ប៉ូលិស​ចរាចរណ៍​ខេត្ត​ព្រះសីហនុ​ចុះ​អប់រំ​ច្បាប់​ដល់​ពលរដ្ឋ​នៅ​តាម​ផ្លូវ​សាធារណៈ

ដោយ ដែន អយុធ្យា
2015-01-24
អ៊ីម៉ែល
មតិ
Share
បោះពុម្ព
ស្នងការ​រង​នគរបាល​ខេត្ត​ព្រះសីហនុ និង​ជា​ប្រធាន​ការិយាល័យ​កណ្ដាល​នគរបាល​សណ្ដាប់​ធ្នាប់​សាធារណៈ លោក​វរសេនីយ៍ឯក អ៊ី សុខា ផ្ដល់​បទសម្ភាសន៍​ដល់​អ្នក​សារព័ត៌មាន កាល​ពី​ថ្ងៃ​ទី​២៤ មករា ២០១៥។
ស្នងការ​រង​នគរបាល​ខេត្ត​ព្រះសីហនុ និង​ជា​ប្រធាន​ការិយាល័យ​កណ្ដាល​នគរបាល​សណ្ដាប់​ធ្នាប់​សាធារណៈ លោក​វរសេនីយ៍ឯក អ៊ី សុខា ផ្ដល់​បទសម្ភាសន៍​ដល់​អ្នក​សារព័ត៌មាន កាល​ពី​ថ្ងៃ​ទី​២៤ មករា ២០១៥។
RFA/Den Ayuthyea

មន្ត្រី​ស្ថាប័ន​ពាក់ព័ន្ធ​ខេត្ត​ព្រះសីហនុ កំពុង​បង្កើន​សកម្មភាព​ចុះ​ផ្សព្វផ្សាយ​ចំណេះដឹង​ស្តីពី​ច្បាប់​ចរាចរណ៍​ផ្លូវគោក​ជូន​ដល់​ប្រជាពលរដ្ឋ​ធ្វើ​ដំណើរ​តាម​ផ្លូវ​នានា ក្នុង​មូលដ្ឋាន​នេះ ដើម្បី​ឲ្យ​បាន​យល់​ដឹង​បន្ថែម​ទៀត​ពី​សារប្រយោជន៍​នៃ​ការ​គោរព​ច្បាប់​ចរាចរណ៍ ឬ​ការ​ពាក់មួក​ការពារ​សុវត្ថិភាព​ជាដើម។

សកម្មភាព​នេះ មាន​ការ​ចូលរួម​ក្រុម​អង្គការ​សង្គម​ស៊ីវិល និង​វិស័យ​ឯកជន​ដ៏​ច្រើន​ផុស​ផុល ហើយ​មាន​ការ​ចាប់​អារម្មណ៍​ពី​សាធារណជន​ទូទៅ​រស់​នៅ​ខេត្ត​ព្រះសីហនុ។

លោក វរសេនីយ៍ឯក អ៊ី សុខា ស្នងការ​រង​នគរបាល​ខេត្ត​ព្រះសីហនុ និង​ជា​ប្រធាន​ការិយាល័យ​កណ្ដាល​នគរបាល​សណ្ដាប់ធ្នាប់​សាធារណៈ មាន​ប្រសាសន៍​ថា ការ​បង្កើន​សកម្មភាព​ចុះ​អប់រំ​ច្បាប់​ចរាចរណ៍​របស់​មន្ត្រី​ជំនាញ​សហការ​ជាមួយ​មន្ត្រី​សង្គម​ស៊ីវិល និង​ស្ថាប័ន​ពាក់ព័ន្ធ​ខេត្ត​ពេល​នេះ គឺ​មាន​បំណង​បញ្ជ្រាប​ការ​យល់​ដឹង​ដល់​ប្រជាពលរដ្ឋ​ឲ្យ​ចូលរួម​គោរព​ច្បាប់​ចរាចរណ៍​នៅ​គ្រា​ច្បាប់​ចរាចរណ៍​ផ្លូវគោក​ថ្មី​នឹង​ត្រូវ​ដាក់​ឲ្យ​អនុវត្ត​នៅ​ខែ​កុម្ភៈ ឆ្នាំ​២០១៥ ត​ទៅ។

