ពលរដ្ឋ​ស្រុក​រុក្ខគិរី​ខេត្ត​បាត់ដំបង​ផ្ដិត​មេ​ដៃ​ស្នើ​ដក​មេ​ឃុំ​ចោទ​ប្រកាន់​បក្ខពួក​និយម

ដោយ ហ៊ុំ ចំរើន
2015-11-22
អ៊ីម៉ែល
មតិ
Share
បោះពុម្ព
ស្នាម​មេ​ដៃ​ដែល​ពលរដ្ឋ​ក្នុង​ឃុំ​ស្តុកប្រវឹក ស្រុក​រុក្ខគិរី ខេត្ត​បាត់ដំបង នាំ​គ្នា​ផ្ដិត​មេ​ដៃ ដើម្បី​ដាក់​ទៅ​អភិបាល​ស្រុក​ស្នើ​ដក​មេ​ឃុំ​ចេញ​ពី​តំណែង ដោយ​ចោទ​ប្រកាន់​ថា មេ​ឃុំ​ទប់ស្កាត់​ការ​កាប់​ទន្ទ្រាន​ដី​ព្រៃ​សហគមន៍​ប្រកាន់​បក្ខពួក​និយម និង​គ្មាន​សមត្ថភាព​ក្នុង​ការ​ដោះស្រាយ កាល​ពី​ថ្ងៃ​ទី​២២ ខែ​វិច្ឆិកា ឆ្នាំ​២០១៥។
ស្នាម​មេ​ដៃ​ដែល​ពលរដ្ឋ​ក្នុង​ឃុំ​ស្តុកប្រវឹក ស្រុក​រុក្ខគិរី ខេត្ត​បាត់ដំបង នាំ​គ្នា​ផ្ដិត​មេ​ដៃ ដើម្បី​ដាក់​ទៅ​អភិបាល​ស្រុក​ស្នើ​ដក​មេ​ឃុំ​ចេញ​ពី​តំណែង ដោយ​ចោទ​ប្រកាន់​ថា មេ​ឃុំ​ទប់ស្កាត់​ការ​កាប់​ទន្ទ្រាន​ដី​ព្រៃ​សហគមន៍​ប្រកាន់​បក្ខពួក​និយម និង​គ្មាន​សមត្ថភាព​ក្នុង​ការ​ដោះស្រាយ កាល​ពី​ថ្ងៃ​ទី​២២ ខែ​វិច្ឆិកា ឆ្នាំ​២០១៥។
Photo Provided

ប្រជាពលរដ្ឋ​ប្រមាណ ៣០០​នាក់​ក្នុង​ចំណោម ៣០០​គ្រួសារ​នៅ​ស្រុក​រុក្ខគិរី ខេត្ត​បាត់ដំបង នាំ​គ្នា​ផ្ដិត​មេ​ដៃ ដើម្បី​ដាក់​ទៅ​អភិបាល​ស្រុក​ស្នើ​ដក​មេ​ឃុំ​ចេញ​ពី​តំណែង ដោយ​ចោទ​ប្រកាន់​ថា មេ​ឃុំ​ទប់ស្កាត់​ការ​កាប់​ទន្ទ្រាន​ដី​ព្រៃ​សហគមន៍​ប្រកាន់​បក្ខពួក​និយម និង​គ្មាន​សមត្ថភាព​ក្នុង​ការ​ដោះស្រាយ។ មេ​ឃុំ​បដិសេធ​ចំពោះ​ការ​ចោទ​ប្រកាន់​នេះ។

ប្រជាពលរដ្ឋ​នៅ​ស្រុក​រុក្ខគិរី សម្ដែង​ការ​មិន​ពេញ​ចិត្ត​ទៅ​នឹង​ការ​ដឹក​នាំ​របស់​មេ​ឃុំ​ស្តុកប្រវឹក ថា​ជា​សកម្មភាព​មួយ​អនុវត្ត​ការងារ​គិត​តែ​ពី​ផល​ប្រយោជន៍​បក្ខពួក​របស់​ខ្លួន ដោយ​មិន​ខ្វល់​ពី​ទុក្ខ​របស់​ប្រជាពលរដ្ឋ​ក្រីក្រ​នោះ​ទេ។

