ទាហាន​កង​វិស្វកម្ម​៧១៨​នៅ​កំពង់ចាម​ចោទ​មេ​កង​ថា​ប្រព្រឹត្ត​អំពើ​ពុករលួយ

ដោយ​ សូត សុខប្រាថ្នា
2015-08-25
អ៊ីម៉ែល
មតិ
Share
បោះពុម្ព
ផែនទី​ខេត្ត​កំពង់ចាម
ផែនទី​ខេត្ត​កំពង់ចាម
Photo: RFA

កូន​ទាហាន​កង​វិស្វកម្ម ៧១៨ នៅ​ស្រុក​បាធាយ ខេត្ត​កំពង់ចាម លើក​ឡើង​ថា មន្ត្រី​នាយក​កង​វិស្វកម្ម​របស់​ខ្លួន គឺ​អាច​ស៊ីដាច់​ប្រាក់ខែ​កម្លាំង​ពលកម្ម​របស់​កូន​ទាហាន ឬ​ប្រព្រឹត្ត​អំពើ​ពុករលួយ​តែម្តង។ ការ​លើក​ឡើង​នេះ បន្ទាប់​ពី​ប្រាក់​ពលកម្ម​របស់​កូន​ទាហាន​ប្រមាណ ៣​ឆ្នាំ​មក​ហើយ នៅ​មិន​ទាន់​ទទួល​បាន ហើយ​មេ​កង​ប្រាប់​ឱ្យ​កូន​ទាហាន​ជួយ​លាក់​បាំង​រឿង​នេះ​ទៀត​ផង។

កូន​ទាហាន​នៅ​កងវិស្វកម្ម ៧១៨ ស្នើ​ឱ្យ​មន្ត្រី​ក្រសួង​ពាក់ព័ន្ធ បើក​ការ​ស៊ើបអង្កេត​លើ​ករណី​ប្រាក់​បៀវត្សរ៍​របស់​ពួកគាត់ និង​បញ្ហា​ពុក​រលួយ​មួយ​ចំនួន​ទៀត។ ការ​ស្នើ​នេះ ព្រោះ​កូន​ទាហាន​ទាំង​នោះ​លើក​ឡើង​ថា ប្រាក់ខែ​ក៏​បាត់ បញ្ហា​ពុករលួយ​នៅ​អង្គភាព​ក៏​កើត​មាន រហូត​ធ្វើ​ឱ្យ​ស្ថាប័ន​កាន់​តែ​ធ្លាក់​ចុះ។

កូន​ទាហាន​កង​វិស្វកម្ម ៧១៨ សុំ​បញ្ចេញ​អត្តសញ្ញាណ​ម្នាក់ ឱ្យ​ដឹង​ថា ប្រាក់​ខែកម្លាំង​ពលកម្ម​ដែល​កូន​ទាហាន​ប្រមាណ ៧០​នាក់ ចុះ​ធ្វើ​ផ្លូវ​ថ្នល់​តាំង​ពី​ឆ្នាំ​២០១២ គឺ​បើក​សរុប​បាន​ប្រមាណ ២​ខែ​ប៉ុណ្ណោះ ក្រៅ​ពី​នេះ​បាត់​ឈឹង។ ប្រភព​ដដែល​បន្ត​ថា ក្រៅ​ពី​មិន​បាន​បើក​ប្រាក់ខែ​កម្លាំង​ពលកម្ម​ក្នុង​មួយ​ខែ ៤០​ម៉ឺន​រៀល ជូន​ពួកគាត់​ហើយ មេៗ​ទាហាន​ថែម​ទាំង​ហៅ​កូន​ចៅ​ទៅ​ប្រជុំ​ដោយ​ប្រាប់​ឱ្យ​ជួយ​លាក់​បញ្ហា​នេះ​ទៀត​ផង ពោល​គឺ​នៅ​ពេល​មាន​ថ្នាក់​លើ​សួរ​កូន​ទាហាន​ត្រូវ​ប្រាប់​ថា ប្រាក់​ទាំង​នោះ​គឺ​បើក​អស់​ហើយ នៅ​ឡើយ​សល់​ប្រមាណ ៣​ខែ​ចុង​ក្រោយ​ប៉ុណ្ណោះ។

បញ្ហា​នេះ កូន​ទាហាន​យល់​​ថា គឺ​ជា​រឿង​មិន​ត្រឹមត្រូវ​ ព្រោះ​ខ្លួន​មិន​បាន​ទទួល​ផង ហើយ​ត្រូវ​ចូល​រួម​បិទ​បាំង​អំពើ​អាក្រក់​ទៀត។