​លោក​បាន​អំពាវនាវ​ដល់​ប្រជាពលរដ្ឋ​ទូទៅ​ឲ្យ​ចូលរួម​គោរព​ច្បាប់​ចរាចរណ៍​ឲ្យ​បាន​ទាំង​អស់​គ្នា ដើម្បី​កាត់​បន្ថយ​អត្រា​ស្លាប់ និង​គ្រោះថ្នាក់​នេះ​ឲ្យ​ថយ​មក​ចំនួន​ទាប​ចាប់ពី​ឆ្នាំ​២០១៥ ត​ទៅ៖ «យើង​ចង់​ជំរុញ​ឲ្យ​បងប្អូន​ប្រជាពលរដ្ឋ​ទាំង​អស់​ឲ្យ​ពួកគាត់​បាន​យល់ដឹង​អំពី​ច្បាប់​ចរាចរណ៍​ផ្លូវគោក​ឲ្យ​បាន​ទាំង​អស់​គ្នា និង​ចូលរួម​អនុវត្ត​ដើម្បី​កាត់បន្ថយ​អត្រា​គ្រោះថ្នាក់ និង​អត្រា​ស្លាប់​ឲ្យ​មក​ថយ​ចុះ​ចំនួន​ចាប់​ពី​ឆ្នាំ​២០១៥ ត​ទៅ។ ជាង​នេះ ច្បាប់​ចរាចរណ៍​ផ្លូវគោក​ថ្មី ក៏​នឹង​ដាក់​ឲ្យ​ប្រើប្រាស់​ចាប់​ពី​ខែ​កុម្ភៈ ឆ្នាំ​២០១៥ ត​ទៅ ដែល​តម្រូវ​ឲ្យ​អ្នក​ជិះ​ម៉ូតូ​ទាំង​អ្នក​បើកបរ​ម៉ូតូ និង​អ្នក​ជិះ​ពី​ក្រោយ​ក៏​ត្រូវ​ពាក់​មួយ​ការពារ​សុវត្ថិភាព​ទាំង​អស់​គ្នា​ដែរ»

​បន្ថែម​លើ​នេះ លោក អ៊ី សុខា ក៏​បាន​អំពាវនាវ​ដល់​គ្រប់​អង្គការ​សមាគម និង​ស្ថាប័ន​ពាក់ព័ន្ធ​នានា​ក្នុង​ខេត្ត​ព្រះសីហនុ រាប់​បញ្ជូន​គ្រឹះស្ថាន​សិក្សា ឬ​សាលារៀន​ជាដើម​ត្រូវ​បំផុស និង​ចលនា​ឲ្យ​យុវជន​ចូល​រួម​អនុវត្ត​ច្បាប់​ចរាចរណ៍​ផ្លូវគោក ឲ្យ​បាន​គ្រប់ៗ​គ្នា៖ «ផ្សព្វផ្សាយ​ដើម្បី​ពញ្ញាក់​ស្មារតី​ប្រជាពលរដ្ឋ​ទាំង​អស់​ឲ្យ​ដឹង​ថា ច្បាប់​ថ្មី​នេះ​មាន​ការ​រឹត​បន្តឹង​ការ​ផាក​ពិន័យ និង​ការ​ដាក់​ទោសទណ្ឌ​ធ្ងន់ធ្ងរ​ចំពោះ​អ្នក​មិន​គោរព​ច្បាប់​ចរាចរណ៍​ផ្លូវគោក»

