។ លោក​ចោទ​ថា ការ​ទម្លាក់​កំហុស​លើ​គ្រោះធម្មជាតិ នាំ​ឱ្យ​ផ្លូវ​ខូច គឺជា​ការ​ឆ្លើយ​ដោះសារ​របស់​ក្រសួង​សាមី ដើម្បី​ជម្រះ​អំពើពុករលួយ និង​កំហុស​ឆ្គង​របស់​ខ្លួន​ប៉ុណ្ណោះ៖ «សៀមរាប​អត់​មាន​ទឹកជំនន់​ទេ គ្រាន់តែ​ផ្លូវ​ធ្វើ​ប្រើ​កៅស៊ូ​តិច​។ ណាមួយ​ទៀត​ផ្លូវ​ធ្វើ​ឱ្យ​រួច​តែ​ពី​ដៃ គាត់​ធ្វើ​មុខ​ខូច​ពីក្រោយ ធ្វើ​ក្រោយ​ខូច​មុខ​។ នៅ​សៀមរាប​ឆ្នាំ​ហ្នឹង​អត់​មាន​ទឹកជំនន់ គាត់​ក្រាល​កៅស៊ូ​រួចហើយ គាត់​ដាក់​គ្រួស​ពីលើ រឿង​អី​មិន​ខូច​បង​ឯង​គិត​មើល​?»

កន្លងទៅ​មន្ត្រី​ជាន់ខ្ពស់​រដ្ឋាភិបាល ធ្លាប់​អះអាង​ថា អាជ្ញាធរ​ជំនាញ​នឹង​ធ្វើ​របាយការណ៍​ខូចខាត​ហេដ្ឋារចនាសម្ព័ន្ធ​នៅ​តាម​បណ្ដា​ខេត្ត ដែល​រងគ្រោះ​ដោយ​ទឹកជំនន់ រួមមាន ខេត្ត​ក្រចេះ ស្ទឹងត្រែង ត្បូងឃ្មុំ កំពង់ចាម និង​ព្រែ​វែង​ជាដើម។ រីឯ​ក្រសួង​សាធារណការ កំពុង​ប្រើប្រាស់​វិធីសាស្ត្រ​វិភាគ​ចំណាយ និង​ពិចារណា​រៀបចំ​សំណើ​ស្នើសុំ​ថវិកា ដើម្បី​ឆ្លើយតប​ទៅ​នឹង​ការប្រែប្រួល​អាកាសធាតុ ដែល​ធ្វើ​ឱ្យ​ខូចខាត​ហេដ្ឋារចនាសម្ព័ន្ធ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

stupid voodoo blamed to other things and became a top climate analysist

Oh yeah god dammed and foolishly by gangs of thugs"HS"who were so stupidest claimed about the climates ruined all the roads in Cambodia.What all of these thugs thinking about,or thinking all khmer pple are so stupids like them,or what?.It's a holycrap man...shame on thugs...foolish...stupidities who know nothing on this world,everytime all of these stupid thugs always blamed to other or anything else rather than responsible by itself.And ask them how u thug knows to explain about the climatology,or scientology that prove to cause more damages to the road driving across Cambodia.

Oct 10, 2019 11:04 AM

គេហទំព័រ​ទាំងមូល