មិន​ខុស​គ្នា​នេះ កូន​ទាហាន​ម្នាក់​ទៀត​លើក​ឡើង​ថា ពួកគេ​សុខ​ចិត្ត​រស់​នៅ​ឆ្ងាយ​ពី​ផ្ទះសម្បែង ឆ្ងាយ​ពី​ប្រពន្ធ​កូន​រាប់​ខែ​រាប់​ឆ្នាំ ដោយ​សង្ឃឹម​ប្រាក់​បៀវត្ស​ទាំង​នោះ ប៉ុន្តែ​ក្ដី​រំពឹង​ទុក​ប្រែ​ជា​ខុស​ស្រលះ។ លើស​ពី​នេះ​ទៀត ប្រភព​ដដែល​បញ្ជាក់​ថា នៅ​អង្គភាព ៧១៨ គឺ​មាន​អំពើ​ពុករលួយ​ផ្សេង​ទៀត​ដូច​ជា​មេកង​យក​សែស្រឡាយ​របស់​ខ្លួន​ទៅ​ដាក់​ស្ថាប័ន​ខ្លាញ់ៗ ដូចជា​កន្លែង​ស្បៀង ប្រេង និង​កន្លែង​ហិរញ្ញវត្ថុ​ ហើយ​ខ្លះ​ទៀត​មិន​បាន​មក​ធ្វើ​ការ​ពេញលេញ តែ​មាន​សិទ្ធិ​បើក​ប្រាក់ខែ​ពេញ​ជាដើម។

ទាក់ទង​បញ្ហា​នេះ វិទ្យុ​អាស៊ីសេរី មិន​អាច​សុំ​ការ​បំភ្លឺ​ពី​នាយ​កង​វិស្វកម្ម ៧១៨ លោក អេង គឹមអូន បាន​ទេ នៅ​ថ្ងៃ​ទី​២៥ ខែ​សីហា ប៉ុន្តែ​កន្លង​មក​លោក​ធ្លាប់​បញ្ជាក់​ថា មិន​មាន​បញ្ហា​នេះ​កើត​ឡើង​ទេ គឺ​កូន​ទាហាន​បើក​ប្រាក់ខែ​កម្លាំង​ពលកម្ម​បាន​ដូច​ធម្មតា។ បន្ថែម​លើ​នេះ នាយ​រង​កង​វិស្វកម្ម ៧១៨ លោក ចាន់ សុភឿន មាន​ប្រសាសន៍​ថា ការ​លើក​ឡើង​របស់​កូន​ទាហាន គឺ​ជា​ការ​ចោទ​ប្រកាន់​ដោយ​មិន​មាន​មូលដ្ឋាន​ច្បាស់លាស់ ព្រម​ទាំង​មិន​យល់​ពី​ការងារ​ទៀត​ផង។

លោក​ថា ប្រាក់ខែ​កម្លាំង​ពលកម្ម​របស់​កូន​ទាហាន គឺ​បើក​នៅ​សល់​តែ​បី​ខែ​ចុង​ក្រោយ​ប៉ុណ្ណោះ ពីព្រោះ​ដោយសារ​គ្រឿង​ចក្រ​ខូច​ទើប​បង្វិល​លុយ​នោះ​ទៅ​ជួសជុល​គ្រឿង​ចក្រ​សិន។ ចំណែក​រឿង​ថា មេទាហាន​ប្រាប់​កូន​ទាហាន​ឱ្យ​ជួយ​លាក់​បាំង​នោះ លោក​បដិសេធ ហើយ​ថែម​ទាំង​សួរ​រក​លេខ​ទូរស័ព្ទ​ប្រភព​ដែល​ផ្ដល់​ព័ត៌មាន​ឱ្យ​វិទ្យុ​អាស៊ីសេរី ទៀត​ផង។ យ៉ាង​ណា​ប្រាក់ខែ​ដែល​នៅ​សេសសល់ លោក​ថា​នឹង​បើក​ជូន​កូនទាហាន​នៅ​ខែ​ក្រោយ៖ «អត់​មាន​ដូច​ពួក​វា​ថា​ទេ គេ​បាន​បើក​ឱ្យ​ហើយ ប៉ុន្តែ​យើង​នៅ​អា​ខ្លះ​មួយ​ចំនួន​ប៉ុន្មាន​ខែ​ហ្នឹង យើង​ព្យាយាម​បើក​ឱ្យ ប៉ុន្តែ​លុយ​ហ្នឹង​មិន​ទាន់​បាន​ឱ្យ​វា​ណា»