​ប្រធាន​អគ្គនាយក​របស់​គ្រឹះស្ថាន​មីក្រូហិរញ្ញវត្ថុ​ហត្ថា​កសិករ លោក ហ៊ួត អៀងតុង មាន​ប្រសាសន៍​ថា ដើម្បី​ចូល​រួម​កាត់​បន្ថយ​អត្រា​គ្រោះថ្នាក់​ចរាចរណ៍ និង​អត្រា​ស្លាប់​របស់​មនុស្ស​ជាមួយ​រាជរដ្ឋាភិបាល ស្ថាប័ន​នេះ​បាន​ប្រើ​បុគ្គលិក​ជិត ២០០​នាក់ ដើម្បី​ចុះ​ចែក​ជូន​ខិត្តប័ណ្ណ និង​ចុះ​អប់រំ​ដល់​ប្រជាពលរដ្ឋ​នៅ​តាម​ផ្លូវ​សាធារណៈ នា​មូលដ្ឋាន​ខេត្ត​ព្រះសីហនុ ឲ្យ​ចូលរួម​គោរព​ច្បាប់​ចរាចរណ៍​ឲ្យ​បាន​ទាំង​អស់​គ្នា។

​លោក​បន្ត​ថា អត្រា​គ្រោះថ្នាក់​ចរាចរណ៍ និង​អត្រា​មនុស្ស​ស្លាប់ នឹង​មិន​អាច​ថយ​ចុះ​បាន​ទេ ដរាបណា​ប្រជាពលរដ្ឋ​ដែល​ជា​អ្នកប្រើប្រាស់​ផ្លូវ មិន​ចូលរួម​គោរព​ច្បាប់​ចរាចរណ៍​ឲ្យ​បាន​ត្រឹមត្រូវ​តាម​ច្បាប់​កំណត់​នោះ​ទេ៖ «ដោយសារ​តែ​មើល​ឃើញ​អត្រា​គ្រោះថ្នាក់​ចរាចរណ៍​នៅតែ​បន្ត​មាន​សញ្ញា​កើន​ខ្ពស់ ទើប​ហត្ថា​កសិករ​បាន​ចូលរួម​ផ្សព្វផ្សាយ ច្បាប់​ចរាចរណ៍​ជាមួយ​រដ្ឋាភិបាល ដើម្បី​អប់រំ​ដល់​ប្រជាពលរដ្ឋ​ខេត្ត​ព្រះសីហនុ ឲ្យ​បាន​យល់ដឹង​ច្បាប់​នេះ​ថែម​ទៀត និង​ចូលរួម​អនុវត្ត​ច្បាប់​ចរាចរណ៍​ផ្លូវគោក​ឲ្យ​បាន​ទាំង​អស់​គ្នា​នៅ​ថ្ងៃ​អនាគត»

​ក្រុម​ប្រជាពលរដ្ឋ​ខេត្ត​ព្រះសីហនុ បាន​សាទរ​ចំពោះ​ការ​បង្កើត​ឲ្យ​មាន​កម្មវិធី​ចុះ​អប់រំ​អំពី​ច្បាប់​ចរាចរណ៍​ផ្លូវគោក ជូន​ដល់​សាធារណជន​បាន​ស្វែងយល់​ពី​សារប្រយោជន៍​នៃ​ការ​គោរព​ច្បាប់​ចរាចរណ៍​ផ្លូវគោក​ពេលនេះ៖ «ច្បាប់​ចរាចរណ៍​ផ្លូវគោក​ដែល​រដ្ឋាភិបាល​ដាក់​ឲ្យ​ប្រើប្រាស់ គឺ​អ្នក​បើកបរ​ត្រូវតែ​គោរព ពិសេស​ភ្លើង​សញ្ញា​បញ្ជា​ចរាចរណ៍ និង​ការ​ពាក់​មួយ​សុវត្ថិភាព​ជា​ប្រចាំ ដើម្បី​ការពារ​អាយុ​ជីវិត​របស់​យើង​ទាំង​អស់​គ្នា»