តំណាង​ប្រជាពលរដ្ឋ​ម្នាក់ គឺ​លោក ជ្រុន ពុធ រស់នៅ​ឃុំ​ស្តុកប្រវឹក ស្រុក​រុក្ខគិរី ខេត្ត​បាត់ដំបង ថ្លែង​នៅ​ថ្ងៃ​ទី​២២ វិច្ឆិកា ថា មេ​ឃុំ​ស្តុកប្រវឹក ទប់ស្កាត់​ការ​ទន្ទ្រាន​ដី​ព្រៃ​សហគមន៍​ព្រៃ​ត្រឡាច ប្រកាន់​បក្ខពួក​និយម។ លោក​អះអាង​ថា កន្លង​ទៅ​មេ​ឃុំ​ចាត់​វិធានការ​មាន​ប្រសិទ្ធភាព​តែ​លើ​ប្រជាពលរដ្ឋ​ក្រីក្រ ហើយ​គ្មាន​អំណាច​ទេ ចំណែក​ឯ​ពលរដ្ឋ និង​មន្ត្រី​មាន​អំណាច​មួយ​ចំនួន រួម​មាន​មន្ត្រី​ទាហាន ប៉ូលិស និង​ក្រុម​ប្រឹក្សា​ស្រុក​រុក្ខគិរី ជាដើម បណ្ដោយ​ឲ្យ​ធ្វើ​សកម្មភាព​រាន​ព្រៃ​សហគមន៍​យក​ដី​ធ្វើ​ជា​កម្មសិទ្ធិ​បាន​ដោយ​សេរី៖ «បាទ! កន្លង​មក​មេ​ឃុំ​មិន​ឲ្យ​ប្រជាពលរដ្ឋ​កាប់​ព្រៃ​យក​ដី​ទេ តែ​គាត់​ទុក​ដី​ព្រៃ​នោះ​ឲ្យ​ប្រជាពលរដ្ឋ​បក្ខពួក​គាត់​កាប់​យក​ដី​ជំនួស​វិញ»

ឆ្លើយ​តប​នឹង​ការ​ចោទ​ប្រកាន់​នេះ មេ​ឃុំ​ស្តុកប្រវឹក លោក អ៊ូ អៀង ទទួល​ស្គាល់​ថា ដី​ព្រៃ​សហគមន៍​ព្រៃ​ត្រឡាច ពិត​ជា​មាន​ប្រជាពលរដ្ឋ​លួច​ទន្ទ្រាន​យក​ដី​ធ្វើ​ជា​កម្មសិទ្ធិ​ខ្លះ​មែន ប៉ុន្តែ​លោក​អះអាង​ថា ការ​កាប់​រុក​រាន​នោះ ធ្វើ​ឡើង​ដោយ​លួច​លាក់​ទេ។ លោក​ថា ពុំ​បាន​ប្រកាន់​បក្ខពួក​និយម​ក្នុង​ការ​ដោះស្រាយ​ដូច​ការ​ចោទ​ប្រកាន់​របស់​ប្រជាពលរដ្ឋ​ឡើយ៖ «កន្លង​មក​ខ្ញុំ​ជា​មេ​ឃុំ​មិន​ដែល​ទៅ​រវីរវល់​រឿង​ដី​ព្រៃ​សហគមន៍​នោះ​ទេ។ យើង​មាន​តែ​ពន្យល់​ឲ្យ​ប្រជាពលរដ្ឋ​នាំ​គ្នា​ជួយ​ការពារ​ព្រៃ​សហគមន៍​នោះ​ជា​បន្តបន្ទាប់​រហូត​មក»