ចំណែក​ការ​ចោទ​ប្រកាន់​ថា មេ​ទាហាន​យក​សែស្រឡាយ​ខ្លួន​ទៅ​បំពេញ​ការងារ​កន្លែង​ខ្លាញ់ ឬ​កន្លែង​រក​លុយ​បាន​នោះ លោក​បញ្ជាក់​ថា វា​មិនមែន​ជា​កន្លែង​ខ្លាញ់​អ្វី​នោះ​ទេ ប៉ុន្តែ​ជា​ធម្មតា​ស្ថាប័ន​ហិរញ្ញវត្ថុ គឺ​ត្រូវ​រក​មនុស្ស​ដែល​អាច​ទុក​ចិត្ត​បាន ព្រមទាំង​មាន​ចំណេះ​ដឹង ឬ​ជំនាញ​ផ្នែក​នោះ​ដើម្បី​ជៀសវាង​មាន​បញ្ហា។ លោក​បន្ថែម​ថា កូន​ទាហាន​ដែល​រាយការណ៍​ អាច​ច្រណែន​គេ ព្រម​ទាំង​ការ​យល់​ដឹង​របស់​ពួកគេ​នៅ​មាន​កម្រិត​ទៅ​វិញ​ទេ។

ទោះ​បី​ជា​យ៉ាង​ក៏ដោយ ការ​រុញ​ច្រាន​ដាក់​គ្នា​ទៅ​វិញ​ទៅ​មក​នេះ ប្រធាន​កម្មវិធីសិទ្ធិ​ការងារ​នៃ​មជ្ឈមណ្ឌល​អប់រំ​ច្បាប់​សម្រាប់​សហគមន៍ លោក មឿន តុលា មាន​ប្រសាសន៍​ថា ស្ថាប័ន​ពាក់ព័ន្ធ រួម​មាន​ក្រសួង​ការពារ​ជាតិ ឬ​ទីស្តីការ​គណៈរដ្ឋមន្ត្រី និង​អង្គភាព​ប្រឆាំង​អំពើ​ពុករលួយ​ផង​ត្រូវ​ចុះ​ស៊ើប​អង្កេត​ករណី​នេះ​ឱ្យ​បាន​ច្បាស់លាស់ ដើម្បី​ឈាន​ទៅ​បញ្ចប់​វិវាទ៖ «គប្បី​ធ្វើ​ការងារ​ហ្នឹង​ឱ្យ​បាន​ដិតដល់ ហើយ​មាន​តម្លាភាព។ ចាត់​វិធានការ​ចំពោះ​មន្ត្រី​ណា​ដែល​ប្រព្រឹត្ត​បទល្មើស​ដើម្បី​កុំ​ឱ្យ​មាន​ការ​បំពេញ​ថវិកា​ជាតិ»

លោក​បន្ត​ថា ប្រសិន​បើ​អ្វី​ដែល​កូន​ទាហាន​លើក​ឡើង​ជា​រឿង​ពិត​ប្រាកដ​មែន វា​គឺ​ជា​ការ​រំលោភ​ច្បាប់​លក្ខន្តិកៈ​ការងារ​របស់​មន្ត្រី​រាជការ ព្រម​ទាំង​ផ្ទុយ​ទៅ​នឹង​ច្បាប់​រដ្ឋធម្មនុញ្ញ​ទៀត​ផង។ ជាង​នេះ​ទៀត ការ​ប្រាប់​ឱ្យ​កូន​ទាហាន​ជួយ​លាក់បាំង ឬ​មិន​ឱ្យ​និយាយ​ទៅ​ក្រៅ លោក មឿន តុលា ថា ជា​ការ​គំរាម​កំហែង និង​រំលោភ​សិទ្ធិ​បុគ្គល ព្រោះ​ស្ថាប័ន​មួយ​អ្នក​គ្រប់គ្រង​អាច​ប្រាប់​កូនចៅ​ពី​របៀប​បំពេញ​ការងារ​ឱ្យ​បាន​ល្អ ប៉ុន្តែ​ពួកគេ​មិន​អាច​ហាមឃាត់​បុគ្គលិក​ខ្លួន​ឱ្យ​ជួយ​លាក់បាំង​អំពើ​អាក្រក់ ឬ​អំពើ​ពុករលួយ​របស់​ខ្លួន​បាន​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

Working and get nothing in Cambodia as Kompong Cham province and Hun Sen want to teach other country to follow his leadership.What is wrong with you ?I am working at school I get salary every month on the 30th of the month never missed.

Aug 26, 2015 12:14 AM

Peuv

លោកហ៊ុនសែនចង់បង្រៀនប្រធានាធិបតីអាមេរិកObama ឲ្យចេះដឹកនាំប្រទេសបានល្អត្រឹមត្រូវ។ ឥឡូវនេះកូនទាហានខ្លួន អត់មានប្រាក់ខែ នេះជាឆាកកំផ្លែង។

Aug 25, 2015 03:21 PM

គេហទំព័រ​ទាំងមូល