អគ្គលេខាធិការ​រង​នៃ​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវ​គោក លោក ឈួន វ៉ន់ ក៏​បាន​ឲ្យ​ដឹង​ថា គ្រោះថ្នាក់​ចរាចរណ៍​ដែល​កើតមាន​ជា​រៀង​រាល់​ឆ្នាំ​នៅ​កម្ពុជា គឺ​ភាគ​ច្រើន​បណ្ដាល​មក​ពី​មិន​គោរព​ច្បាប់​ចរាចរណ៍។ មាន​ដូចជា​បើកបរ​ក្នុង​ល្បឿន​លឿន​ហួស​ច្បាប់​កំណត់ បើ​ប្រជែង​គ្នា​គ្មាន​ការ​យោគយល់ មិន​គោរព​សញ្ញា​ចរាចរណ៍ និង​បើកបរ​ក្នុង​សភាព​ស្រវឹង​ជាដើម។

ផ្ដើម​ពី​បញ្ហា​នេះ លោក​ស្នើ​ដល់​ប្រជាពលរដ្ឋ ពិសេស​យុវជន ត្រូវ​ចូលរួម​គោរព​ច្បាប់​ចរាចរណ៍​ឲ្យ​បាន​គ្រប់​គ្នា ពេល​បើកបរ​យន្តយាន​គ្រប់​ប្រភេទ មាន​រថយន្ត ឬ​ម៉ូតូ​ជាដើម នៅ​តាម​ផ្លូវ​សាធារណៈ។ ជាង​នេះ អ្នក​ប្រើប្រាស់​ម៉ូតូ ដាច់​ខាត​ត្រូវ​តែ​ពាក់​មួយ​ការពារ​សុវត្ថិភាព​ជា​ប្រចាំ​ទោះ​ជា​ចម្ងាយ​ផ្លូវ​ជិត ឬ​ឆ្ងាយ​បែប​ណា​ក្តី។

ត្រង់​ចំណុច​នេះ លោក ឈិត សុខុន អភិបាល​ខេត្ត​ព្រះសីហនុ ក៏​បាន​ស្នើ​ដល់​ប្រជាពលរដ្ឋ​ទូទៅ ពិសេស​យុវជន ត្រូវ​ចូលរួម​គោរព​ច្បាប់​ចរាចរណ៍​ឲ្យ​បាន​គ្រប់គ្នា​ដើម្បី​ចូលរួម​កាត់បន្ថយ​គ្រោះថ្នាក់​ដល់​អាយុជីវិត និង​បំផ្លាញ​សេដ្ឋកិច្ច​គ្រួសារ​របស់​ខ្លួន។

លោក​ស្នើ​កុំ​ឲ្យ​អ្នក​បើក​បរៗ ក្រោម​ឥទ្ធិពល​នៃ​ជាតិ​ស្រវឹង។ ស្នើ​កុំ​ឲ្យ​ហួស​ល្បឿន​កំណត់។ ត្រូវ​គោរព​សិទ្ធិ​អាទិភាព​ក្នុង​ពេល​បើកបរ។ កុំ​ប្រើប្រាស់​ទូរស័ព្ទ​ដៃ​ពេល​កំពុង​បើកបរ។ កុំ​បើកបរ​វ៉ា​ជែង​គ្នា​ក្នុង​ស្ថានភាព​គ្រោះថ្នាក់ និង​ការពារ​ជីវិត​អ្នក​ដោយ​ពាក់​មួយ​សុវត្ថិភាព និង​ពាក់​ខ្សែ​ក្រវាត់​ជាដើម៖ «យើង​ទាំង​អស់​គ្នា គឺ​ជា​អ្នក​ចូល​រួម​ក្នុង​ការ​អនុវត្ត​ច្បាប់​ចរាចរណ៍​ផ្លូវគោក។ ច្បាប់​នេះ សំខាន់​បំផុត​គឺ​អ្នក​ពាក់ព័ន្ធ​នៅ​តាម​មូលដ្ឋាន ភូមិ​ឃុំ ឬ​អង្គភាព​ពាក់ព័ន្ធ​ទាំង​អស់​ហ្នឹង គឺ​ត្រូវ​តែ​នាំ​គ្នា​ពន្យល់ និង​អប់រំ​ដល់​អ្នក​ធ្វើ​ដំណើរ​ឲ្យ​បាន​យល់​ដឹង​អំពី​សារសំខាន់​នៃ​ការ​គោរព​ច្បាប់​ចរាចរណ៍។ ជាង​នេះ យុវជន​ត្រូវ​បណ្ដុះ ឬ​អប់រំ​ក្រុម​យុវជន​ឲ្យ​ពួកគាត់​បាន​យល់​ដឹង​ពី​ច្បាប់​ចរាចរណ៍​ផ្លូវ​គោក​នេះ​ឲ្យ​បាន​ទាំង​អស់​គ្នា និង​ឲ្យ​យល់​អំពី​ផលវិបាក​បណ្ដាល​មក​ពី​គ្រោះថ្នាក់​ចរាចរណ៍ និង​កុំ​ឲ្យ​ពួកគេ​ភ្លេច​ខ្លួន​ចំពោះ​គ្រោះថ្នាក់​ចរាចរណ៍​ផ្លូវ​គោក​នេះ»