ទោះ​យ៉ាង​នេះ​ក្ដី មន្ត្រី​សម្រប​សម្រួល​នៃ​សមាគម​ការពារ​សិទ្ធិ​មនុស្ស​អាដហុក (ADHOC) ខេត្ត​បាត់ដំបង លោក យិន ម៉េងលី មាន​ប្រសាសន៍​ថា ប្រជាពលរដ្ឋ​ផ្ដិត​មេ​ដៃ​ស្នើ​ដក​មេ​ឃុំ​ចេញ​ពី​តំណែង​នេះ គឺ​ជា​ទុក្ខ​លំបាក​របស់​ពួក​គាត់ ដែល​ប្រជាពលរដ្ឋ​យល់​ឃើញ​ថា មេ​ឃុំ​បំពេញ​ភារកិច្ច​ជូន​ប្រជាពលរដ្ឋ​មាន​ភាព​លម្អៀង។ លោក​ថា អភិបាល​ស្រុក​រុក្ខគិរី និង​អាជ្ញាធរ​ខេត្ត​បាត់ដំបង គួរ​បើក​ការ​ស៊ើប​អង្កេត ដើម្បី​ដោះស្រាយ​ជូន​ប្រជាពលរដ្ឋ​ឲ្យ​បាន​ឆាប់​រហ័ស៖ «បញ្ហា​នេះ ប្រសិន​បើ​អាជ្ញាធរ​ស៊ើប​អង្កេត​ហើយ​រក​ឃើញ​ថា មេ​ឃុំ​ពិត​ជា​បាន​ប្រព្រឹត្ត​ខុស​ដូច​ការ​លើក​ឡើង​របស់​ប្រជាពលរដ្ឋ​មែន អាជ្ញាធរ​ពាក់ព័ន្ធ​ត្រូវ​ចាត់​វិធានការ​តាម​ផ្លូវ​ច្បាប់»

សហគមន៍​ព្រៃ​ត្រឡាច ស្រុក​រុក្ខគិរី មាន​ផ្ទៃ​ដី ១.៣៣២​ហិកតារ។ ប្រជាពលរដ្ឋ​អះអាង​ថា ផ្ទៃ​ដី​ប្រមាណ ៥០០​ហិកតារ ត្រូវ​បាន​ប្រជាពលរដ្ឋ និង​មន្ត្រី​មាន​អំណាច​មួយ​ចំនួន​នៅ​ស្រុក​រុក្ខគិរី ទន្ទ្រាន​យក​ដី​ធ្វើ​ជា​កម្មសិទ្ធិ​ជា​បន្តបន្ទាប់។ កន្លង​មក ប្រជាពលរដ្ឋ​បាន​តវ៉ា​ឲ្យ​អាជ្ញាធរ​ខេត្ត​បាត់ដំបង បញ្ឈប់​ការ​រុក​រាន​ព្រៃ​សហគមន៍​នោះ​យក​ដី​ធ្វើ​ជា​កម្មសិទ្ធិ​ទៀត និង​ស្នើ​ឲ្យ​អាជ្ញាធរ​ខេត្ត បែង​ចែក​ដី​មួយ​ចំនួន​ទៅ​ឲ្យ​ប្រជាពលរដ្ឋ​ក្រីក្រ​យក​ដាំ​ដុះ​ដោះស្រាយ​ជីវភាព​គ្រួសារ ប៉ុន្តែ​ការ​ស្នើ​នេះ​ពុំ​ទាន់​ទទួល​បាន​លទ្ធផល​នៅ​ឡើយ។ ទោះ​យ៉ាង​ណា ប្រជាពលរដ្ឋ​នៅ​តែ​បន្ត​ទាមទារ​ទៀត ហើយ​ធ្លាប់​ស្នើ​ឲ្យ​ដក​នាយ​សង្កាត់​រដ្ឋបាល​ព្រៃ​ឈើ​ឃុំ​ព្រៃស្វាយ ចេញ​ពី​តំណែង​ម្ដង​មក​ហើយ។ នៅ​ចុង​ក្រោយ​នេះ ប្រជាពលរដ្ឋ​ប្រមូល​ស្នាម​មេ​ដៃ​បាន​ប្រមាណ ៣០០​នាក់ ត្រៀម​ដាក់​ទៅ​អាជ្ញាធរ​ស្រុក​ស្នើ​ដក​មេ​ឃុំ​ស្តុកប្រវឹក ចេញ​ពី​តំណែង​ក្នុង​ពេល​ឆាប់ៗ​ខាង​មុខ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

2000 people protest against Kem Sokha and Sokha was out from first vice president of assembly.How about 300 people finger print to protest leader of commune? he should be out or people accused him?

Nov 23, 2015 01:11 AM

គេហទំព័រ​ទាំងមូល