​របាយការណ៍​បូកសរុប​ការងារ​ឆ្នាំ​២០១៤ របស់​ការិយាល័យ​ចរាចរណ៍​ផ្លូវគោក ​​ស្នងការ​នគរបាល​ខេត្ត​ព្រះសីហនុ បាន​បង្ហាញ​ថា ខេត្ត​នេះ​មាន​គ្រោះថ្នាក់​ចរាចរណ៍​កើត​ឡើង ២០៤​ករណី ក្នុង​នោះ​កើត​ឡើង​ទៅ​លើ​ជនបរទេស​ចំនួន ៥០​ករណី។ បើ​ប្រៀបធៀប​ឆ្នាំ​២០១៣ គឺ​ថយ​ចុះ​ចំនួន ១២​ករណី។ ឆ្នាំ​២០១៣ គ្រោះថ្នាក់​ចរាចរណ៍​នេះ បាន​កើត​ឡើង​ចំនួន ២១៦​ករណី។

គ្រោះថ្នាក់​ភាគ​ច្រើន​គឺ​កើត​ឡើង​រវាង​រថយន្ត និង​ម៉ូតូ ៨៩​ករណី និង​គ្រោះថ្នាក់​រវាង​រថយន្ត និង​រថយន្ត​កើត​មាន ២២​ករណី។

​គ្រោះថ្នាក់​នេះ សម្លាប់​មនុស្ស ៨៤​នាក់ ក្នុង​នោះ​មាន​ជនបរទេស​ចំនួន ៦​នាក់ និង​រង​របួស​ធ្ងន់​ស្រាល​សរុប​មាន​ចំនួន ៣៩០​នាក់។ ខូចខាត​យានយន្ត​ចំនួន ៣៥៩​គ្រឿង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

Danny

ពី Columbus, OH USA

មិនចំបាច់ទេ..សូមប្រើតែពាក្យស្លោកថា ថ្ងៃនេះថ្ងៃស្អែកកុំឲ្យមានគ្រោះថ្នាក់ចរាចរ៍ទៅបានហើយ!ត្រូវពង្រីកផ្លូវឲ្យបានធំ..គូសគំនូសឲ្យបានច្បាស់..ដាក់ភ្លើង និងសញ្ញាឲ្យបានច្បាសលាស់..ដាក់ពង្រាយប៉ុលិសមិនពុករលួយឲ្យបានច្រើន​ ដើម្បីពិន៍យពលរដ្ធដែលមិនគោរពចរាចរ៍ ។ល។.

Jan 26, 2015 07:56 AM

អ្នក​អាន​អនាមិក

How do you teach people about circulation on the road ? You are a police,leader,Prime minister,governor,high echelon etc... never never stop at the red light.Go back ward to one way road.I saw you most of the time don't said you did not.

Jan 26, 2015 12:16 AM

គេហទំព័រ​ទាំងមូល